ಮಹಾತ್ಮಾಲೆ ಚೂಖಿ ವಿಸರಾ!

ಸ್ವಾಮಿ ವಿವೇಕಾನಂದಾಲೋ ಗುರು ಶ್ರೀ ರಾಮಕೃಷ್ಣ ಪರಮಹಂಸ ಏಕ್ಪಟಿ ಕಲ್ಕತ್ತೆಚೆ ದಕ್ಷಿಣೇಶ್ವರಾಂತು ಆಸ್ಸುಚೆ ಜಯನಾಥಮಲ್ಲಿಕನ ಮ್ಹಣಚೆ ಮಹನೀಯಾಲೆ ಘರ್‍ಕಡೆ ಆಶಿಲ ತೆದ್ದನಾ ಥೈಕ ಅಗರ್ಭ ಶ್ರೀಮಂತ ಜಾಲೀಲೊ ಮಹಾರಾಜ ಜಿತೇಂದ್ರ ಮೋಹನ ಟಾಗೋರ್ ಮ್ಹಣಚೆ ನಾಮಾಧಿಕ ಮನೀಷು ಏಕಳೊ ಆಯಲೊ. ತೋಂ ಅಗರ್ಭ ಶ್ರೀಮಂತು ಮಾತ್ರ ನ್ಹಂಹಿ ದಾನಧರ್ಮ ಕೊರಚಾಂತು ವರೇನ ಮಸ್ತ ನಾಂವ ಕಮಯಿಲೊ ಮನೀಷು ಜಾವನಾಶಿಲೊ. ಥಂಯಿ ಉಪನ್ಯಾಸ ದಿತ್ತಾಚಿ ರಾಮಕೃಷ್ಣ ಪರಮಹಂಸ “ಕಂಯಿ ಪರಿಯಂತ ತುಮಗೆಲೆ ಮನ ಕಾಮ, ಕಾಂಚನಾ ವಯರಿ ಆಸತಕಿ, ಥಂಯಿ ಪರಿಯಂತ ನುಸ್ತೆ ತುಮ್ಮಿ ದೇವಾಲೆ ಸ್ಮರಣ ಕರತಾ ಆಸಲೇರಿಚಿ ಖಾಂಯಿ ಮುನಾಪೊ ನಾ. ಮ್ಹೊಣು ಮ್ಹಳ್ಳಿ. 

ತೆದ್ದನಾ ತೊಂ ಮಹಾರಾಜ ಜಿತೇಂದ್ರ ಮೋಹನ ಟಾಗೋರ್ ಪರಮಹಂಸಾಲೆ ಉತ್ರಾಂಕ ಆಕ್ಷೇಪು ಕೊರಚಾಕ ಉಟಾನು ರಾಬೂನು “ಮಾನ್ಯಸ್ತಾನು ಗೃಹಸ್ಥ ಜಾಲೀಲೆ ಆಮಕಾ ಪರಮಾತ್ಮಾಕ ಮನಭೊರನು ಚಿಂತನ ಕೊರಚಾಕ ಖಂಯಿ ಜಾತ್ತಾ. ಮನ ಸಕ್ಕಡೆ ಧಾಂವ್ತಾ ಉರತಾ. ತಸ್ಸಲೊ ಧರ್ಮವಾನ, ನ್ಯಾಯನಿಷ್ಠ ಮ್ಹೊಣು ನಾಂವ ಪಾವ್ವಿಲೊ ಕುಂತಿಲೊ ಪೂತು ಧರ್ಮರಾಯಾಕ ವರೇನ ಏಕ ಪಟ್ಟಿಕ ಸಾಂಕಾ ಪಡಲೆ. ಆನಿ ಆಮ್ಗೆಲೆ ತಸ್ಸಾಲೆ ಸಾಮಾನ್ಯ ಮನೀಷಾಲೆ ವಿಷಯು ಕಸ್ಸಲೆ? ರಾಮಕೃಷ್ಣ ಪರಮಹಂಸಾಂಗೆಲೆ ಉತ್ರಾಂತು ಖಂಚೇಯಿ ತತ್ತ್ವ ನಾ ಮ್ಹಣಚೆ ವರಿ ಸಸಾರಪಣಾನಿ ಥಂಯಿ ಬಶ್ಶಿಲೆ ಸಕ್ಕಡಾಂಕ ಪಳಯತಾ ಮ್ಹಳ್ಳೊ. ತಾಗೆಲೆ ಉತ್ರಾಂತು ಆಪ್ಪಣ ಮಹಾದಾನಿ ಮೆಗೆಲೆ ಉತ್ರಾಕ ಎದುರುತ್ತರ ದಿತ್ತಾಲಿ ಕೋಣ ಆಸ್ಸತಿ ಮ್ಹಣಚೆ ಗಮಂಢಿಪಣಯಿ ಆಶ್ಶಿಲೆ. 

ತಾಕ್ಕಾ ರಾಮಕೃಷ್ಣ ಪರಮಹಂಸ “ಪಳೆ ಆಮ್ಮಿ ಮನೀಷ ಅಶ್ಶಿ... ದುಸರೆ ಮನೀಸಾಲೆ ಸಾನ್ಸಾನ ಚೂಖಿಚಿ ಉಬರೂನು ತೊಂ ಬುರ್ನಾಸ ಮ್ಹಣಚೆ ವರಿ ಉಲಯತಾತಿ. ಜಾಂವೊ ಆಮ್ಗೆಲೆ ಚೂಖ ಸಮರ್ಥನ ಕೊರನು ಘೆತ್ತಾತಿ. ಆತ್ತ ಧರ್ಮರಾಯಾಲೆ ವಿಷಯಾಕ ಯವ್ಯಾ. ತಾಗೆಲೆ ದಯಾ, ದಾನ, ಧರ್ಮ, ಪರೋಪಕಾರ, ಸತ್ಯ, ತ್ಯಾಗ, ಬಂಧು ಪ್ರೇಮಾ, ಪ್ರಜಾ ಪ್ರೇಮ ಸಕ್ಕಡ ವಿಸರೂನು ತಾಣೆ ಸಾಂಗಿಲೆ ಏಕ್ಕಾ ಏಕ ಪಟ್ಟಿಕ ಸ್ಮರಣೆಂತು ದವರೂನು ಸಾಂಗತಾ ಉರತಾತಿ. ಏಕ ಕಾಯಳೊ ತೋಂಟಾಕ ವಚೂನು ಥಂಯಿ ಪೇರ, ಕೇಳಿ, ಸೇಬು ರುಕ್ಕಾಂತು ಫಳ ಜಾಲಯಾರೀಚಿ ತ್ಯಾ ಸಕ್ಕಡ ಸೋಡ್ನು ಕೋಡ ಬೇವಾ ರುಕ್ಕಾರಿ ವಚೂನು ಬೈಸೂನು ತಾಜ್ಜೆ ಕಾಯಿ ಖಾವ್ನು ತ್ಯಾ ತೋಂಟಾಚೆ ಫಳ ಸಕ್ಕಡ ಕೋಡು ಮ್ಹಳಿಲ ವರಿ ಜಾಲ್ಲೆ. ದುಸರ್‍ಯಾ ಖಾತ್ತಿರಿ ಆಮ್ಮಿ ತಿತ್ಲೆ ಸಸಾರ ಜಾವನು ಉಲಯಚಾಕ ನಜ್ಜ. ಮ್ಹೊಣು ಮ್ಹಳೀಲ ತೆದ್ನಾ ಟಾಗೋರಾಲೆ ತೋಂಡ ಕಾಳೊತ್ತುನು ಘೆಲ್ಲೆ. ಥಂಯಿ ಬಶ್ಶಿಲೆ ಸಕ್ಕಡಾಂಕ ದುಸರ್‍ಯಾಲೆ ಊಣೆಪಣಚಿ ಉಬರೂನು ಉಲಯಚೆ ಆಮ್ಗೆಲೆ ನೀಚಪಣ ಮ್ಹೊಣು ದಿಸಲೆ. ದುಸರ್‍ಯಾಲೆ ಊಣೆಪಣ ವಿಸರಕಾ ಮ್ಹಣಚೆ ರಾಮಕೃಷ್ಣ ಪರಮಹಂಸಾಂಗೆಲೆ ವ್ಹಡಪಣ ಹಾಜೆನ ಆಮಕಾ ಕಳೀತಾಕ ಎತ್ತಾ.