ಸುಖಾಚೆ ಪಾವಲಿ - 7

ಆಜಿ ಸಮಾಜಾಂತು ಆಮ್ಗೆಲೆ ಮಸ್ತ ಚೆಲ್ಲಿಯಾ ಚರ್ಡುಂವ, ಕೆಲವ ವ್ಹರಡೀಕ ಜಾಲೀಲಿ ಬಾಯಲಮನ್ಶೆ ಸಹಿತ ತೀಳೊ ದವರೂನು ಘೆವಚೆ ಮ್ಹಳಯಾರಿ ಅಲರ್ಜಿ ಜಾವಚೆ ವರಿ ಕರತಾತಿ. ಕಿತಯಾಕ? ‘ಆಪಣಾಲೆ ಕಾಲೇಜಾಂತು ಮಸ್ತ ಲೋಕ ಚೆಲಿಯೋ ತೀಳೊ ದವರೂನು ಘೇನಾಶಿ, ರಿತ್ತೇ ನಿಡಲಾರಿ ಎತ್ತಾತಿ. ಮಾಕ್ಕ ಮಾತ್ರ ತುಮ್ಮಿ ಇತಯಾಕ ತೀಳೊ ದವರೂನು ಘೇ, ಕಾಂಕಣ ಘಾಲ್ನು ಘೆ ಮ್ಹೊಣು ಆರ್ಡರ್ ಕರತಾತಿ? ಮ್ಹೊಣು ತಾನ್ನಿ ಘರಾಂತು ಆವಯಿ ಲಾಗ್ಗಿ ಜಗಡ್ಚಾಕ ಲಾಗತಾತಿ. ಲಗ್ನ ಜಾಲೀಲೆ ಸುವಾಸಿಣಿ ಬಾಯ್ಲಮನಿಷಿ ಸಹಿತ “ಹಾಂವ ಕಾಲೇಜಾಕ ವತ್ತಾನಾ ತೀಳೊ, ಬಿಂದಿ ಕಸಲೇ ದವರೂನು ಘೇನಾ ಆಶಿಲಿ. ಆತ್ತ ಇತಯಾಕ ತುಮ್ಮಿ ದವರೂನು ಘೇ ಮ್ಹೊಣು ಆರ್ಡರ್ ಕರತಾ ಆಸ್ಸತಿ. ತಶ್ಶಿ ಕೆಲಯಾರಿ ಹಾಂವ ಡೇವೋರ್‍ಸ್ ದೀವ್ನು ವತ್ತ ಪಳೇಯಾ ಮ್ಹೊಣು ಬಾಮ್ಣಾಕ, ಮಾಂಯ್ಗೆಕ ಬಿಷ್ಟೇತಾಲಿ ಸಹಿತ ಆಸ್ಸತಿ. 

ನಿಡಲಾರಿ ಕುಂಕುಮು ಲಾವ್ನು ಘೆವಚೆ ಜಾಂವೊ ತೀಳೊ ದವರೂನು ಘೆವಚೆ ದಾಸ್ಯ ಸಂಕೇತ ಮ್ಹೊಣು ಕೋಣೆಯಿ ಸಮಜೂಚಾಕ ನಜ್ಜ. “ಸಿಂಧೂರಂ ಸೌಂದರ್ಯ ಸಾಧನ ಮ್ಹಣಚೆ ಪ್ರಖ್ಯಾತ ಮ್ಹಣ್ಣಿ ಸಕಡಾಂಕ ಗೊತ್ತಾಶ್ಶಿಲೇಚಿ. ನಿಡಲಾರಿ ಕುಂಕುಮು ಜಾಂವೊ ತೀಳೊ ಲಾವ್ನು ಘೆತ್ತಿಲೆ ಸ್ತ್ರೀಕ ಸಮಾಜಾಂತು ಏಕ ಗೌರವ ಆಸ್ತಾ. ಹಿಂದೂ ಧರ್ಮ ಶಾಸ್ತ್ರ ಪ್ರಮಾಣೆ ಕುಂಕುಮು ಸುವಾಸಿಣಪಣಾಚೆ ಲಕ್ಷಣ ಮ್ಹಣಸೂನು ಘೆತ್ತಾ.  

ಭೂವ್ಯಾ ಮಧೇ ಕುಂಕುಮು ದವರೂನು ಘೆವಚೆ ತಾಕೂನು ತಾಜ್ಜೆನ ಆರೋಗ್ಯಾಚೆ ರಾಕವಣ ಸಹಿತ ಜಾತ್ತಾ ಮ್ಹಣಚೆ ಉತ್ತರ ವೈಜ್ಞಾನಿಕ ಜಾವ್ನೂ ಒಪ್ಪುನು ಘೆತ್ತಿಲೆ ಆಸ್ಸ. ಬೌವ್ಯಾ ಮಧೇ ಕುಂಕುಮು ದವರೂನು ಘೆವಚೆ ಜಾಗೆಂತೂಚಿ ಪಿಟ್ಯುಟರಿ ಗ್ರಂಥಿ ಆಸ್ಸ . ತಾಂಬಡೆ ಬಣ್ಣಾಂತು ಉತ್ತೇಜಕ ಗೂಣ ಆಸ್ಸ. ತಾಂಬಡೆ ಕುಂಕುಮಾ ತಾಕೂನು ಪಿಟ್ಯುಟರಿ ಗ್ರಂಥಿಕ ಕೆದನಾಂಯಿ ಉತ್ತೇಜನ ಮೇಳ್ನು, ತಾಜ್ಜೇನ ಸಮರ್ಪಕ ಜಾವ್ನು ಹಾರ್ಮೋನ್ಸ್ ತಯಾರ ಜಾವ್ನು ಆರೋಗ್ಯ ಸ್ಥಿರ ಜಾವ್ನು ಉರತಾ. ಕುಂಕುಮು ಲಾವಚೆ ತಾಕೂನು ಬಾಯ್ಲಮನ್ಶೆಲೆ ತೋಂಡ ಪಳೈಲ ಕೂಡ್ಲೆ ಲೋಕಾಲೆ ದೃಷ್ಠಿ ತಾಜ್ಜೇರಿ ವಚ್ಚೆ ನಿಮಿತ್ಯ ತಿಕ್ಕಾ ಕೋಣಾಲೇಚಿ ವಾಯ್ಟ ದೃಷ್ಟಿ ಲಾಗ್ನಾ. ಹಳದಿ - ಕುಂಕುಮಾ ತಾಕೂನು ಬಾಯ್ಲಮನ್ಶೆಂಕ ವಿಪುಲ ಗೌರವಾದರ ಮೆಳ್ತಾ. ವಾಯ್ಟದೃಷ್ಟಿ ನಿವಾರಣ ಜಾತ್ತಾ. 

ದಾರಲೆ ಸಹಿತ ಕುಂಕುಮು ಲಾವ್ನು ಘೆತ್ತಾತಿ. ತಾಜ್ಜ ಸಂಧಿ ಕರತಾನಾ ನಾಮ್ಮ ಘಾಲ್ನು ಘೆವ್ಚೆ ನಿಮಿತ್ತ ಸಹಿತ ತಾಂಗೆಲೆ ಆರೋಗ್ಯ ರಾಕವಣಾಕ ಮದತ್ ಮೆಳ್ತಾ. ಆವಯಿ -ಬಾಪಯ್ನ, ಮ್ಹಾಲ್ಗಡ್ಯಾನಿ ಹೇ ಸಕ್ಕಡ ಕೋಳ್ನು ಘೆವ್ನು ಚರ್ಡುವಾಂಕ ಅರ್ಥು ಜಾವಚ ವರಿ ಸಾಂಗಚಾಕ ಶಿಕ್ಕಾ. ಚರ್ಡುವಾನಿ ಮಧ್ಯೆ ಖಾಂಯ್ತರಿ ಸವಾಲ ನಿಮ್ಗಿಲ್ಯಾರಿ ಬೋಡ ಕರ್ಪೂನು ಘೆತ್ತಾ ಬಸಚೆ ಬದಲಾಕ ತಾಕ್ಕಾ ಸಮ್ಹ ಜಾಲೀಲೆ ಜವಾಬ ಸಾಂಕಾ ಮ್ಹಳಯಾರಿ ಆಮ್ಗೆಲೆ ಸಂಸ್ಕೃತಿ, ಸಂಸ್ಕಾರ, ರೀತಿ-ರಿವಾಜಾ ಖಾತೇರಿ ತಾನ್ನಿ ಜ್ಞಾನ ವಾಡ್ಡೊನು ಘೆವಕಾ. ಆನಿ ಹಾಜ್ಜ್ತೆಂನಯಿ ತಾಂಗೆಲೆ ವೈಯಕ್ತಿಕ ಜೀವನಾಂತು ಸಹಿತ ಸುಖ-ಸಂತೋಷ ಪ್ರಾಪ್ತ ಜಾತ್ತಾ. 

ಆಜಿ ಪಾಶ್ಚಾತ್ಯ ಶಿಕ್ಷಣ ಶಾಳೆಂತು, ಕಾಲೇಜಾಂತು ಶಿಕೊನು ದಿತ್ತಾತಿ. ಥಂಯಿ ಶಿಕಯತಲ್ಯಾಂಕ ಆಮ್ಗೆಲೆ ಧರ್ಮಾಚೆ ಸಂಸ್ಕೃತಿ, ಸಂಸ್ಕಾರ ಖಾತೇರಿ ಜ್ಞಾನ ಆಸ್ಸುಕಾ ಮ್ಹೊಣು ನಾ. ಮಸ್ತ ಲೋಕಾಂಕ ಆಸ್ಸನಾ. ತ್ಯಾ ಕಾರಣಾನ ಚರ್ಡುವಾಂಕ ತ್ಯಾ ಖಾತೇರಿ ಜ್ಞಾನ ದಿವಚೆ ಜವಾಬ್ದಾರಿ ಅವಯಿ-ಬಾಪಯಿ ವಯೀಚಿ ಆಸ್ಸ. ಚರ್ಡುವಾಂಕ ಜೋರು ಕೊರಚೆ, ಭಿಷ್ಟೋಚೆ, ಮಾರಚೆ ಕರನಾಶಿ ಆಮಗೇಲೆ ಧರ್ಮಾಚೆ ಹೇ ನಿಯಮು ಆಮ್ಗೆಲೆ ಜೀವನಾಚೆ ಉದರ್ಗತಿಕ ಜಾವ್ನು ಕೆಲೀಲೆ ಮ್ಹಣಚೆ ಕೋಳ್ನು ಘೇವ್ನು ಮುಖಾವೈಲೆ ಪೀಳ್ಗಿಕ ಮಾರ್ಗದರ್ಶನ ದಿವ್ಚೆ ಜವಾಬ್ದಾರಿ ಸಕಡಾಲೆ ವಯ್ರೀ ಆಸ್ಸ.