ಚಿತ್ರರಂಗಾಚೆ ಚಾಂಗ ಗೂಣ ಘೆವ್ಯಾ! ವಾಯಟ ವಿಷಯು ಸೊಡ್ಯಾ!!

೧೯೧೩ ಮೇ ೫ಕ “ರಾಜಾ ಹರಿಶ್ಚಂದ್ರ ಮ್ಹಣಚೆ ಮೂಕಿ ಸಿನೇಮಾ ಮೂಖಾಂತರ ಭಾರತಾಂತು ಸಿನೇಮಾ ರಂಗಾಚೆ ಉದಯ ಜಾಲೆ. ಆಜಿ ಹರ ವರ್ಷ ಏಕ ಹಜಾರಾ ಪಶಿ ಚ್ಹಡ ಸಿನೇಮ ಭಾರತಾಂತು ತಯಾರ ಜಾತಾತಿ. ಸಿನೇಮಾ ಉದ್ಯಮಾಚೆ ಸ್ವರ್ಗ ಮ್ಹಣೊನು ಘೆತ್ತಿಲೆ ಹಾಲಿವುಡ್ ಪಶಿ ಹೇ ವ್ಹಡ ಅಂಕಡೊ ಜಾವನಾಸ್ಸಾ. ಸುರವೇಚೆ ‘ರಾಜಾ ಹರಿಶ್ಚಂದ್ರ ಮೂಕಿ ಸಿನೇಮ ಜಾವ್ನಾಶ್ಶಿಲೆ ಜಾಲ್ಯಾರಿ ಆಜಿ ತಯಾರ ಜಾವಚೆ ಸಕ್ಕಡ ವಾಕ್ಚಿತ್ರ ಜಾವನಾಸ್ಸಾ. ಕರ್ನಾಟಕಾಚೆ ಮುಖೇಲ ಜಾನಪದ ಕಲಾ ಜಾಲೀಲೆ ಯಕ್ಷಗಾನ ವರಿ ಭಾರತಾಂತು ಸುರವೇಕ ಪುರಾಣಾಚೆ ಕಾಣ್ಯಾ ವಯರಿಚಿ ಸಿನೇಮ ತಯ್ಯಾರ ಕರತಾ ಆಶ್ಶಿಲೆ. ಸತ್ಯ ಹರಿಶ್ಚಂದ್ರ, ಸತೀ ಸುಲೋಚನ, ಭಕ್ತಧ್ರುವ, ಹರಿಮಾಯಾ ಇತ್ಯಾದಿ ಸಿನೇಮ ಹಾಕಾ ಉದಾಹರಣ ಜಾವನು ಸಾಂಗೆತ. 

ವೀಸಾವೇಂ ಶೇಕಡ್ಯಾಚೆ ಸುರವೇಕ ಭಾರತಾಂತು ಸಿನೇಮ ಮಧ್ಯಮ ದರ್ಜೆಚೆ ಲೋಕಾಂಕ ಚುಂಬಕ ಶಕ್ತಿ ವರಿ ಆಕರ್ಷಣ ಕೆಲೀಲೆ ಏಕ ಮಾಧ್ಯಮ ಜಾವನು ವಾಡಲೆ ಮ್ಹಳಯಾರಿ ಚೂಖ ಜಾಯಸನಾ. ಹಾಕ್ಕಾ ಕಾರಣ ಮ್ಹಳಯಾರಿ ಪರದೆ ವಯರಿ ಚೊಲಚೆ ದೃಶ್ಯ ಪಳಯತಾನಾ ಮೆಳಚೆ ಖುಷಿಚೆ ನವೀನ ಮನರಂಜನ ಮ್ಹಣಚೆ ಏಕ ಜಾಲಯಾರಿ ಆನ್ನೇಕ ಕಮ್ಮಿ ಆಸ್ಸುಚೆ ಟಿಕೇಟಾ ಮ್ಹೊಲ. ಸುರವೇ ದಿವಸಾಂತು ಖಾಲಿ ಚಾರ ಪೈಸೆಚೆ ಟಿಕೇಟ ಘೆತಲೇರಿ ಏಕ ಸಿನೇಮ ಪಳಯಚಾಕ ಜಾತ್ತಾಶ್ಶಿಲೆ. ತ್ಯಾ ಖಾತ್ತಿರಿಚಿ ಮಸ್ತ ಥೊಡೆ ಕಾಲಾಂತೂಚಿ ಭಾರತಾಮತು ಸಿನೇಮ ಉದ್ಯಮ ಇತ್ಲೆ ವ್ಹಡ ಜಾವನು ವಾಡಚಾಕ ಸಾಧ್ಯ ಜಾಲ್ಲೆ. ತಾಜ್ಜೆ ಮುನಾಪೋ ಘೆವಚಾಕ ಮುಖಾರಿ ಆಯ್ಯಿಲೆ ಸಿನೇಮಾ ನಿರ್ಮಾಪಕಾನಿ ತೆದನಾಚೆ ಸಾಮಾಜಿಕ ಜೀವನ ತಶೀಚಿ ಸಂಸ್ಕೃತಿಚೆ ಬರೇ ವಿಷಯ ಘೇವ್ನು ಸಿನೇಮಾ ಭಿತ್ತರಿ ಮೆಳೋನು ದಿವಚಾಕ ಲಾಗಲೆ. ತ್ಯಾ ಲೋಕಾಂಕ ಮಸ್ತ ಪಸಂದ ಜಾಲ್ಲೆ. ಹಾಜೆನ ಆಮ್ಗೆಲೆ ಸಂಸ್ಕೃತಿ, ಮಹಾಕಾವ್ಯಾಂಚೊ ಒಳಕ, ಆದರ್ಶ ಸಾಮಾನ್ಯ ಲೋಕಾಂಕ ಜಾವಚಾಕ ಸುಲಭ ಜಾಲ್ಲೆ. 

ಸಕಟಾಂಕ ಗೊತ್ತಾಸ್ಸುಕ ಪುರೊ. ಭಾರತಾಕ ಸ್ವಾತಂತ್ರ್ಯ ಮೆಳ್ಳೆ ಉಪರಾಂತ ೧೯೭೦ ಪರಂತಾಚೆ ವೇಳೆಕ ಭಾರತಾಚೆ ಸಿನೇಮಾಚೆ ಸ್ವರ್ಣಯುಗ ಮ್ಹೊಣು ಇತಿಹಾಸಕಾರ ಆಪಯತಾತಿ. ತೆದನಾಚೆ ಪ್ಯಾಸಾ (೧೯೫೭) ತಶೀಚಿ ಕಾಗಜ್ ಕೆ ಫೂಲ್ (೧೯೫೯) ಆನಿ ರಾಜ್ ಕಪೂರಾನಿ ಕೆಲೀಲೆ ಆವಾರಾ (೧೯೫೧) ಆನಿ ಶ್ರೀ ೪೨೦ (೧೯೫೫) ಆದಿ ಬರಪೂರ ಸಿನೇಮಾಕ ಹಾಕಾ ಉದಾಹರಣ ಜಾವನು ಸಾಂಗಚಾಕ ಜಾತ್ತಾ. ತೆದನಾಚೆ ಸಿನೇಮಾಂತು ಕಾಮಗಾರ ವರ್ಗಾಚೆ ಆನಿ ಶಹರಾಚೆ ಸಾಮಾನ್ಯ ಲೋಕಾಂಗೆಲೆ ಜನಜೀವನಾ ವಯರಿ ಚ್ಹಡಿತ್ಲೆ ಸಿನೇಮಾ ಕಾಡಿಲೆ ಹಾಕ್ಕಾ ಕಾರಣ ಮ್ಹಣತಾತಿ. ತಶೀಚಿ ತೆದನಾಚೆ ಚಿತ್ರ ಕಲಾವಿದಾಂಕ ಸಮಾಜಾಂತು ಏಕ ಉನ್ನತ ಮಾನ ವರೇನ ಆಶಿಲೆ. ಪ್ರತಿಭಾ ಆಶೀಲೆ ಲೋಕ ಮಾತ್ರ ತೆದ್ದನಾ ಸಿನೇಮಾ ಕ್ಷೇತ್ರಾಕ ರಿಗತಾ ಆಶ್ಶಿಲೆ ಕಾರಣಾನಿ ತಾಂಗೆಲೆ ಜೀವನ ವರೇನ ಸಾಮಾನ್ಯಾಂಕ ಆದರ್ಶ ಜಾವನು ಆಸ್ತಾಶ್ಶಿಲೆ. ಕನ್ನಡಾಚೆ ಡಾ|| ರಾಜಕುಮಾರ, ದಿ|| ವಿಷ್ಣುವರ್ಧನ, ಎನ್.ಟಿ. ರಾಮರಾವ, ಅಮಿತಾಬ್ ಬಚ್ಚನ್, ಮಣಿರತ್ನಂ, ಕಮಲಹಾಸನ್ ಅಶ್ಶಿ ಸಾಮಾನ್ಯ ಲೋಕಾಂಕ ಅದರ್ಶಪ್ರಾಯ ಜಾವನು ವಾಂಚಿಲೆ ಮಸ್ತ ಸಿನೇಮಾ ಕಲಾವಿದ ತೆದ್ನಾ ಆಶಿಲೆ.

ಆಜಿ ಸಿನೇಮಾರಂಗ ವ್ಹಡ ಉದ್ಯಮ ಜಾವನು ವಾಡಲಾ, ತಾಜ ಬರಶಿ ಟಿ.ವಿ.ಕ ದಿವಸ, ರಾತಿ ಚೊವೀಸ ತಾಸ ಪ್ರಸಾರ ಕೊರಚಾಕ ಬರಪೂರ ಕಾರ್ಯಕ್ರಮ ಜಾವಕಾ ಪಡಲಾ. ಹಾಜೇನ ಹಜಾರ ನ್ಹಂಹಿ ಲಾಕಾಚೆ ಅಂಕಡ್ಯಾರಿ ಕಲಾವಿದ ಹಾಂತು ಘೂಸಚಾಕ ಲಾಗಲಿಂತಿ. ತಾಂತು ಚ್ಹಡ ಲೋಕಾಲೆ ನಜರ ದುಡ್ಡು ಜೊಡಚಾಂತು ಆಸ್ಸಾ. ಡೈರೆಕ್ಟರಾನಿ ಸಾಂಗಿಲೆ ಒಪ್ಸುನು ದುಸರೇ ಕಡೇಕ ಧಾವ್ನು ಥಂಯಿ ಆನಿ ಇತ್ಲೆ ಜೊಡಕಾ ಮ್ಹೊಣು ಲೆಕತಾಲೀಚಿ ಆಸ್ಸಾತಿ. ತಾಂಗೆಲಾಂತು ಪ್ರತಿಭಾ, ಸಭ್ಯತಾ, ನೈತಿಕತಾ ಸೊಚ್ಚೆ ಚಿಕ್ಕೆ ಕಷ್ಟಚಿ.! ಹಾಜ ಬರಶಿ ಆರತ ಮಾದಕದ್ರವ್ಯಾಚೆ ಘೋಟಾಳೊ ಭಾರತಾಚೆ ಸಿನೇಮಾ ರಂಗಾಕ ಲಾಗುನು ಪಡಲಾ. ಹೇ ಮಸ್ತ ದುಃಖಾಚೆ ಆನಿ ಭಿವಕಾ ಜಾಲೀಲೆ ತಸ್ಸಾಲೆ ವಿಷಯು ಜಾವನು ಆಸ್ಸಾ. ಮುಖಾವಯಲೆ ದೇಶಾಚೆ ಆಸ್ತಿ ಜಾವಕಾ ಜಾಲೀಲೆ ಯುವಕಾರ ಡ್ರಗ್ಸ್ ಮಧೇ ಶಿರಕೂನು ವಳವಳ್ತಾ ಆಸ್ಸಚೆ ಸಿನೇಮಾ ಲೋಕಾಂಕ ಅನುಸರಣ ಕೊರಚಾಕ ಘೆಲಯಾರಿ ತ್ಯಾ ಖಂಡಿತ ವ್ಹಡ ಆಪತ್ತಾಕ ಕಾರಣ ಜಾವಚಾಕ ಪುರೊ. ಆನಿ ದೇಶಾಚೆ ಜನಜೀವನ ಬರ್ಬಾದ ಜಾವಚೆ ಫಾವ ಆಸತಾ. ತ್ಯಾ ಖಾತ್ತಿರಿ ಕೊಣೇಯಿ ಭಾರತೀಯ ಸಿನೇಮಾ ರಂಗಾಚೆ ಆಯಚೆ ಲೋಕಾಂಕ ಅನುಸರಣ ಕೊರಚೆ ಪಯಲೆ ಹಂಸಕ್ಷೀರ ನ್ಯಾಯಾ ವರಿ ತಾಂಗೆಲೆಂ ಚಾಂಗ ಗೂಣ ಮಾತ್ರ ಘೇವ್ನು ವಾಯಟ, ಆಮ್ಗೆಲೆ ಜೀವನಾಕ ಮಾರ ದಿವಚೆ ತಸ್ಸಾಲೆ ಗೂಣ ಸೊಡಚೆ ಬರೆಂ ಮ್ಹೊಣು ಮಾಕಾ ದಿಸ್ತಾ.