ಅತ್ಯಾಚಾರ ಮ್ಹಣಚೆ ಶ್ರೇಷ್ಠ ಜೀವಿಲೊ ಅಯೋಗ್ಯಪಣ!

ರೇಪ್ ಜಾಂವೊ ಅತ್ಯಾಚಾರ ಹೇ ಖಂಚೇಯಿ ಸಮಾಜಾನಿ ಮಾತ್ತೆ ಸಕ್ಕಲ ಕೊರಕಾ ಜಾಲೀಲೆ ಹೇಯ ಕೃತ್ಯ ಜಾವನಾಸ್ಸಾ. ಭಾರತಾಂತು ಘೆಲೀಲೆ ವರ್ಷ ದಾಖಲ ಜಾಲೀಲೆ ಸುಮಾರ ಚಾರ್ ಲಾಕಾ ತಿತ್ತುಲೆ ಬಾಯ್ಲಮನ್ಶೆ ವಯಚೆ ದೌರ್ಜನ್ಯ ಪ್ರಕರಣಾಂತು ೩೨ ಹಜಾರಾ ಪಶಿ ಚ್ಹಡ ಅತ್ಯಾಚಾರ ಮ್ಹಣಚೆ ಯವಜಿಲ್ಯಾರಿ ಖರೇಚಿ ಆಂಗ ಜುಂ ಮ್ಹಣತಾ. ಭಾರತಾಚೆ ದಂಡಪ್ರಕ್ರಿಯಾಂತು ಅತ್ಯಾಚಾರಾಕ ಕಠೋರ ಜಾಲೀಲೆ ಶಿಕ್ಷಾ ಆಸಲೇರಿಚಿ ಹೇ ನಮೂನ್ಯಾಂತು ರೇಪ್ ಪ್ರಕರಣ ಘಡಚಾಕ ಕಾರಣ ಕಿತ್ತೆ? ಹೇ ಕೂಲಂಕುಶ ಜಾವನು ಚರ್ಚಾ ಕೊರಕಾ ಜಾಲೀಲೆ ಮುಖೇಲ ವಿಷಯು ಜಾವನು ಆಸ್ಸಾ. 

ದುರ್ಬಲಾ ವಯರಿ ಶಕ್ತಿವಾನಾನಿ ಆಪಲೆ ಅಧಿಕಾರು ಸ್ಥಾಪನ ಕೊರಚೆ ಜೀವಜಗತ್ತ್ಯಾಂತು ಸಾಮಾನ್ಯ ಜಾವನು ಪಳೋವಚಾಕ ಮೆಳತಾ ವಾಘು ಚಿತ್ತಲಾಕ ಕಾತ್ತಾ, ಮಾಜ್ಜರ ಇಂದ್ರಾಕ ಕಾತ್ತಾ ಜಾಲಯಾರಿ ಮನೀಸು ಸಕ್ಕಡ ಜೀವಿಂತು ಶ್ರೇಷ್ಠ ಮ್ಹಣೋನು ಘೆವಚೆ ಪ್ರಾಣಿ. ತಾಣೆ ಆಪಲೆ ಸಹಚರ ವಯ್ರಿ ಅಸ್ಸಲೆ ಕ್ರೂರತಾ ದಾಖಯಚೆ ಘೋರ ಅಪರಾಧ ಜಾಯನಾಂವೆ? ಹೇ ಸಬಲ ಆನಿ ದುರ್ಬಲಾ ಮಧೇಚೆ ಘರ್ಷಣ ಮ್ಹಣಚೆ ಪಶಿ ಶ್ರೇಷ್ಠ ಜೀವಿಲೆ ಅಯೋಗ್ಯಪಣ ಮ್ಹಣಯೇತ ಕಿತ್ಕಿ!

ಅತ್ಯಾಚಾರಾಂತು ಮಸ್ತ ಪ್ರಕರಣಾಂತು ಗುರ್ತು ಆಶ್ಶಿಲ್ಯಾ ಲೋಕಾ ತಾಕುನೂಯಿ ಚೆಲಿಯೋ ನಾಂವೆ ಬಾಯ್ಲಮನೀಷಿ ಫಸ ಪಡತಾತಿ. ಆನಿ ಚಾಲಯಾಲೆ ನಾಂವೆ ಧಾರಲ್ಯಾಲೆ ಗೊಡಶೆ ಉತರಾಕ ಭೂಲ್ನು ಅತ್ಯಾಚಾರಚೆ ಕುಂಡಾಕ ಆಹುತಿ ಜಾತ್ತಾತಿ. ತ್ಯಾ ಖಾತ್ತಿರಿ ಚೆಲಿಯೋ ಆನಿ ಬಾಯ್ಲಮನಷೇನಿ ಆಪಲೆ ಸಾನ್ಪಣಾ ತಾಕೂನೂಯಿ ವಿವೇಕ ವಾಡ್ಡೊನು ಘೆವಕಾ. ಕೆಲವ ಧೂರ್ತ ಲೋಕ ಆಮ್ಗೆಲೆ ಮಧೇ ತಿಮಿಂಗಿಲ ವರಿ ಆಸ್ಸಾತಿ ಮ್ಹಣಚೆ ನಜರಾಂತು ದವರೂನು ಘೇವ್ನು ಏಕಾಂಗಿ ಜಾವನು ಧಾರಲೆ ಮನೀಷಾ ಬರಶಿ ವಾಘತನಾ ಜಾಗೃತ ದವರೂನು ಘೆವೂಕಾ.

ಹರ್‍ಯೇಕ ಚೆಲಿಯಾ ಚರಡುವಾಂಕ ಇಸ್ಕೂಲಾಕ ಪೆಟೋನು ವಿದ್ಯಾವಂತ ಕೊರಕಾ. ತೆದ್ದನಾ ತಾಂಗೆಲೆ ಜ್ಞಾನ ವಾಡತಾ. ಆಪಲೆ ಹಕ್ಕ ಕಸ್ಸಲೆ? ದುಸರ್‍ಯಾಲೆ ದೌರ್ಜನ್ಯ ತಾಕೂನು ಚುಕ್ಕೋನು ಘೆವಚಾಕ ಆಪಣೇನಿ ಕಸ್ಸ ಕಸ್ಸಲೆ ಕೊರಕಾ ಮ್ಹಣಚೆ ಕೋಳ್ನು ಯೋಗ, ಕರಾಠೆ, ಖೇಳಾಂತು ಸಾಧನ ಕೊರನು ಆಪಲೆ ಶರೀರ ಸದೃಢ ಕೊರನು ಘೆವಚಾಕ ತಾಂಕಾ ಸಾಧ್ಯ ಜಾತ್ತಾ. 

ಬಾಯ್ಲಮನ್ಶೆನಿ ದುಡ್ಡು, ಸಂಪತ್ತಿ, ನೌಕರಿ ಆದಿ ಆಶೆಕ ಶಿರಕೂನು ಬಣ್ಣ ಉತ್ರ ಖರೇ ಮ್ಹೊಣು ನಮಗೂನು ಅಯೋಗ್ಯಾ ಮಾಗಶಿ ವಚ್ಚಾಕ ನಜ್ಜ. ಖಂಚೇ ವಿಷಯಾಚೆ ಸತ್ಯಾಸತ್ಯತಾ ಪಯ್ಲೆ ಕೋಳ್ನು ಘೇವ್ನು ಮಾಗಿರಿ ತೀರ್ಮಾನ ಘೆವಕಾ. 

ಖಂಯಿಚಿ ಏಕ ಅತ್ಯಾಚಾರ ಪ್ರಕರಣ ಚಲಯಾರಿ ದೋನ-ತೀನ ಮ್ಹಹಿನ್ಯಾ ಭಿತ್ತರಿ ಪೊಲೀಸ್ ವಿಚಾರಣ ಪೂರ್ತಿ ಜಾವನು ವರಸ, ದೋನ ವರಸಾ ಭಿತ್ತರಿ ಗುನ್ನೇಗಾರಾಂಕ ಶಿಕ್ಷಾ ಮೆಳಚೆ ವರಿ ಜಾವಕಾ. ತೆದ್ದನಾ ದುಸರ್‍ಯಾಂಕ ಭಯಿ ಶೂರ ಜಾತ್ತಾ. ಅಸ್ಸಾಲೆ ಗುನ್ನೋ ಊಣೆ ಜಾತ್ತಾ.

ಶಾಳೆಚೆ ಪಠ್ಯಾಂತು ಅಸ್ಸಲೆ ಅಪರಾಧಾ ತಾಕೂನು ದೂರ ಉರಚೆ ತಸ್ಸಾಲೆ ಪಠ್ಯ ಮೇಳಯಕಾ. ಚರಡುವಾಂಕ ಬಾಯ್ಲಮನ್ಶೆಲೆ ಶ್ರೇಷ್ಠತಾ ಕಳೋನು ದಿವಕಾ.

ಅತ್ಯಾಚಾರ ಪ್ರಕರಣಾಂತು ಶಿರಕಿಲ್ಯಾಕ ಗಾಂವಚಾನ ಬಹಿಷ್ಕಾರ ಘಾಲಕಾ. ರೇಶನ್ ಕಾರ್ಡ್, ವೋಟರ್ ಕಾರ್ಡ, ಪ್ಯಾನ್ ಕಾರ್ಡ, ಡ್ರೈವಿಂಗ್ ಲೈಸನ್ಸ್, ಪಾಸ್‌ಪೋರ್ಟ್ ಸಹಿತ ಸರಕಾರಾಚೆ ಖಂಚೇಯಿ ಸೌಲಭ್ಯ ತಾಕ್ಕಾ ಆನಿ ತಾಗೆಲೆ ಕುಟುಂಬಾಚಾಂಕ ಮೆಳಚಾಕ ನಜ್ಜ.

ಅಶ್ಶಿ ಜಾಗೃತಿ, ಕಠಿಣ ಕ್ರಮಾನಿ ಅತ್ಯಾಚಾರ ಪ್ರಕರಣ ಊಣೆ ಕರತಾ ಯವಚಾಕ ಸಾಧ್ಯ ಆಸ್ಸ ಮ್ಹೊಣು ಮಾಕ್ಕಾ ದಿಸತಾ.