ಭಾರತಾಂತು 'ಕೊರಕಾ' ಆನಿ 'ಕೆಲ್ಲಿಲೆ' ಮ್ಹಣಚಾಂತು ಗೊಂದೊಳು ಕಿತಯಾಕ?

ಮ್ಹಡೆ ಭರಿಲೆ ವರಿ ವಜನ ಆಸ್ಸುಚೆ ಬ್ಯಾಗ ಖಾಂದೆಕ ಲಾಂಬೊನು ಘೆವನು ಬಸ್ ಚುಕ್ಕೂನು ವತ್ತಲೆ ಮ್ಹಣಚೆ ಆತಂಕಕಾನಿ ಧಾಂವಚೆ ಏಕಳೋ ಮನುಷಾಕ ಆಪಲೆ ಸೊಯರ್‍ಯಾನಿ, ದೋಸ್ತಾನಿ ನಾಂವೆ ಆಪಲೆ ಬರಶಿ ಜೊಡಚೆ ಸಹದ್ಯೋಗಿನಿ ಸ್ವಂತ ಕಾರಾರಿ ಫಿರಚೆ ಪಳಯತಾನ ಮನಾಂತು ಬೇಜಾರ ದಿಸ್ಸನಾಂವೆ. ಆಪಣಾ ಲಾಗ್ಗಿ ತಸ್ಸಲೇಚಿ ಏಕ ಸ್ವಂತ ಕಾರ ಆಸಲೇರಿ ಅಸ್ಸಾಲೆ ಕಷ್ಟ ನಾಶಿ ‘ಜುಮ್ ಮ್ಹೊಣು ಜಾಯಿ ಜಾಲೀಲೆ ಕಡೇನ, ಜಾಯಿ ಜಾಲೀಲೆ ತೆದ್ನಾ ಭೊವಯೇತ ಮ್ಹೊಣು ದೀಸನಾಶಿ ಆಸ್ಸನಾ. ಕಶ್ಶೀ ಜಾಂವೊ ಆನೇಕ ಸ ಮ್ಹಹಿನ್ಯಾ ಭಿತ್ತರಿಕಿ, ನಾಂವೆ ಏಕ ವರಸಾ ಭಿತ್ತರಿ ಪೂಣಿ ಏಕ ಕಾರ ಘೇವ್ನೂ ಘೆವ್ಕಾ ಮ್ಹಣಚೆ ತ್ಯಾ ಘಡೇಂತೂ ತೊಂ ಠರಾವ ಕೊರನು ಸೊಡಚಾಕ ಪುರೊ. ಜಾಲಯಾರಿ ಅವಯಿಲೆ ಕಾಯ್ಲೇನ ಜಾಂವೊ ಆಪಲೆ ಸರಾಯಿ ಪಿವಚೆ ಚಟಾನಿ ವರ್ಷ, ದೋನ ವರ್ಷ ಘೆಲಯಾರೀಚಿ ತಾಗೆಲೆ ಸ್ವಂತ ಕಾರ ಘೆವಚೆ ಆಶಾ ಪೂರ್ತಿ ಜಾಯನಾಶಿ ಉರಚಾಕ ಪುರೊ. ತೆದನಾ ತೊಂ ಕಾರ ಘೆವಚಾಕ ಆನಿ ಸ ಮ್ಹಹಿನ್ಯಾಚೆ ಅನ್ನೇಕ ಮೂರ್ತು ದವರೂನು ಘೆತ್ತಾ. ಮಸ್ತ ಲೋಕಾಲೆ ಜೀವನಾಂತು ಗುರಿಕ ವಚ್ಚುನು ಪಾವಚೆ ನಿಚ್ಚಯು ಆಸಲೇರಿಚಿ ನಾನಾ ತಾಪತ್ರಯ ಕಾರಣಾನಿ ಪರ್‍ಪರತ ಗುರಿಕ ವಚೂನು ಪಾವಚೆ ದಿವಸು ಮುಖಾರ್‍ಸುನು ವಚ್ಚೆಂತೂಚಿ ಸಗಳೆ ಜೀವನ ಸರ್ನು ಸೊಡ್ತಾ. 

ನಾ ತಾಣೆ ಖಂಚತರಿ ಕಷ್ಟ ಪೋಡ್ನು ಆಪಲೆ ಆಶಾ ಪೂರ್ತಿ ಕೊರನು ಘೆತ್ಲೆ ಮ್ಹೊಣು ಸಮಜಿಯಾ. ತೆದ್ದನಾ ಸಮಾಜಾಂತು ತಾಗೆಲೆ ಪ್ರತಿಷ್ಠಾ ಚ್ಹಡ ಜಾವಚೆ ಬರಶಿ ಆಪಲೆ ಇಚ್ಛಾ ಪ್ರಮಾಣೆ ತಾಣೆ ನಿರಾಳತೇನಿ ಆಸ್ಸುಚಾಕ ವರೇನ ಸಾಧ್ಯ ಆಸ್ಸಾ.Make in India V/s Made in India ಹೇ ದೊನ್ನೀ ಮಧ್ಯೆ ಆಸ್ಸುಚೆ ಫರಕ ಏಕ ಮನುಷಾಲೆ ಕಾರ ಘೆವಚೆ ಇಚ್ಛಾ ಆನಿ ಕಾರ ಘೆತ್ಲೆ ನಂತರಾಚೆ ಪರಿಸ್ಥಿತಿಕ ಸಮ್ಮ ಮ್ಹಣಯೇತ.

Make in India ಮ್ಹಳಯಾರಿ ‘ಇಂಡಿಯಾಂತೂಚಿ ಕರಾ ಮ್ಹೊಣು ಅಪೋವ್ಣಿ ದಿವಚೆ. ಕಿತ್ತುಲೆ ಲೋಕ ಹೇ ಆಪೋವ್ಣಿ ಘೆತ್ತಾತಿಕಿ ನಾಂಕಿ ಗೊತ್ತನಾ. ಕಿತಯಾಕ ಮ್ಹಳಯಾರಿ ಭಾರತಾಚೆ ಶಿಕ್ಷಣ ವ್ಯವಸ್ಥಾ ‘ವೈಟ್ ಕಾಲರ್ ನೌಕರಿಕ ಸಮ್ಮ ಜಾವನು ಬ್ರಿಟಿಷಾನಿ ಜಾರಿಕ ಹಾಡಿಲೆ ಆಸ್ಸುನು ಹಾಂತು ಮನುಷಾಲೆ ಪ್ರತಿಭಾ, ಪರಿಶ್ರಮ, ಕೌಶಲ್ಯ ಪಶಿ ತಾಣೆ ಅಂತಿಮ ಪರೀಕ್ಷೆಂತು ಘೆವಚೆ ಮಾರ್ಕ್ಸ್ ಹಾಕ್ಕಾಚಿ ಮ್ಹೊಲ ಚ್ಹಡ ದಿತ್ತಾತಿ. ಆಮ್ಗೆಲೆ ಮೀಡಿಯಾಚೆಂ(ಟಿ.ವಿ., ನ್ಯೂಸ್ ಪೇಪರ್) ವರೇನ ಶಂಬರಿಕ ಶಂಬರ ಅಂಕ ಘೆತ್ತಿಲ್ಯಾಲೆ ಫೋಟೊ ದೈನಿಕಾಚೆ ಮುಖಪುಟಾಂತೂ ಛಾಪೂನು ತ್ಯಾಂಚಿ ವ್ಹಡ ಸಾಧನಾ ಮ್ಹಣಚ ವರಿ ದಾಖಯತಾತಿ. ಜಾಲಯಾರಿ ಇತಿಹಾಸಾಚೆ ನಾಂವೆ ತಾಜ್ಜ ಪಶಿ ಮಾಕಸೀಚೆ ಸಕ್ಕಡ ನಾಮ ಕಮಯಿಲೆ ನಾಮಾಧಿಕ ಮನುಷಾಲೆ ಯಶಾಚೆ ಕಾರಣ ಪಳೆಯಿಲ ತೆದ್ದನಾ ತಾನ್ನಿ ಪರೀಕ್ಷೆಂತು ಮೆಳಿಲೆ ಅಂಕಾ ನಿಮಿತ್ಯ ನಾಮಾಧಿಕ ಜಾಲೀಲೆ ನಾಂತಿ. ಬದಲಾಕ ಆಪಲೆ ಪ್ರತಿಭಾ, ಪರಿಶ್ರಮ, ಸಾಧನೇನ ನಾಂವ ಆನಿ ದುಡ್ಡು, ಆಸ್ತಿ ಕಮಯಿಲೆ ಮ್ಹೊಣು ಕೋಳ್ನು ಎತ್ತಾ. ತಾಗೆಲೆ ಸಾಧನೆಚೆ, ಯಶಾಚೆ ಫಲಿತಾಂಶಚಿ Made in India

Make in India ಮ್ಹಣಚೆ ಕೊರಕಾ ಮ್ಹಣಚೆ ಇಚ್ಛಾ ಜಾಂವೊ ಆಪೋವ್ಣಿ ಜಾಲಯಾರಿ Made in India ಮ್ಹಳಯಾರಿ ಪಾವ್ವಿಲೊ ಯಶಾಚೊ ಸಂಕೇತ ಮ್ಹೊಣು ಸಮಜೂನು ಘೆವ್ಯೇತ. ‘ಮೇಡ್ ಇನ್ ಇಂಡಿಯಾ ಮ್ಹೊಣು ಖಂಚೇ ಏಕ ಪದಾರ್ಥ ಭಾರತಾ ಭಿತ್ತರೀಚಿ ತಯಾರ ಜಾಲಯಾರಿ ಹಾಂಗಾ ಲೋಕಾಂಕ ಉದ್ಯೋಗ ಮೆಳ್ತಾ. ತಾಕ್ಕಾ ಜಾವಕಾ ಜಾಲೀಲೆ ಕಚ್ಚಾ ಪದಾರ್ಥ ಹಾಂಗಾಚಿ ಮೆಳಯಾರಿ ಆನಿ ಇತ್ಲೆ ಉದ್ಯೋಗಾವಕಾಶ ಸೃಷ್ಠಿ ಜಾತ್ತಾತಿ. ದುಸರೆ ದೇಶಾ ತಾಕೂನು ಹಾಡಚೆ ಖರ್ಚು ಉರತಾ. ತ್ಯಾ ಪದಾರ್ಥಾಕ ಅನ್ಯ ದೇಶಾಕ ದಿವಚೆ ತೀರ್ವೋ(ಟ್ಯಾಕ್ಸ) ವರೇನ ವ್ಹರತಾ. ವಾಪರಚೆ ಪ್ರದೇಶಾಚೆ ಲಾಗ್ಗೀಚಿ ತ್ಯಾ ಪದಾರ್ಥ ತಯ್ಯಾರ ಕೆಲಯಾರಿ ಏಕ್ಕಡೆ ತಾಕೂನು ಆನ್ನೇಕ್ಕಡೆ ವ್ಹರಚಾಕ ಲಾಗಚೆ ಖರ್ಚು, ವೇಳು ಸಹಿತ ಕಮ್ಮಿ ಜಾತ್ತಾ. ತೆದ್ದನಾ ಕಮ್ಮಿ ಮ್ಹೊಲ್ಲಾಂತು ವಿಕಚಾಕ ಸಾಧ್ಯ ಆಸ್ಸಾ. ತೆದನಾ ತ್ಯಾ ಪದಾರ್ಥ ಚ್ಹಡ ಲೋಕಾನಿ ಘೆವಚಾಕ ಜಾತ್ತಾ. ಹಾಜೇನ ಸರಕಾರಾಕ ಚ್ಹಡ ಚ್ಹಡ ತೀರ್ವೋ ಮೆಳತಾ. ತೆದ್ನಾ ದೇಶ ಅಭಿವೃದ್ಧಿ ಪಾವಚೆ ವೇಗ ವೃದ್ಧಿ ಜಾತ್ತಾ. ಭಾರತ ಜನಸಂಖ್ಯಾಂತು ಜಗಾಂತೂ ದುಸರೇ ಸ್ಥಾನಾಂತು ಆಸ್ಸ. ಚ್ಹಡ ಚ್ಹಡ ಕೈಗಾರಿಕಾ ಆರಂಭ ಜಾವನು ಹೇ ದೇಶಾಂತೂ ಚ್ಹಡ ಚ್ಹಡ ಉದ್ಯೋಗ ಸೃಷ್ಠಿ ಜಾವಚಾಕ ಲಾಗಲ್ಯಾರಿ ಸಕಡಾಲೆ ಹಾತ್ತಾಂಕ ಸುಲಭಾರಿ ಕಾಮ ಮೆಳತಾ. ನ್ಹಂಹಿಸಿ ದೇಶಾಚೆ ಆರ್ಥಿಕಾಭಿವೃದ್ಧಿ ಚ್ಹಡ ಜಾವಚೆ ನಿಮಿತ್ತ್ಯಾನಿ ಗರೀಬ, ಶೋಷಿತ ಲೋಕಾಂಕ ಮುಖಾರ ಹಾಡಚಾಕ, ದೇಶವಾಸಿಲೆ ಆರೋಗ್ಯ ರಾಕವಣಾಕ ದುಡ್ಡು ಖರ್ಚುಚೆ ತಾಕತ್ತ ಸರಕಾರಾಕ ಎತ್ತಾ. 

ಅಶ್ಶಿ Make in India V/s Made in India ಮ್ಹಣಚೆ ಏಕ್ಕಾಕ ಏಕ ವಿರೋಧಿ ನ್ಹಂಹಿ. ಪರಸ್ಪರ ಪೂರಕ ಮ್ಹಣಯೇತ. ಪಯಲೇಕ ಆಪಣೇನಿ ಕೊರಕಾ ಮ್ಹಣಚೆ ಇಚ್ಛಾ ಎವಕಾ. ತ್ಯಾ ಖಾತ್ತಿರಿ ದುಸರ್‍ಯಾನ ಒತ್ತಾಯು ಕೊರಕಾ ಪಡತಾ. ಇಚ್ಛಾ ಕೆಲಯಾರಿ ಮೆಳಚೆ ಸೌಲಭ್ಯ ಖಂಚೆ ಮ್ಹೊಣು ಕೊಳೋಕಾ ಪಡಲೆ. ತಾಜ ಖಾತ್ತಿರಿ ಮೇಕ್ ಇನ್ ಇಂಡಿಯಾ (ಭಾರತಾಂತೂ ಕೊರಯಾ) ಮ್ಹಣಚೆ ಆಪೋವ್ಣಿ ದಿವಕಾ ಪಡಲೆ. ತಾಜೆನ ದೇಶಪ್ರೇಮು ವಾಡಲೆ. ಯುವಕಾರಾಂಕ ಆಪಣಾನಿ ಖಾಂಯಪೂಣಿ ಕೊರಕಾ ಮ್ಹಣಚೆ ಉಮೇದ ಆಯಿಲಿ. ಆಪಣಾಕ ಕೊರಚಾಕ ಅವಕಾಶ ವರೇನ ಆಸ್ಸಾ ಮ್ಹಣಚೆ ಕಳ್ಳೆ. ಕೊರಚಾಕ ಸರಕಾರ, ಬ್ಯಾಂಕಾ ತಾಕೂನು ಸೌಲಭ್ಯ ಮೆಳತಾ ಮ್ಹಣಚೇಯಿ ಕಳ್ಳೆ. ತೊಂ ನೌಕರಿಚಿ ಜಾವಕಾ ಮ್ಹೊಣು ಬೈಸನಾಶಿ ಉದ್ಯಮ, ಕೈಗಾರಿಕಾ ಕೊರಚಾಕ ಮುಖಾರ ಆಯಲೊ. ಸ್ವಂತಕಿ, ಬ್ಯಾಂಕಾಚಾನ ದುಡ್ಡು ಹಾಡ್ನು ಉದ್ಯಮ ಕೊರಚಾಕ ದೆಂವಲೊ. ದುಸರ್‍ಯಾಂಕ ಉದ್ಯೋಗ ದಿವಚಾಕ ಶಕಲೊ. ನಮ್‌ನಮೂನೆ ಪದಾರ್ಥ ಹಾಂಗಾಚಿ ತಯಾರ ಜಾವನು ಸುಲಭಾನಿ ಲೋಕಾಂಕ ಮೆಳಚಾಕ ಲಾಗಲೆ. ದೇಶಾಚೆ ಸಂಪತ್ತ ವಾಡಲೆ. ಶಿಕ್ಕಿಲ್ಯಾಂಕ ಹಾತ್ಬರಿ ಕಾಮ ಮೆಳ್ಳೆ. ತ್ಯಾಂಚಿ Made in India  

ಇಂಡಿಯಾಂತು ಪಂದ್ರಾ ಜಾಂವೊ ತಾಜ್ಜ ಪಶಿ ಕಮ್ಮಿ ವಯಾಚೆ ಚರಡುವಾಂಲೆ ಸರಾಸರಿ ಅಂಕಡೊ ೩೩% ಟಕ್ಕೆ ಜಾಲಯಾರಿ ತಾಜ ನಂತವಯಲೆ ೧೬ ತಾಕೂನು ೬೦ ವರ್ಷ ಭಿತವಯಲೆ ಜೊಡಚೆ ತಾಕತ್ತ ಆಸ್ಸುಚೆ ಲೋಕ ೬೦ % ಟಕ್ಕೆ ಆಸ್ಸಾತಿ. ಒಟ್ಟು ಲೋಕಾಂಗೆಲೆ ಅಂಕಡೆಂತು ೧೬ ತಾಕೂನು ೩೦ ಭಿತ್ತವಯಲೆ ಯುವಕಾರ ೨೮% ಆಸ್ಸತಿ. ಜಾಲಯಾರಿ ಕೇಂದ್ರ ಆನಿ ಸಕ್ಕಡ ರಾಜ್ಯ ಸರಕಾರ, ಸಾರ್ವಜನಿಕ ಕ್ಷೇತ್ರ ಮೇಳ್ನು ದೇಶಾಂತು ಆಸ್ಸುಚೆ ಸರಕಾರಿ ನೌಕರಸ್ಥಾಲೆ ಅಂಕಡೋ ಅಡ್ಡೇಸ ಕೋಟಿ ಮಾತ್ರ. ಪ್ರತಿ ವರಸ ದೇಶಾದ್ಯಂತ ಕೋಟಿಗಟ್ಲೆ ಯುವಕಾರ ಆಪಲೆ ಶಿಕ್ಷಣ ಪೂರ್ಣ ಕೊರನು ಇಸ್ಕೂಲ್, ಕಾಲೇಜಾಚಾನ ಭಾಯರಿ ಎತ್ತಾ ಉರತಾತಿ. ತಿತ್ಲೆ ಅಗಾಧ ಅಂಕಡೆಚೊ ಯುವಕಾರಾಂಕ ನೌಕರಿ ಮೆಳಚೆ ವರಿ ಕೊರಕಾ ಮ್ಹಳಯಾರಿ ತ್ಯಾ ಸರಕಾರಾ ಏಕ್ಕಾ ತಾಕೂನು ಜಾವಚೆ ಕಾಮ ನ್ಹಂಹಿ. ತಶ್ಶಿ ಶಿಕ್ಷಣ ಪೂರ್ತಿ ಕೊರನು ಭಾಯರ ಯವಚೆ ಯುವಕಾರಾಂತು ಏಕ ನ್ಹಂಹಿ ಏಕ ಪ್ರತಿಭಾ ಖಂಡಿತಾ ಆಸ್ಸೂನು ಆಸ್ತಾ. ತ್ಯಾ ಪ್ರತಿಭೆಕ ಸಮ್ಮ ಜಾಲೀಲೆ ಉದ್ಯಮ ತಾನ್ನಿ ಸ್ಥಾಪನ ಕೆಲಯಾರಿ ತಾಂಗೆಲೆ ನೌಕರಿಚೆ ಸಮಸ್ಯಾ ಮಾತ್ರ ನ್ಹಂಹಿ ದುಸರೆ ಸಾತಾಠ ಲೋಕಾಂಕ ತಾಂಗೆಲೆ ಉದ್ಯಮಾಂತು ನೌಕರಿ ಮೆಳಯಾರಿಚಿ ತ್ಯಾ ದೇಶಾಚೆ ಉದರ್ಗತಿಕ ಮಸ್ತ ಮದತ್ ಕರ್ತಾ. ಪ್ರತಿ ವರ್ಷ ಏಕ ಲಾಕ್ ಲೋಕಾನಿ ನವೀನ ಉದ್ಯಮ ವಾ ವ್ಯಾಪಾರ ಕೊರಚಾಕ ಧೇಂವನು ಏಕ ನಾ ದೇಡ ಕೋಟಿ ದುಸರೇ ಯುವಕಾರಾಂಕ ಉದ್ಯೋಗ ದಿವಚೆ ವರಿ ಜಾಲಯಾರಿ ತೆದ್ದನಾ ದೇಶಾಂತು ನಿರುದ್ಯೋಗ ಸಮಸ್ಯಾ ಊಣೆ ಜಾತ್ತಾ ವತ್ತಾ. ದೇಶಾಚೆ ಸಂಪತ್ ವಾಡತಾ ವತ್ತಾ. ಭಯೋತ್ಪಾದನಾ, ಕಾಂಪಚೆ, ಖೂನಿ ಕೊರಚೆ, ದರೋಡೆ ಇತ್ಯಾದಿ ಸಮಾಜ ವಿರೋಧಿ ಕೃತ್ಯವರೇನ ಕಮ್ಮಿ ಜಾತ್ತಾ. ಲೋಕಾಂಗೆಲೆ ಗರೀಬ ಪಣ ಕ್ಷೀಣ ಜಾತ್ತಾ. ತಾಜೇನ ಲೋಕಾನಿ ಶಾಂತಿ ಸಮಾಧಾನಾಂತು ವಾಂಚಚಾಕ ವರೇನ ಸಾಧ್ಯ ಜಾತ್ತಾ. ಆಮ್ಗೆಲೆ ದೇಶಾಕ ಪರಕೀಯಾನಿ ಪಾಯ ದವರಚೆ ಪಶಿ ಪಯಲೆ ಸಗಳೆ ಜಗಾಂತೂಚಿ ಭಾರತ ವ್ಹಡ ವಾಣಿಜ್ಯ ರಾಷ್ಟ್ರ ಜಾವ್ನು ಆಶ್ಶಿಲೆ ಕಂಯಿ. ಜಗಾಚೆ ಒಟ್ಟು ವಾಣಿಜ್ಯ ಚಟುವಟಿಕೆಂತು ಪನ್ನಾsssssಸ (೫೦%) ಟಕ್ಕೆ ಪಶಿ ಚ್ಹಡ ಚಟುವಟಿಕಾ ಭಾರತಾಚೆ ಜಾವ್ನಾಶ್ಶಿಲ ಕಂಯಿ. ಆಜಿ ತ್ಯಾ ಪಾಂಚ ಟಕ್ಕೆ(೫%) ಪಶಿ ಕಮ್ಮಿ ಜಾಲ್ಲ್ಯಾ ಮ್ಹಳಯಾರಿ ಗತ ಇತಿಹಾಸ ಪರತ ಹಾಡಚಾಕ ಆಯಚೆ ಯುವಕಾರಾನಿ ಆಪಲೆ ಯೋಗದಾನ ದಿವಚೆ ನಾಕ್ಕವೇ? ತ್ಯಾ ಕಾರಣಾನಿ Make in India V/s Made in India ಮ್ಹಣಚೆ ಕೇವಲ ಘೋಷಣ ಜಾವನು ಉರಚೆ ವರಿ ಜಾವಚಾಕ ನಜ್ಜ. ಕಾರ್ಯ ರೂಪಾಕ ಯವ್ನು ತಾಜ್ಜೆ ನಿಮಿತ್ತಿ ದೇಶ ಆನಿ ಹಾಂಗಾಚೆ ಲೋಕಾನಿ ಉದರ್ಗತಿ ಪಾವಲಾರಿ ದೇಶ ಪರತ ಸಂಪತ್ಬರಿತ ಜಾವಚಾಂತು ಅನ್ಮಾನು ನಾ. 

Make in India V/s Made in India ಹೇ ದೊನ್ನೀ ಮಧೇಚೆ ಪೂರಕತ್ವ ಕಳೀತಾಕ ಹಾಡ್ನು ಘೇವ್ನು ಹರ್‍ಯೇಕ ಯುವಕಾರಾನಿ ಆಪಲೆ ಪ್ರತಿಭಾ ಫುಲೋನು ದೇಶಾಚೆ ಉದರ್ಗತಿಕ ಯೋಗದಾನ ದಿವಚೆ ಗರಜ ಆಸ್ಸಾ.

- ಆರಗೋಡು ಸುರೇಶ ಶೆಣೈ