बचत जरूरी है

अच्छओ भविष्य के लाने आजई से बचत करबो एन जरूरी है। जिसे भविष्य में होबे बाले घाटे और पइसन कि कमी से निपटो जा सके। इके लाने दिमाग से पइसा खर्च करबो और फिजूलखर्ची रोकबे की जरूरत है।

आप जितनो भी कमाउत होय उको हिसाब किताब रखबो जरूरी है कि पइसा का का खर्चा हो रओ, कितनो हो रओ। भविष्य खा सुरक्षित रखबे के लाने बीमा योजना करना भी अच्छओ होत।

सबसे जरूरी होत है आपने खर्चा खा कम करबो। फिजूल की शॉपिंग, फालतू बारे घुमबो फिरबो भी न करें। इन हल्की हल्की बातन खा ध्यान करके बचत कर सकत है। जे सब चीजन से बचबे बाले पइसन को इस्तेमाल सइ जंगा करें।

बहुतई जरूरी होय तबाई कर्जा लेय। कई बेर हम अपनी हल्की फुल्की जरूरत के लाने भी कर्जा ले लेत भले कितनउ ब्याज काय न देबे पड़े, ईसे बचे।

अपने ख़र्चन खा पुरो करबे के लाने अपने शौक कमाई कर सकत है। अगर लिखबो को शौक है सो आप ब्लॉगिंग कर सकत है। कोनऊ कला आउत होय सो उये भी दूसरन खा सीखा सकत है इसे आपकी कला निखर सकबे के संगे संगे कमाई भी हो सकत है।

क्रेडिट कार्ड को भी ज्यादा इस्तेमाल सइ नइया। हमाई सबकी आदत होत है कि कछु भी सामान मंगावे के लाने क्रेडिट कार्ड को इस्तेमाल कर लेत लेकन अगर इको इस्तेमाल कम हुईए सो आपकी इपे लगबे वाली ईएमआई भी कम हुईए।

जब से लॉक डाउन लगो है हम अपने घरन के काम खुद करन लगे है। जा आदत बनाये रखें। अगर जरूरत नइया तो काम वाली रखबे से बच सकत है। जो काम खुद कर सकत है उके लाने पइसा खर्च करबे की का जरूरत है।

कोरोना के टेम में आय के साधन में बहुतई कमी आई हैं और हमाये घरन में पइसन को संकट भी बड़ो है। ई सबसे निपटबे के लाने वित्तिय योजना बनाओ जरूरी है। आप उपरोक्त उपायन से अपनी समस्या का कम कर सकत है।