ಪರೀಕ್ಷಾ ಭೂತು (Part - 1)

ಕನ್ಯಾ ಪರೀಕ್ಷೆಕ ತಯಾರ ಜಾಲ್ಲೆಲಿ ಚೆಲ್ಲಿಯಾಕ ‘ಭಯಿ’ ದಿಸ್ತವೇ? ಮ್ಹೊಣು ವಿಚಾರ್‍ಲೇರಿ ತೀ ಖಂಡಿತ ನಾ ಮ್ಹಣಾ. ತಶ್ಶಿಚಿ ಪರೀಕ್ಷೇಕ ಬಾಯ್ರಿಸರ್ಲಿಲೆ ವಿದ್ಯಾರ್ಥ್ಯಾಂಕ ತಮ್ಕಾ ‘ಪರೀಕ್ಷಾ ಭಯಿ ಆಸ್ಸವೇ?’ ಮ್ಹಳ್ಯಾರಿ ಖಂಡಿತ ತಾನ್ನಿ ‘ನಾ’ ಮ್ಹಣಾಂತಿ. ಕಿತ್ಲೇ ವಾಜ್ಜೂನು ಆಸ್ಸೊಂಚಿ, ಹರ್‍ಯೇಕ ಪ್ರಶ್ನೇಕ ಸಮರ್ಪಕ ಜವಾಬ ಗೊತ್ತಾಶ್ಲೀರಿ ‘ಪರೀಕ್ಷಾ ಭೂತು’ ಯವ್ನು ಎದ್ರಾಕ ರಾಬ್ಬಿಲೆ ತೆದ್ದನಾ ಭೀನಾಶ್ಶಿಲೊ ಧೈರ್ಯಶಾಲಿ ಮಸ್ತ ಊಣೆ ಮ್ಹಣ್ಕಾ. ಜಾಲ್ಯಾರಿ ತಶ್ಶಿ ಭಿತ್ತಲ್ಯಾಂಕ ಗೊತ್ನಾ ‘ಪರೀಕ್ಷೇಕ ಭಿವ್ಚೆ ತಾಕೂನು ವಿದ್ಯಾರ್ಥಿ ಆನ್ನಿಕೆ ನರ್ವಸ ಜಾವ್ನು ಗೊತ್ತಾಶ್ಶಿಲೆ ವಿಸೋರ್ನು ಎತ್ತಾ’ ಮ್ಹಣ್ಚೆ. ಭಯಿ ಮನುಷ್ಯಾಲೆ ಆತ್ಮವಿಶ್ವಾಸು ನಷ್ಟ ಕೋರ್ನು, ಕಶ್ಶಿ ತಾಗ್ಗೆಲೆ ವಾಟ ಚುಕ್ಕೇತಾ ಮ್ಹಣಚಾಕ ಹ್ಯಾ ಉದಾಹರಣ ವಾಜ್ಜೀಯಾ.

ಮೆಗೆಲೊ ದೋಸ್ತೆಕ್ಲೊ ಆಶ್ಶಿಲೊ. ದಿನೇಶ ಮ್ಹೊಣು. ಮಸ್ತ ಕಾಳಾಚೆ ಹರ್‍ಕೆ ಫಲಕೀ! ಜಾಂವೊ ತಾಗ್ಗೆಲೆ ಋಣಾನುಬಂಧಕೀ ಅಂತೂ ತಾಕ್ಕೇಕ ಚಲ್ಯಾ ಚರಡ ಜಾಲ್ಲ್ಲಾ ಮ್ಹೊಣು ಬಾಳಾಂತಿರೇಕ ಕೂಳಾರ ಘೆಲ್ಲಿಲೆ ಬಾಯ್ಲೆ ಬಾಂವಾ ತಾಕೂನು ಪೋನ್ ಆಯ್ಲೆ. “ಸುಮಕ್ಕ ಇಕ್ರಾಕ ಬಾಳಾಂತಿ ಜಾಲ್ಯಾ, ಚಲ್ಯಾ ಚರಡ..” ಮ್ಹೊಣು. “ಹೋಯ್ವೆ ತಶ್ಶಿ ಜಾಲ್ಯಾರಿ ಹಾಂವ ಸದ್ಯಾಕ ಬಾಯ್ರಿಸೋರ್ನು ಎತ್ತಾ. ಉರಿಲೆ ವಿಷಯು ತೈಚಿ ಉಲ್ಲೋವ್ಯಾ” ಮ್ಹಳ್ಳಿಲೋಚಿ ರೀಸಿವರ್ ದವೋರ್ನು ಸೀದಾ ಗುರ್‍ತಾಶ್ಶಿಲೆ ಭಟ್‌ಮಾಮ್ಮಾ ಲಾಗ್ಗಿ ವಚ್ಚೂನು “ಚರ್‍ಡಾನ ಜಾಲ್ಲೆಲೆ ಘಡಿ ಕಶ್ಶಿ ಆಸ್ಸ ಪೋಳೊನು ಸಾಂಗಾ” ಮ್ಹಣ್ತಾ. 

ಭಟ್‌ಮಾಮು “ಬಾಳಾಂತಿ ಜಾಲ್ಲೆಲಿ ಕಿತ್ವೇಳಾಕ? ರಾತ್ತಿಚೆ ಇಕ್ರಾಕಕೀ, ದೀಸಾಚೆ ಇಕ್ರಾಕ?” ಮ್ಹಣ್ತಾ. ಆತ್ತ ಮೆಗೆಲೊ ದೋಸ್ತು ಗೊಂದೊಳಾಕ ಪಡ್ತಾ. ತ್ಯಾ ತಾಣೆ ತಾಗ್ಗೆಲೆ ಮೆವ್ಣೆಲಾಗ್ಗಿ ನಿಮ್ಗಿನಿ. “ಜಾಲ್ಯಾರಿ ತಾಣೆ ಪೋನ್ ಕೆಲ್ಲೆಲೆ ಧಂಪಾರಾ ಸಾಡಿ‌ಇಕ್ರಾಕ ನ್ಹಯ್ವೆ? ಮ್ಹಳ್ಯಾರಿ ತ್ಯಾ ದಿವ್ಸಾಚೆ ಇಕ್ರಾ ಆಸ್ಸೂಕಾ” ಮ್ಹೊಣು ಠರೋನು ‘ದೀಸಾಚೆ ಇಕ್ರಾ’ ಮ್ಹಣ್ತಾ. ಪಂಚಾಂಗ ಕಾಣು ಗುಣಾಕಾರ, ಭಾಗಾಕಾರ ಕೆಲ್ಲಿಲೊ ಭಟ್‌ಮಾಮು “ಪಳೇ ಹಾಂವ ಅಶ್ಶಿ ಸಾಂಗ್ತಾ ಆಸ್ಸ ಮ್ಹೊಣು ಬೇಜಾರ್‍ನಾಕ್ಕಾ. ಹ್ಯಾ ಘಡೇಂತು ತುಕ್ಕಾ ಚರಡ ಜಾಯ್ನಾಶಿ ಆಸಲೇರಿ ಚಾಂಗಾಶ್ಶಿಲೆ. ತೂಂವೆ ಮೂಕಾರಿ ಮಸ್ತ ಅರಿಷ್ಟ ಫಲ ಭೊಗ್ಚೆ ಆಸ್ಸ” ಮ್ಹಣ್ತಾ. ಸೂರ ಜಾಲ್ಮೂ ದಿನೇಶಾ ಮನಾಂತು ಪೀಕಲಾಟ. ಸಧ್ಯಾ ಬಾಯ್ರಿಸೋರ್ನು ಯತ್ತ ಮ್ಹಳ್ಳಿಲೊ ಚರ್‍ಡಾಕ ಪಳೈಚಾಕ ವಚ್ಚೆ ಖೈದು ಕರ್ತಾ. ಜಾಲ್ಯಾರಿಚಿ ಹರ್ದೆಂತು ಡವ ಡವ. ಅರಿಷ್ಟ ಕಂಚೆ ನಮೂನ್ಯಾನ ಯವ್ನು ಗಾಂಟಿ ಪಡ್ತಕಿ ಮ್ಹೊಣು!

ರಾತಿ ಸಗಳೆ ನೀದ ನಾಶಿ ಕಾಡ್ತಾ. ಸಕ್ಕಾಣಿಫೂಡೆ ಹಗೂರ ದೋಳೆ ಬಾವ್ತಾ ಮ್ಹಣತಾನಾ ಭಯಂಕರ ವಾಯ್ಟ ವಾಯ್ಟ ಸಪನ! ಸಕ್ಕಾಣಿ ಉಟ್ಟೆತಾನಾ ಮಾತ್ತೆ ದೂಕಿ, ಆಂಗಾ ದೂಕಿ, ತಾಪು..!! ಅಯ್ಯೋ ಕಸ್ಸಲ್ಕಿ ಗ್ರಾಚಾರು ಗಾಂಟಿ ಪೋಣು ಸೊಳ್ಳೆ ಮ್ಹೊಣು ಡಾಕ್ಟ್ರಾಲಾಗ್ಗಿ ವಚ್ಚೂನು ವಾಕ್ಕದ ಹಾಳ್ಳೆ. ದೋನಿ ಆಠ್ವಡೆ ಜಾಲ್ಯಾರಿಚಿ ತಾಪು, ಮಾತ್ತೆ ದೂಕಿ ದೆವಚಾಕ ತಯಾರ ನಾ. ತಿತ್ಲೆ ಬಿತ್ತೆರಿ ಏಕ್ಕೇಕ್ಲಿ ಏಕ್ಕೇಕ ನಮೂನೋ ಜಾಂಕಚಾಕ ಲಾಗಲೆ. ಕೆಲವ ಜನ “ಏಡ್ಸ ಆಸ್ಸುಕ ಪುರೋ” ಮ್ಹಳ್ಯಾರಿ, ಆನಿ ಕೆಲವ ಲೋಕ “ಟೈಪಯಿಡ್‌ಕಿ, ಕ್ಯಾನ್ಸರ್ ಆಸ್ಸುಕ ಪುರೋ. ಡಾಕ್ಟ್ರಾಕ ಬದಲ ಕೋರ್ನು ಪಳೆಂ” ಮ್ಹಣತಾತಿ. ದಿನೇಶಾನ ಡಾಕ್ಟ್ರಾ ಶಾಪಾಕ ಬೊವ್ವಿಲೆ ಬೊವ್ವಿಲೆ. ಮಾತ್ರಿ, ವಾಕ್ಕದ ಮ್ಹೊಣು ಗಿಳ್ಳಿಲೆ ಗಿಳ್ಳಿಲೆ. ಮಾಗಿರಿ ಹಗೂರ ಪೊಟ್ಟಾ ದೂಕಿ ಚಾಲು ಜಾಲ್ಲೆ. ದಿನೇಶು ಆಸ್ಪತ್ರೇಕ ದಾಖಲ ಜಾಲ್ಲೊ. ಡಾಕ್ಟ್ರಾನ ರೋಗ ನಿರ್ಧಾರ ಖಾತ್ತಿರಿ ಸ್ಕಾನಿಂಗ್, ರಕ್ತಾಚೆ, ಮಲ-ಮೂತ್ರಾಚೆ ವಿವಿಂಗಡ ತಪಾಸ ಪೂರಾ ಕರೈಲೆ. ಊಹೂಂ... ಕಂಚೆ ರೋಗು ಆಯಿಲಾ ಮ್ಹೊಣು ಕಳ್ನಿ. ಡಾಕ್ಟ್ರಾನ ಬಿ. ಕಾಂಪ್ಲೆಕ್ಸ್, ಆಂಟಿಬಯೋಟಿಕ್ಸ್ ಮ್ಹೊಣು ವಾಕ್ಕದ ದೀವ್ನೂ ದಿಲ್ಲೆ. ರೋಗು ಮಾತ್ರ ಗುಣ ಜಾಯ್ನಿ. 

ಏಕ್ದೀವಸು ತಾಗ್ಗೆಲೆ ಮಾಂವು(ಬಾಯ್ಲೇಲೆ ಆನೂ) ಆನಿ ತಾಕ್ಕಾ ಚರ್‍ಡಾ ತಾಕೂನು ಅರಿಷ್ಟ ಫಲ ಮ್ಹೊಣು ಸಾಂಗಿಲೆ ಭಟ್‌ಮಾಮು ದವಾಖಾನೇಕ ಯತ್ತಾತಿ. ಭಟ್‌ಮಾಮ್ಮಾಕ ಪಳೈಚೆ ಬಿತ್ತೆರಿ ಗೋಳೊ ಮ್ಹೊಣು ರಡ್ತಾ ದಿನೇಶು ಮ್ಹಣ್ತಾ. “ಭಟ್‌ಮಾಮ್ ತುಮ್ಮಿ ಸಾಂಗಿಲ್ವರಿ ಜಾಲ್ಲೆ... ಚರ್‍ಡಾಲೆ ಅರಿಷ್ಟ ಫಲಾನ ಹಾಂವೆ ಹಾಂತುಳು ಧೊರ್‍ಚೆವರಿ ಜಾಲ್ಲೆ” ಮ್ಹಣ್ತಾ. ತಾಕ್ಕಾ ಭಟ್ ಮಾಮು “ತುಕ್ಕಾ ಇತ್ಲೆ ಪೂರಾ ಜಾಲ್ಲಿಲೆ ಚರ್‍ಡಾನ ಜಾಲ್ಲಿಲೆ ವಾಯ್ಟ ಘಡ್ಯಾನ ನ್ಹಂಯಿ, ತುಗ್ಗೆಲೆ ಮನಾಚೆ ಭಯ್ಯಾನ, ಭ್ರಾಂತೀನ. ಕಿತ್ತೇಕ ಮ್ಹಳ್ಯಾರಿ ಚರ್‍ಡ ಜನ್ಮಿಲೆ ತೂಂವೆ ಸಾಂಗಿಲ್ವರಿ ದೀಸಾಚೆ ಇಕ್ರಾಕ ನ್ಹಂಯಿ ಕಂಯಿ, ಪುಳ್ದೀಸು ರಾತ್ತಿ ಇಕ್ರಾಕ ಕಂಯಿ” ಮ್ಹಳ್ಳಿ ತೆದ್ನಾ ದಿನೇಶು ಅನ್ಮಾನಾನ ಮಾಂವಾಕ ಪಳೈತಾ. ಕೂಡ್ಲೆ ತೊ “ಹೋಯ್ರೇ ದಿನೇಶಾ ರಾತ್ತಿಚಿ ಸಾಂಕಾ ಮ್ಹೊಣು ಕಿತ್ಲೆ ಪ್ರಯತ್ನ ಕೆಲ್ಯಾರಿಚಿ ಲೈನ ಮೇಳ್ನಿ ಪಳೆ. ಸಕ್ಕಾಣಿಫೂಡೆ ಧಾ ಗಂಟ್ಯಾ ಪರ್‍ಯಂತ ಪ್ರಯತ್ನ ಕೆಲ್ಯಾರಿಚಿ ಲೈನ್ ಮೇಳ್ನಾಶಿ ಹಾಂವ ಡ್ಯೂಟಿಕ ಘೆಲ್ಲೊ, ತುಗ್ಗೆಲಿ ಮಾಯಿ ದೂಂವೆ ಒಟ್ಟು ಆಸ್ಪತ್ರೇಂತು ಆಶ್ಶಿಲಿ. ಮೆಗೆಲೆ ಪುತ್ತಾಕ ತ್ಯಾಸು ಮಾರ್ನಿಂಗ್ ಕಾಲೇಜ ಆಶ್ಶಿಲೆ. ತಾಣೆ ಕಾಲೇಜಾಚಾನ ಯವ್ನು ತುಕ್ಕಾ ಪೋನ ಕೆಲ್ಲಿಲೆ” ಮ್ಹಣ್ತಾ.