ಆಚಾರ್ಯ ಭಾರಧ್ವಜ

ಆಚಾರ್ಯ ಭಾರಧ್ವಜಾಲೆ ಜನನ ಗಯಾಂತು ಜಾಲ್ಲೆ ಮ್ಹೊಣು ಇತಿಹಾಸ ಸಾಂಗ್ತಾ. ಹಾಕ್ಕಾ ಸನಾತನ “ಆಯುರ್ವೇದ” ಪರಂಪರೆಚೊ ಪ್ರಚಾರಕನು ಆನಿ ‘’ಯಾಂತ್ರಿಕ ತಂತ್ರಜ್ಞಾನಾ”ಚೊ ಇಂಜಿನಿಯರ್ ಮ್ಹೊಣು ಆಪಯಲ್ಯಾರಿ ಚೂಕ ಜಾಯಸನಾ. 

ಹಾಣೆ ಬರೆಯಿಲೆ ಯಂತ್ರ ಸರ್ವಸ್ವ” ಮ್ಹಣಚೆ ಗ್ರಂಥ ತಾಕ್ಕಾ ಕಾರಣ. ತಾಂತು ತಾಣೆ ಬಾಹ್ಯಾಕಾಶ ತಂತ್ರಜ್ಞಾನ, ವೈಮಾನಿಕ ತಂತ್ರಜ್ಞಾನ ಆನಿ ಉಡಚೆ ಯಂತ್ರ ಮ್ಹಳಯಾರಿ ವಿಮಾನಾ ಖಾತೀರಿ ಮಸ್ತ ಆಸಕ್ತಿದಾಯಕ ವಿಷಯು ಬರೆಯಲಾ. ಹಾಣೆ ತೀನಿ ನಮೂನ್ಯಾ ವಿಮಾನ ಸೊದ್ಲಾ ಖಂಯಿ. ಜಾಲ್ಯಾರಿ ತಾಣೆ ಸಾಂಗಿಲೆ ತಂತ್ರ ಆನಿ ವಿಷಯು ಮಸ್ತ ಕ್ಲಿಷ್ಟ ಜಾವ್ನಾಶ್ಶಿಲ ನಿಮಿತ್ತ ತಾಗೆಲೆ ವ್ಯಾಖ್ಯಾನ ಅರ್ಥು ಕೊರನು ಘೆವಚೆ ಕಷ್ಟಸಾಧ್ಯ ಜಾಲ್ಲಾ ಖಂಯಿ. 

ತಾಣೆ ಸೂರ್ಯಾಲೆ ವಾತ ಆನಿ ವಾರೆಂ ವಾಪರೂನು ದೋಳ್ಯಾಕ ದೀಸ್ನಾಶ್ಶಿಲ ತಸ್ಸಲೆ ವಿಮಾನ ಕೊರಚೆ ಪ್ರಕ್ರಿಯಾ ಸಾಂಗ್ಲಾ ಖಂಯಿ. ದೋಳ್ಯಾಕ ದೀಸ್ನಾಶ್ಶಿಲೆ ವಿಮಾನ ಕರೆಂಟಾ ಮೂಖಾಂತರ ಪೊಳೋಚೆ ವಿಧಾನ, ವಿಂಗಡ ವಿಮಾನಾಂತು ಆಶ್ಶಿಲ್ಯಾನ ಉಲೈಲೆ ಉತ್ರ ಆಯ್ಕುಚೆ ತಂತ್ರ, ವಿಂಗಡ ವಿಮಾನಾಂತು ಘಡಚೆ ಘಟನಾ ಪೊಳೋಚೆ ತಂತ್ರಜ್ಞಾನ ಹೇ ವಿಷಯಾಂತು ಹಾಣೆ ಬರೈಲಾ ತಾಜ್ಜ ನಿಮಿತ್ತ ಹಾಕ್ಕಾ ವೈಮಾನಿಕ ತಂತ್ರಜ್ಞಾನಾಚೊ ಆದಿ ಸಂಶೋಧಕ ಮ್ಹೊಣು ಆಪಯತಾತಿ. ಹಾನ್ನಿ ಸಕ್ಕಡಾನಿ ಹೇ ಸಂಶೋಧನ ಹವಾನಿಯಂತ್ರಿತ ಪ್ರಯೋಗಾಲಯ ಭಿತೇರಿ ಬೈಸೂನು ಕೆಲೀಲೆ ನ್ಹಂಹಿ. ರಾನ್ನಾಂತು, ಘರಾಂತು ಉಪವಾಸ, ವನವಾಸ ಪೋಡ್ನು ಕೆಲೀಲೆ ಮ್ಹಣಚೆ ಸ್ಮರಣೆಕ ಹಾಡಲ್ಯಾರಿ ತಾಜ್ಜ ಮೌಲ್ಯ ಆಮ್ಗೆಲೆ ಕಳೀತಾಕ ಎತ್ತಲೆ.