ಪರೀಕ್ಷಾ ಭೂತು (Part - 2)

ಕೂಡ್ಲೆ ಉಲ್ಲೋಚಾಕ ಲಾಗ್ಗಿಲೊ ಭಟ್ ಮಾಮು “ಪಳೇ ತುಗ್ಗೆಲೆ ಪುತ್ತಾನ ಜಾಲ್ಲಿಲೆ ಅಮೃತ ಘಡೇಂತು. ಮೂಕಾರಿ ತುಮ್ಕಾ ಕಾಯಿ ಊಣೆ ಜಾಯ್ನಾ... ಭೋರ್ನು ಭೋರ್ನು ಯತ್ತಾ” ಮ್ಹಣ್ತಾ. ಆಶ್ಚರ್ಯ ಮ್ಹಣ್ಚೆವರಿ ಹೆರ್‍ದೀಸಾ ತಾಕ್ಕೂನು ದಿನೇಶು ಆರಾಮ ಜಾವುಕ ಲಾಗ್ತಾ. ತಾಣೆ ಆರಾಮ ಜಾಲ್ಲಿಲೆ ಜೋರು ಪೋಳೋನು ಸಾಕ್ಷಾತ ಡಾಕ್ಟರ್‍ಸ್ ಆಶ್ಚರ್ಯ ಪಾವತಾತಿ. 

ಆತ್ತ ತುಮ್ಮೀ ಸಾಂಗಾ ದಿನೇಶಾಕ ನಾಹುಷಾರ ಜಾಲ್ಲಿಲೆ ತಾಕ್ಕಾ ಚರಡ ಜಾಲ್ಲಿಲೆ ಘಡ್ಯಾನಕಿ ನಾ ತಾಗ್ಗೆಲೆ ಭಯ್ಯಾನಿ? ಹೋಯಿ ಭಯಿ ಸಾಧನಾಶೀಲಾಲೆ ಪ್ರಗತಿಕ ಶತ್ರುಶಿ ದಿಸಲೇರಿ, ಕಿತ್ಲೇಕಿ ಸಂದರ್ಭಾರಿ ಹ್ಯಾಂಚಿ ಭಯಿ ಆಮ್ಗೆಲೊ ರಕವಾಲ ಜಾವ್ನುಯಿ ಕಾಮ ಕರ್ತಾ. ಆಸ್ಸೊ ತ್ಯಾ ವಿಚಾರು ಆನಿ ಕೆದ್ನತರಿ ಸಾಂಗ್ತಾ. ಆಜ್ಜೀಕ ‘ಪರೀಕ್ಷಾ ಭಯ್ಯಾ’ ಖಾತ್ತಿರಿ ಸಾಂಗ್ತಾ.

ಪೂರ್ತಿ ವರ್ಷ ಶಿಕ್ಕಿಲೆ ತೀನ್ಕಿ, ಸಾಡಿ ತೀನಿ ತಾಸಾಂತು ವಿದ್ಯಾರ್ಥಿ ಯೋಗ್ಯತಾ ಮೆಜ್ಜುಚೆ ಆಮ್ಗೆಲೆ ಪರೀಕ್ಷಾ ವ್ಯವಸ್ಥಾ ಸಮ್‌ನ್ಹಯಿ ಜಾಲ್ಯಾರಿಚಿ ಸ್ವಾತಂತ್ರ್ಯಾ ನಂತರ ಆಮ್ಮಿ ತಾಕ್ಕಾಯಿ ಶರಣ ಜಾಲ್ಲಿಂಚಿ. ತಶ್ಶಿ ಜಾಲ್ಯಾರಿ ಪರೀಕ್ಷಾ ಭಯಿ ನಾಶಿ ಕೋರ್ನು ಘೆವುಕ ಕಸ್ಸಲೆ ಕೋರ್‍ಕಾ? 

ಫಯ್ಲೇಚೆ ಜಾವ್ನು ತುಮ್ಮಿ ಏಕ ವಿಷಯು ಸ್ಪಷ್ಟ ಜಾವ್ನು ಮನಾಕ ಹೋರ್‍ಕಾ. ಮಾಸ್ತರಾನಿ ಸಾಂಗಿಲೆ, ಪಠ್ಯಪುಸ್ತಕಾಂತು ಆಶ್ಶಿಲೆ, ಘರ್‍ಚೇನ ಕಳೈಲೆ, ದೋಸ್ತಾ ಒಟ್ಟು ಚರ್ಚೆ ಕೆಲ್ಲೆಲೆ, ವಯೋಸಹಜ ಜಾವ್ನು ತುಮ್ಕಾ ಕೋಳ್ಕಾ ಜಾಲ್ಲೆಲೆ (ರಾಜ್ಯ, ದೇಶಾಂತು ಪ್ರಸಕ್ತ ದಿನಮಾನಾಂತು ಚೊಲ್ಚೆ ವಿದ್ಯಾಮಾನ) ವಿಷಯು. ಹ್ಯಾ ಇತ್ಲೆ ಸೋಣು ದುಸ್ರೆ ಕಸ್ಸಲೇಯಿ ಪರೀಕ್ಷೆಂತು ಯವುಕ ಸಾಧ್ಯ ನಾ. ಆನಿ ಹ್ಯಾ ಪೂರಾ ತುಮ್ಮಿ ತುಮ್ಗೆಲೆ ಪ್ರಾಯಾಂತು ವಯೋಸಹಜ ಜಾವ್ನು ಶಿಕ್ಕಾ ಜಾಲ್ಲೆಲೆ ಜಾವ್ನಾಸ್ಸ. ಬಾಲ್ವಾಡಿ, ಏಕ್ದೋನ್ನಿ ಕ್ಲಾಸಾಂತು ಶಿಕ್ಕಾ ಜಾಲ್ಲೆಲೆ ಅಕ್ಷರಾಭ್ಯಾಸು (ಅ,ಆ,ಇ,ಈ.ಕೀ ಎ.ಬಿ.ಸಿ.ಡಿ) ಧಾಂಚೆ ಕ್ಲಾಸಾಕ ಯವೂ ಪರ್‍ಯಂತ ಶೀಕ್ನಾ ಜಾಲ್ಯಾರಿ ಕಿತ್ಲೆ ಅಳ್ಸಿಕ ನ್ಹಯ್ವೆ? ತಾಜ್ಜ ಖಾತ್ತಿರಿ ಆಜಿ ತುಮ್ಮಿ ಕಸ್ಸಲೆ ಶಿಕ್ಕಾ ಮ್ಹೊಣು ಆಸ್ಸಕೀ ತ್ಯಾ ಶಿಕ್ಕೂನು ಶಿಕ್ತಾ ಮ್ಹೊಣು ಡೃಢನಿರ್ಧಾರ ಘೆಯ್ಯಾ. ಕಿತ್ತೇಕ ಮ್ಹಳ್ಯಾರಿ ತುಮ್ಗೆಲೆ ಮನಾ ತಿತ್ಲೆ ವಿಶ್ವಾಸಾರ್ಹ ದೋಸ್ತು ದುಸ್ರೊ ನಾ. 

ಪ್ರತಿ ವರ್ಷ ಇಸ್ಕೂಲ್, ಕಾಲೇಜ್ ಸೂರ ಜಾಲ್ಲ ಕೂಡ್ಲೆ ತ್ಯಾ ತ್ಯಾ ದಿವಸು ಕೆಲ್ಲೆಲೆ ಪಾಠ, ತ್ಯಾ ದೀಸೂಚಿ ಗಟ್ಟಿ ಕೋರ್ನು ಘೆವ್ಕಾ. ಖಾಲಿ ಕಂಠ ಪಾಠ ಕೊರ್‍ಚೆ ತಿತ್ಲೆ ನ್ಹಯಿ, ಬರೋನು ಗಟ್ಟಿ ಕರಾ. ಆಠ್ವಡೇಕಕೀ, ಪಂದ್ರ ದೀಸಾಕ ಏಕ್ವಳ ಪರತ ರಿವಿಜನ್ ಕೋರ್‍ಕಾ. ತೆದ್ನಾ ಖಂಡಿತ ಪರೀಕ್ಷೆ ವೇಳೆಂತು ಭಿವ್ಚೆ ಪರಿಸ್ಥಿತಿ ಯಾನಾ. ತುಮ್ಗೆಲೆ ದಿನಚರಿಂತು ಕಂಚೆ ಕಾಮ ‘ಫಾಯಿ, ಮಾಗಿರಿ ಕೋರ್‍ಯಾ’ ಮ್ಹೊಣು ಆಸಲೇರಿ ಆಜಿ, ಆತ್ತಚಿ ತ್ಯಾ ದುರ್ಗುಣ ಸೋಣು ಸೋಡಾ. ‘ಆಯ್ಚೆ ಕಾಮ ಆಜಿ ಕೋರ್‍ಕಾ’ ಮ್ಹಣ್ಚೆ ನಿಯಮು ತುಮ್ಕಾ ತುಮ್ಮಿ ಗಾಲ್ನು ಘೆಯ್ಯಾ. ಆನಿ ಜೀವನಾಂತು ತ್ಯಾ ನಿಯಮು ಕಟ್‌ನಿಟ್ ಜಾವ್ನು ಪಾಲನ ಕರಾ. ಹಾಂವೆ ಮಸ್ತ ವಿದ್ಯಾರ್ಥಿನ ಸಾಂಗಿಲೆ ಆಯ್ಕಲಾ. ‘ಹಾಂವೆ ಶಿಕ್ಚೆ ಇತಿಹಾಸ, ಭೂಗೋಳ, ಬೀಜಗಣಿತ, ವಿಜ್ಞಾನಚಾನ ಮೂಕಾರಿ ಮೆಗ್ಗೆಲೆ ಜೀವನಾಕ ಕಾಂಯೀ ಮದ್ದತ್ ನಾಂಮೂ. ಕಿತ್ತೇಕ ಶಿಕ್ಕಾ?’ ಮ್ಹೊಣು. 

ತುಮ್ಗೆಲೆ ತರ್ಕ ಸಮ ಆಶ್ಚಾಕ ಪುರೋ, ಜಾಲ್ಯಾರಿ ಮೂಕಾರ್‍ಚೆ ತುಮ್ಗಲೆ ಶಿಕ್ವಣಾಕ, ಉದ್ಯೋಗಾಕ ಹ್ಯಾ ವಿಷಯಾಚೇರಿ ಕಮಾಯಿಲ್ಲೆ ಅಂಕ ಪೊಳೋನು ತುಮ್ಕಾ ಸೌಲಭ್ಯ, ಚಾಂಗ ನೌಕರಿ ಮೆಳ್ಚೆ ಮ್ಹಣ್ಚೆ ವಿಸೋರ್ನಾಕ್ಕಾತಿ. ತ್ಯಾ ಖಾತ್ತಿರಿ ಆಜಿ ತುಮ್ಮಿ ತ್ಯಾ ವಿಷಯು ಶಿಕ್ಕಾ. ತರ್ನೆಟ ಪ್ರಾಯಾಂತು ಅಪರಿಮಿತ ಉತ್ಸಾಹ ಆಸ್ತಾ. ತ್ಯಾ ತುಮ್ಮಿ ಕಂಚೆ ಕಂಚೇಕಕೀ ವ್ಯರ್ಥ ಕೊರ್‍ಚೆ ಬದಲಾಕ ಶಿಕ್ಚೇಕ ವಾಪರಾ. ತುಮ್ಮಿ ದೀಸ ಸಗಳೆ ವಾಜ್ಜೀತಾ ಬೈಸಾ ಮ್ಹೊಣು ಹಾಂವ ಸಾಂಗ್ನಾ. ಚೂಕ್ನಾಶಿ ದೀಸಾಕ ಏಕ್ದೋನಿ ಗಂಟೊ ತರಿ ಅಭ್ಯಾಸು ಕರಾ. ದೋಸ್ತಾ ಒಟ್ಟೂ ಗ್ರೂಪ್ ಸ್ಟಡಿ ಕೊರ್‍ಯೇತ, ಜಾಲ್ಯಾರಿ ತೇ ಪಟ್ಟಾಂಗ ಕಟ್ಟೆ ಜಾವುಕ ನಜ್ಜ. ತುಮ್ಗೆಲೆ ಪಶಿ ಸಿನೀಯರ್ ವಿದ್ಯಾರ್ಥಿಲೆ ಮಾರ್ಗದರ್ಶನ ತುಮ್ಕಾ ಮೆಳ್ಚಾಶ್ಶಿಲಿ ಮುದ್ದಾಂ ಘೆಯ್ಯಾ. ಏಕಾಗ್ರತಾ, ಆತ್ಮವಿಶ್ವಾಸ ಅಭಿವೃದ್ದಿ ಕೋರ್ನು ಘೆವುಕ ವ್ಯಾಯಾಮ, ಯೋಗಾಸನ ತಾಂತು ಪ್ರಾಣಾಯಾಮ ಖಂಡಿತ ತುಮ್ಕಾ ಮದ್ದತ್ ಕರ್‍ತಾ. ಸ್ಪೋಟ್ಸ್, ನ್ಯೂಸ್ ಪೇಪರ್‍ಸ್, ಪಿರೀಯಾಡೀಕಲ್ಸ್ ವಾಚ್ಚೆ, ಚಾಂಗ ಬುಕ್ಸ್ ವಾಚ್ಚೆ, ಚರ್ಚೆಂತು, ಸೆಮಿನಾರಾಂತು ಭಾಗ ಘೆವ್ಚೆ ಹ್ಯಾ ಪೂರಾ ತುಮ್ಗೆಲೆ ವ್ಯಕ್ತಿತ್ವ ವಿಕಸನ ಕೋರ್ನು ಘೆವುಕ ಸಹಾಯು ಕರತಾತಿ. ಸಮಾ ಜಾವ್ನು ಯುದ್ಧ ಕಲೆ ಕಳ್ಳಿಲ್ಯಾಂಕ ಯುದ್ಧಾಕ ವಚ್ಚೂಕ ಕಶ್ಶಿ ಭಯೀ ಆಸ್ಸನಾಂಕಿ, ತಶ್ಶಿಚಿ ಸರ್ವ ಪಾಠ, ನೋಟ್ಸ್ ಕೋಳ್ನು, ಚಂದ ಜಾವ್ನು ಬರೋಚಾಕ ಗೊತ್ತಾಶ್ಶಿಲೊ ಪರೀಕ್ಷೆಕ ಕಿತ್ಯಾP ಭಿತ್ತಾ?

ಚರ್‍ಡುವಾಂಲೆ ಪರೀಕ್ಷಾ ಭಯಿ ಊಣೆ ಕೊರ್‍ಚಾಂತು ತಾಂಗೇಲೆ ಆವ್ಸು, ಬಾಪ್ಸುಲೆ, ಪೋಷಕಾಲಿ ಥೊಡಿ ಜವಾಬ್ದಾರಿ ಆಸ್ಸ. ಪರೀಕ್ಷೆಕ ಬಾಯ್ರಿಸರ್ಲಿಲ್ಯಾಂಕ ಇತ್ಲೆಚಿ ಮಾರ್ಕ್ಸ ಘೆವ್ಕಾ ಮ್ಹೊಣು ಒತ್ತಡ ಗಾಲ್ನಕ್ಕಾತಿ. ತಾಂಗೇಲೆ ಆತ್ಮವಿಶ್ವಾಸು ಚಡ ಜಾವ್ಚೆ ತಶ್ಶಿ ಉತ್ತೇಜನ ದಿಯ್ಯಾತಿ. ಸಾಧ್ಯ ಜಾಲ್ಯಾರಿ ತಾನ್ನಿ ಅಭ್ಯಾಸು ಕರ್ತಾನಾ ತುಮ್ಮಿ ತಾಂಗೆಲೊಟ್ಟು ಬೈಸಾ. ಚಮ್ಕುಚೆ ವಾಟ ಗೊತ್ತಾಶ್ಶಿಲೊ ಕೆದ್ನಾಯಿ ಗಡ್ಬಿಡಿ, ಗೌಜಿ ಕರ್ನಾ, ತಶ್ಶಿಚಿ ಪರೀಕ್ಷೆಂತು ಬರೈತಾನಾ ಗಡ್ಬಿಡಿ, ಗೋಂದೊಳು ಕೋರ್ನು ಘೆವ್ನಾಕ್ಕಾತಿ. ಆತ್ತ ಗೊಜ್ಜಾಲ್ಕಿ ನಾ. ಜೀಕ ತುಮ್ಗೆಲೆ ಪ್ರಯತ್ನ, ಸಾಧನ ಮಾಗ್ತಾ ಮ್ಹೊಣು. ನಿರಂತರ ಪ್ರಯತ್ನ, ಅನವರತ ಸಾಧನ ಶಿಕ್ವಣಾಂತು ಮಾತ್ರ ನ್ಹಯಿ ಸಗಳೆ ಜೀವಮಾನಾಂತು ತುಮ್ಕಾ ಜೀಕ(ಯಶ) ಮ್ಹಣ್ಚೆ ಇನಾಮು ದಿತ್ತಾ ಉರ್‍ತಾ.