ಜೀವಾಚೆ ಮ್ಹೊಲ (Part -1)

ಮಗಧ ದೇಶಾಚೆ ಪಾಟಲೀಪುತ್ರ ಮ್ಹಣಚೆ ರಾಜ್ಯ ಥಂಯಿ ಕೀರ್ತಿಸೇನ ಮ್ಹಣಚೆ ರಾಯು ರಾಜ್ಯಭಾರ ಕರತಾ ಆಶ್ಶಿಲೊ. ತಾಕ್ಕ ಏಕಳೀ ಧೂವ; ಚಂದ್ರಪ್ರಭೆ ಮ್ಹೊಣು ತಿಗೆಲೆ ನಾಂವ. ರಾಯು ಕೀರ್ತಿಸೇನು ತಿಕ್ಕಾ ಮಸ್ತ ಮ್ಹೋಗು ಕರತಾಶಿಲೊ. ತಿಕ್ಕಾ ಏಕದಂ ಏಕ ಕಾಯ್ಲೊ ಅಂಟೂನು ಸೊಡಲೊ. ರಾಯಾಲೆ ಆಸ್ಥಾನಾಚೆ ಸಕ್ಕಡ ವೈದ್ಯಾನಿ ಕಸ್ಸಕಸ್ಸಲೆ ವಾವರೊ ಕೆಲಯಾರೀಚಿ ತ್ಯಾ ಕಾಯ್ಲೊ ಗೂಣ ಜಾಯನಿ. ರಾಯು, ರಾಜ ಕುಟುಂಬಾಚಿ ಸಕ್ಕಡ ಹಾಜ್ಜೆನ ಚಿಂತಿತ ಜಾಲ್ಲೆ. ತೆದ್ದನಾ ರಾಯು ಕೀರ್ತಿಸೇನ ಆಪಣಾಲೆ ಮಂತ್ರಿ ಆನಿ ಪರಿವಾರ ಲೋಕಾ ಬರಶಿ ವಿಚಾರ ಕೊರನು “ಕೋಣ ಆಪಣಾಲೆ ಧೂವ್ಯಾಕ ಆಯ್ಯಿಲೆ ವಿಶೇಷ ಕಾಯ್ಲೆಚಾನ ಆರಾಮ ಕರತಾತಿಕಿ, ತಾಂಕಾ  ಅರ್ಧ ರಾಜ್ಯ ದೀವ್ನು, ರಾಜಕುಮಾರಿಕ ತಾಂಕ ದೀವ್ನು ಲಗ್ನ ಕರತಾ ಮ್ಹೊಣು ಪ್ರಕಟ ಕೆಲ್ಲೊ. ಆನಿ ಆಪಣಾಲೆ ರಾಜಸೇವಕ ನಿಮಿತ್ಯ ಹೇ ವಿಷಯು ರಾಜ್ಯಾದ್ಯಂತ ಗಾಂವಗಾಂವಾಂತು ಡಂಗೂರ ಮಾರೆಯಿಸಿಲೊ. ಹೇ ಆಯಕೂನು ಮೂಲ್ಲ ಮೂಲ್ಲೆಂತು ಆಶ್ಶಿಲೆ ವ್ಹಡ ವ್ಹಡ ಪಂಡಿತ, ವೈದ್ಯ ಯವ್ನು ತಿಕ್ಕಾ ವಾಕ್ಕದ, ಚೂರ್ಣ, ಕಷಾಯ ಪೂರಾ ದಿಲ್ಲೆ. ಜಾಲ್ಯಾರಿ ಚಂದ್ರಪ್ರಭೆಕ ಹುಷಾರ ಮಾತ್ರ ಜಾಯನಿ. ತಾಂಕ ಸಕ್ಕಡಾಂಕ ತ್ಯಾ ವ್ಯಾಧಿ ಖಂಚೆ ಮ್ಹೊಣು ಸೊದ್ದುನು ಕಾಡಚಾಕ ಸಹಿತ ಜಾಯನಿ. ಹಾಜ್ಜೇನ ದೀಸಾಂದೀಸಾಕ ಚಂದ್ರಪ್ರಭೆ ಬಾಗತಾ ಘೆಯ್ಲಿ. 

ಧೂವ್ಯಾಕ ಹೇ ನಮೂನೆ ಕಾಯ್ಲೊ ಆಯ್ಯಿಲೆ ನಿಮಿತ್ತ ರಾಯು ಕೀರ್ತಿಸೇನಾಕ ಜವಣ, ಖಾಣಾ ವಯರಿ ಆಸಕ್ತೀ ಕಮ್ಮಿ ಜಾಲ್ಲಿ. ರಾಜಕಾರ್‍ಯ ವಯಚೆ ಶ್ರದ್ಧಾ ಸಹಿತ ಊಣೆ ಜಾಲ್ಲೆ. ಸಕಡಾಂತು ಬೇಜಾರ ಎವಚಾಕ ಲಾಗಲೆ ಹಾಜ್ಜೇನ ತೊಂ ಸಹಿತ ಭಾಗಚಾಕ ಲಾಗಲೊ ಆನಿ ತಾಗೆಲೆ ಹುಷಾರಪಣ ಸಹಿತ ಪಾಡ ಜಾವಚಾಕ ಲಾಗಲೆ. ತ್ಯಾ ವೇಳ್ಯಾಕ ಸೋಮನಾಥ ಮ್ಹಣತಾಲೊ ಏಕಳೊ ಯುವವೈದ್ಯು ಕೀರ್ತಿಸೇನಾಲೆ ರಾವಳಾರಾಕ ಆಯಲೊ. ಆನಿ ತೊಂ ರಾಜಕುಮಾರಿ ಚಂದ್ರಪ್ರಭೆಕ ಪೂರ್ತಿ ಜಾವ್ನು ತಪಾಸ ಕೊರನು; ತಿಕ್ಕಾ ಆಯ್ಯಿಲೆ ಕಾಯ್ಲೊ ಖಂಚೆ ಮ್ಹೊಣು ಸೊದ್ದುನು ಕಾಡ್ನು ರಾಯು ಕೀರ್ತಿಸೇನಲಾಗ್ಗಿ ವಚೂನು “ಕಾಯ್ಲೊ ಖಂಚೆ ಮ್ಹಣಚೆ ಮಾಕ್ಕಾ ಕಳ್ಳೆ. ಜಾಲಯಾರಿ ಹಾಕ್ಕ ವಾಕ್ಕದ ಆತ್ತ ಮೆಗೆಲಾಗ್ಗಿ ನಾ. ತ್ಯಾ ವಿಂಧ್ಯಾ ಪರ್ವತಾರಿ ಮೆಳ್ತಾ. ಥೈಕ ವಚ್ಚುನು ಹಾಂವ ತ್ಯಾ ವಾಕ್ಕದ ಹಾಡತಾ. ಹಾಂವೆ ವಚೂನು ಎವಚೆ ಪರಂತ ಕಾಯ್ಲೊ ಚ್ಹಡ ಜಾಯನಾ ತಶಿ ವಾಕ್ಕದ ದಿವನು ವತ್ತಾ. ತುಮ್ಮಿ ಕಬೂಲ ಕೆಲಯಾರಿ ಮಾತ್ರ ಚಿಕಿತ್ಸಾ ಆಯಚಾನಂಚಿ ಚಾಲು ಕರತಾ ಮ್ಹಳ್ಳೊ.

ತ್ಯಾ ಆಯಕೂನು ಕೀರ್ತಿಸೇನಾಕ ಮಸ್ತ ಸಂತೋಷ ಜಾಲ್ಲೆ. ಸೋಮನಾಥು ರಾಯಾ ತಾಕೂನು ಕಬೂಲಿ ಘೇವ್ನು ವಿಂಧ್ಯಾ ಪರ್ವತಾಕ ಘೆಲ್ಲೊ. ಆಪಣಾಕ ಜಾಯಿ ಜಾಲೆಲೆ ಝಾಡ-ಪಾಳ ಸೊದ್ದುನು ಘೇವ್ನು ಬೆಗ್ಗಿ ಬೆಗ್ಗಿ ಪಾಟಲೀಪುತ್ರ ಬಗಲೇನ ಎವಚಾಕ ಲಾಗಲೊ. ಬೆಗ್ಗಿ ವಚೂನು ರಾಜಕುಮಾರಿಕ ಹುಷಾರ ಕೊರಕಾ ಮ್ಹಣಚೆ ಉದ್ದೇಶು ತಾಗೆಲೆ ಜಾವ್ನು ಆಶಿಲೆ. ಪಾಟಲೀಪುತ್ರಾಕ ಎವ್ನು ರಾವಳಾರ ಬಗಲೇನ ಎತ್ತ ಆಸತನಾ ರಾವಳಾರಾಂತು ಕಾಮ ಕೊರಚೆ ಏಕಳೀ ಮಾಂತಾರಿ ಕಿಟಾರ್ ಮ್ಹೊಣು ಕಿರಚೂನು ಸಕ್ಕಲ ಪೋಡ್ನು ಸೊಡಲಿ. ಸೋಮನಾಥು ತಿಗೆಲೆ ಲಾಗ್ಗಿ ವಚೂನು ತಪಾಸ ಕೊರನು ಪಳೈಲೊ, ತೆದ್ದನಾ ತ್ಯಾ ಮಾಂತಾರೇಕ ಸಹಿತ ರಾಜಕುಮಾರಿಕ ಆಯ್ಯಿಲೇಚಿ ಕಾಯ್ಲೊ ಆಯಲಾ ಮ್ಹಣಚೆ ತಾಗೆಲೆ ಕಳೀತಾಕ ಆಯಲೆ. ಹೀ ಮಾಂತಾರಿ ಜಾಲೇಲೆ ನಿಮಿತ್ಯ ಆತ್ತಽಚಿ ಹಿಕ್ಕಾ ವಾಕ್ಕದ ದೀನಾ ಜಾಲಯಾರಿ ಹೀಣೆ ಮೊರಚೆ ಖಂಡಿತ ಮ್ಹೊಣು ಸಮಜಿಲೊ ಸೋಮನಾಥು ಆಪಣಾನ ರಾಜಕುಮಾರಿ ಖಾತೇರಿ ವಿಂಧ್ಯಾಪರ್ವತ ತಾಕೂನು ಘೆವುನು ಆಯಿಲೆ ಜಾಡ-ಮೂಲಿಕೇಚೆ ರೋಸು ಕಾಡ್ನು ತ್ಯಾ ಮಾಂತಾರೆಕ ಪಿವೋನು ಸೊಡಲೊ. ಮಾಂತಾರೆ ಸುತ್ಲು ಲೋಕ ರಾಬ್ಬೂನು ಪಳೈತಾ ಆಸ್ಸತಿ. ತಿತ್ಲ ಭಿತೇರಿ ತಾಣೆ ಪಿವೈಲೆ ವಾಕ್ದಾ ಶಕ್ತಿನ ಮಾಂತಾರಿ ಉಟಾನು ಬಸಲಿ. ಆನಿ ಸೋಮನಾಥಾಕ ಶಂಬರಿ ವರ್ಸ ಸುಖಾಂತು ವಾಂಚೂನು ಉರಿ ಮ್ಹೊಣು ಆಶೀರ್ವಾದ ಕೊರನು ಆಪಣಾಲೆ ಘರಾಕ ಘೆಲ್ಲಿ.

ಸೋಮನಾಥು ರಾವಳಾರಾಕ ಎವ್ನು ಹೇ ವಿಷಯು ಸಕ್ಕಡ ರಾಯು ಕೀರ್ತಿಸೇನಾಕ ಸಾಂಗಲೊ. ಹಾಜ್ಜೇನ ರಾಯಾಕ ಮಸ್ತ ಕೋಪು ಆಯಲೆ. ಆಪಣಾಲೆ ಧೂವ್ಯಾಪಶಿ ತುಕ್ಕಾ ಆಜಕಿ, ಫಾಯಿ ಮೊರನು ವಚ್ಚೆಕ ತಯಾರ ಜಾಲೇಲಿ ಏಕಳಿ ಮಾಂತಾರಿಚಿ ವ್ಹಡ ಜಾಲ್ಲಿವೇ? ತುಗೆಲಾಗ್ಗಿ ತ್ಯಾ ಸೋಡ್ನು ವಿಂಗಡ ಜಾಡ-ಮೂಲಿಕಾ ನಾ ಮ್ಹೊಣು ಗೊತ್ತಾಸ್ಸಲೇರಿಚಿ ತೂಂವೆ ಹಾಡಿಲೆ ವಾಕ್ಕದ ತ್ಯಾ ಮಾಂತಾರೆಕ ದಿಲೀಲೆ ಸಮ್ಮವೇ? ಆನ್ನೇಕ ಪಂತಾ ತೂಂವೆ ವಚೂನು ತ್ಯಾ ಜಾಡ-ಮೂಲಿಕಾ ಹಾಡ್ನು ಮೆಗೆಲೆ ಧೂವ್ಯಾಕ ಚಿಕಿತ್ಸಾ ಕೊರಚೆ ಪರಂತ ತೀ ವಾಂಚೂನು ಉರತಕಿ ನಾಂಕಿ. ಜಾಂವೊ ಆನ್ನೆಕ ಪಂತಾ ಘೆಲೀಲ ತೆದ್ದನಾ ತ್ಯಾ ಜಾಡ-ಮೂಲಿಕಾ ತುಕ್ಕಾ ಮೇಳ್ನಾ ಜಾಲಯಾರಿ ಮೆಗೆಲೆ ಧೂವ್ಯಾಲೆ ಗಽತಿ ಕಸ್ಸಲೆ? ತೂಂವೆ ಕೆಲೀಲೆ ಹೇ ರಾಜದ್ರೋಹಾಕ ತುಕ್ಕಾ ಮರಣದಂಡನೆ ಶಿಕ್ಷಾ ದಿತ್ತಾ ಮ್ಹಳ್ಳೊ (ಸಶೇಷ)