‘ಬಾಯ್ಲ-ಬಾಮ್ಣಾಲೆ ಜಗಡಿ.......(Part-2)

ತಶ್ಶಿ ಮ್ಹೊಣು ಆಮ್ಗೆಲೆ ಬಾಯ್ಲಮನ್ಶೆಲೊ ಪತಿ ಭಕ್ತಿ ಆನಿ ತಾನ್ನಿ ಬಾಮ್ಣಾಕ ದಿವಚೆ ಮರ್ಯಾದ ಊಣೆ ಮ್ಹಣಚಾಕ ಜಾಯನಾ. ತುಮ್ಮಿ ಕಸಲ ತರಿ ವಿಕಚಾಕ ಜಾಂವೊ ವಿಚಾರಚಾಕ ತಾಂಚ ಲಾಗ್ಗಿ ವಚ್ಚಾ. ಆನಿ ನಿಮ್ಗಿಯಾ. ತಾಂಕಾ ಜಾವ್ಕಾ ಜಾಲಯಾರೀಚಿ ಏಕದಂ ಜಾವಕಾ ಮ್ಹೊಣು ಸಾಂಗನಾತಿ. “ಹಾಂಚ ಲಾಗ್ಗಿ ಏಕ ವಿಷಯು ನಿಮಗೂನು ಘೆವ್ಕಾಮೂ... ತಾಂಚ ಲಾಗ್ಗಿ ನಿಮ್ಗಿನಾಶಿ ಆಪ್ಪಣ ಕಸ್ಸಲೇ ಘೆತ್ತಾಲಿ ನ್ಹಂಹಿ.... ಮ್ಹಣತಾ ಭಿತ್ತರಿ ವಚ್ಚೂನು ತಿಕ್ಕಾ ತ್ಯಾ ಜಾವ್ಕಾ ಮ್ಹೊಣು ಆಸಲೇರಿ “ಪಳೆಯಾ ಅಮುಖೆ ಪದಾರ್ಥ ಆಯಲಾ... ಚಾರಶಿ ರೂಪಯಿ ಖಂಯಿ... ತುಮ್ಮಿ ಜಾಯತ ಮ್ಹಳಯಾರಿ ಘೆತ್ತಾ... ಮ್ಹಣತಾತಿ. ಬಾಮಣಾನಿ ಕಸಲೇ ಪ್ರತಿಕ್ರಿಯಾ ದಾಖಯ್ನಾ ಜಾಲಯಾರಿ “ನ್ಹಂಹಿ ತುಮ್ಮಿ ಏಕ್ಪಟಿ ಭಾಯರಿ ಯೆಯ್ಯಾತಿ... ಚಿಕ್ಕೆ ಪಳೆಯಾ... ತುಮ್ಮಿ ಘೇ ಮ್ಹಳಯಾರಿ ಘೆತ್ತಾ... ಮ್ಹೊಣು ಪೂಸಿ ಮಾರಚಾಕ ಲಾಗ್ತಾತಿ. ಇತ್ಲೆ ಸಾಂಗ್ಲೆ ಮ್ಹಳಯಾರಿ ಬಾಮ್ಣಾನಿ ಕೋಳ್ನು ಸೊಡ್ಕಾ ‘ಬಾಯ್ಲೇಕ ತ್ಯಾ ಪದಾರ್ಥ ಜಾವ್ಕಾ ಜಾಲ್ಲಾ.. ಕಾಡೋನು ದೀನಾ ಜಾಲ್ಯಾರಿ ಮುಖಾರಿ ಜಗಡಿ, ಘರ್ಷಣ, ಅಶಾಂತಿ ಸಕ್ಕಡ ಘಡ್ಚೆ ಆಸ್ಸ... ಮ್ಹೊಣು. ಫಕ್ನೆ ತಿಕ್ಕಾ ತ್ಯಾ ನಾಕ್ಕಾಶ್ಶಿಲೆ ಮ್ಹೊಣು ಸಮಜಿಯಾ ತೆದ್ನಾ ವರೆನ ತೀ ಏಕದಂ ನಾಕ್ಕ ಮ್ಹೊಣು ಸಾಂಗನಾ. “ಚಿಕ್ಕೆ ರಾಭ... ಮೆಗೆಲೆ ಬಾಮ್ಣಾ ಲಾಗ್ಗಿ ನಿಮ್ಗೂನು ಎತ್ತಾ... ಮ್ಹಣತಾ. ಆನಿ ಘರ್‍ಕಡೆ ಬಾಮ್ಮುಣು ಆಸ್ಸೊ ನಾ ಆಸ್ಸೊ ಭಿತ್ತರಿ ವಚ್ಚೂನು ಯವ್ನು “ತಾನ್ನಿ ನಾಕ್ಕ ಮ್ಹಳ್ಳೆ ಮ್ಹೊಣು ಸಾಂಗೂನು ತಾಕ್ಕಾ ಥಂಚಾನ ಬೆರ್ಸಿತಾತಿ. 

ಘೆತ್ತಿಲೆ ಪದಾರ್ಥ ಚಾಂಗ ಆಸಲೇರಿ “ಪಳೇಯಾ... ಹಾಂವೆ ತ್ಯಾ ದಿವಸು ಘೆತ್ತಿಲ್ಯಾಕ ಜಾಲ್ಲೆ... ಮ್ಹೊಣು ಅಭಿಮಾನ ದಾಖಯತಾತಿ. ಫಕ್ನೆ ತ್ಯಾ ಮಸ್ತ ಬುರ್ನಾಸ ಆಸಲೇರಿ “ತುಮ್ಮಿ ಘೇ ಮ್ಹಳಿಲ್ಯಾಕ ಘೆತ್ಲೆ, ಹಾಂವೆ ನಾಕ್ಕ ಮ್ಹಳಯಾರಿ ತುಮಕಾ ಬೇಜಾರ ಜಾತ್ತ ಮ್ಹೊಣು ಘೆತ್ಲೆ ಮ್ಹೊಣು ಉಲ್ಟಾ ಪ್ಲೇಟ್ ಘೂಂವಡಾನು ಬಾಮ್ಣಾಕಚಿ ಅಪರಾಧಿ ಸ್ಥಾನಾಂತು ರಾಬಯತಾತಿ. 

ಆಪಲೆ ಕೂಳಾರ್‍ಚಾಕ ಖಾಂಯತರಿ ದಿವಯಕಾ ಮ್ಹೊಣು ಆಸಲೇರಿ ಬಾಯ್ಲ ಬಾಮಣಾಕ “ಮಾವಾ ಘರ್‍ಕಡೆ ತುಮಗೇಲೆ ಪ್ರತಿಷ್ಟೆ ಚ್ಹಡ ಕೊರಚಾಕ ಹಾಂವೆ ಹೇ ಸಕ್ಕಡ ಕರತಾ ಆಸ್ಸುಚೆ ಮ್ಹೊಣು ವ್ಹಡಪಣಾಚೆ ಸರಾಯಿ ಪಿವೋನು ಅಮಲ ಕರತಾತಿ. ತ್ಯಾಂಚಿ ಬಾಮ್ಣಾಲೆ ಬಾಂವ, ಬೈಣಿ, ಅವಯಿ-ಬಾಪಯಿಕ ಖಾಂಯತರಿ ದಿವಚೆ ವೇಳ್ಯಾರಿ “ತುಮ್ಮಿ ವ್ಹಡ ದಾನಶೂರ ಕರ್ಣ ಪಳೇಯಾ... ಕೆದ್ನತರಿ ತುಮ್ಮಿ ಮಾಕ್ಕಾಕ ಚಾಂಗ ಕಾಪ್ಪಡ ಹಾಡ್ನು ದಿಲ್ಲಾವೇ? ಏಕ ಆಠ ಪವನ್ನಾಚೆ ಮೋತ್ಯಾ ಕಂಠಿ ಕೊರನು ದಿಯ್ಯಾ ಮ್ಹೊಣು ನಿಮಗೂಚಾಕ ಲಾಗ್ಗುನು ಖೋಂಚೊನು, ತೋಂಡ ತಿರ್ಪಿತಾತಿ. 

ಆತ್ತಂತು ಚೆಲಿಯಾ ಚರಡುವಾಂಕ ಲಗ್ನ ಜಾವಚೆ ಪರ್ಯಂತ ಕಾಲೇಜ, ನೌಕರಿ ಮ್ಹೊಣು ರಾಂದಪಾ ಕೂಡಾಚೆ ದರ್ಶನ ವರೇನ ಜಾವ್ನು ಆಸ್ಸನಾ.  ತೋರಿ ದಾಳಿ, ಉಡದಾ ದಾಳಿ ಮ್ಹಳಯಾರಿ ವರೇನ ಗೊತ್ತಾಸ್ಸನಾ. ತ್ಯಾ ಖಾತ್ತಿರಿಚಿ ರಾಂದ್ಪಿ, ಕಾಮಾಚಾಂಕ ಇತ್ಲೆ ಡಿಮ್ಯಾಂಡ್ ಆಯಲಾ. ಉಂಬಳ್ಚಾಕ ಯವ್ಚೆ ಘರ್‍ಕಡೆ ವಾಸಿಂಗ್ ಮಿಷನ್ ಆಸ್ಸುಕಾ, ಆಯ್ದನಾಕ ಲಾಗ್ಗೂನು ಆಶ್ಶಿಲೆ ಕರ್‍ಕಟ, ತೆಲ್ಕಟ್ ಕಾಡ್ನು ದವರಕಾ ಮ್ಹಳಯಾರಿ ಮಾತ್ರ ಎತ್ತಾತಿ. ನಾತಲೇರಿ ಹೇ ಸಕ್ಕಡ ಕಾಮ ಕೊರಚಾಕ ಮೆಳಚೊ ಪುಗಸಟ್ಟೆ ನೌಕರು ಬಾಮ್ಮುಣು ನ್ಹಂಹಿವೇ? ಘರಾಣಿಚೆ ಮರ್ಯಾದೆಕ ಭೀವ್ನು ತ್ಯಾ ಬಾಮ್ಮುಣು ಮ್ಹಣಚೆ ಪ್ರಾಣಿನಿ ತೊಂಡಾಕ ಬೀಗ ಘಾಲ್ನು ಘೇವ್ನು ಉರಲ್ಯಾರಿ ತ್ಯಾಂಚಿ ಘರ ಸ್ವರ್ಗ! ಜಗಡ್ಚೆ ಪ್ರಶ್ನೋ ಆಸ್ಸನಾ. 

ಘರ್‍ಕಡೆ ಬಾಯ್ಲ-ಬಾಮ್ಣಾ ಮಧೇ ಕಿತಯಾಕ ಮಸ್ತ ಜಗಡೀ ಜಾತ್ತಾ? ಬಹುಶಃ ಹೇ ಖಾತ್ತಿರಿ ಆನ್ನೀಕೆ ಕೋಣಯಿ ಸರ್ಚ್ ಕೆಲೀಲ್ನಾ. ಜಾಲ್ಯಾರಿ ಪಯರಿ ವಾಟ್ಸ್‌ಪ್ಪಾಂತು ಆಯ್ಯಿಲೆ ಏಕ ಸಂದೇಶು ಕಸ್ಸಲೆ ಮ್ಹಣತಾ ಮ್ಹಳಯಾರಿ ಆಮ್ಗೆಲೆ ಶರೀರಾ ತಾಕೂನು ೨೦೦ ಕ್ಯಾಲರಿ ಬರ್ನ್ ಜಾವಕಾ ಜಾಲ್ಯಾರಿ ೪೫ ಮಿನಿಟ ಚಮಕೂಕಾ ಖಂಯಿ ನಾಂವೆ ೧೮ ಮಿನಿಟ ರನ್ನಿಂಗ್ ಕೋರ್‍ಕಾ ಖಂಯಿ, ಜಾಂವೊ ೧೬ ಮಿನಿಟ ಪೋವ್ಕಾ ಜಾತ್ತ ಖಂಯಿ, ವಾ ೨೩ ಮಿನಿಟ ಖೇಳ್ಕಾ ಖಂಯಿ ತ್ಯಾ ಕಸ್ಸಲೇ ನಾಕ್ಕ ಮ್ಹಳಯಾರಿ ೩೧ ಮಿನಿಟ ಯೋಗಾ ಕೋರ್‍ಕಾ ಪಡತ ಖಂಯಿ. ಜಾಲಯಾರಿ ಬಾಯ್ಲೆಲೆ ಒಟ್ಟು ವಾದ ಕೆಲಯಾರಿ ಖಾಲಿ ಪಾಂಚ ಮಿನಿಟಾಂತು ೨೦೦ ಕ್ಯಾಲರಿ ಖರ್ಚುನು ವತ್ತ ಖಂಯಿ. ಮಸ್ತ ಚೆಲಿಯಾ ಚರಡುವಾಂಕ ಲಗ್ನಾ ಪಯಲೆ ತಾಂಗೆಲಿ ಅವಯಿ ದುಸರ್‍ಯಾ ಘರ್‍ಕಡೆ ವತ್ತಲಿ ಥಂಯಿ ಕಸ್ಸಲೆ ಕಿ ಕಿತ್ಕಿ ಮ್ಹೊಣು ಬಸೋನು ವೇಳವೇಳಾಕ ಜಾಯಿ ಮಳೀಲೆ ಸಕ್ಕಡ ಸಿಜ್ಜೊನು, ಬಾಜ್ಜೊನು ಘಾಲ್ತಾ. ತ್ಯಾ ಖಾತ್ತಿರಿ ವ್ಹರಡಿಕೆ ವೇಳ್ಯಾಂತು ತಾನ್ನಿ ಸಾನ ಹಸ್ತಿ ಪಿಲ್ಲಾವರಿಕಿ, ಡ್ರಮ್ಮಾವರಿ ಜಾವನು ಆಸತಾತಿ. ವ್ಹರಡಿಕೆ ನಂತರ ಖರ್ಚೂ ಕರನಾಶಿ ಬಾಮ್ಣಾ ಬರಶಿ ಜಗಡ್ತಾ ಜಗಡ್ತಾ ಚೆಲಿಯಾ ಚರಡುಂವ ಆಪಲೆ ಚರಬಿ ಕಮ್ಮಿ ಕೊರನು ಘೆತ್ತ ಕಿತ್ಕಿ ನ್ಹಂಹಿವೇ?