“ಆತ್ಮಹತ್ಯಾಚೆ ದೌರ್ಬಲ್ಯಾಕ ಶಿರಕೂನಾಕ್ಕಾತಿ!!

ಜನನ ಜಾಲೀಲೆ ಹರ್‍ಯೇಕ ಜೀವಿಕ ಮರಣ ಅನಿವಾರ್‍ಯ ಕರ್ಮ. ‘ವಯ ಜಾವನು ಮಾಂತಾರ್‍ಪಣಾಂತು ಮರಣ ಸಹಜ ಜಾವನು ಆಯಲೇರಿ ತಾಕ್ಕಾ ಸಹಜ ಮರಣ, ತೋಂ ಮನೀಷು ಸಂಪೂರ್ಣ ಆಯುಷ್ಯ ಕಾಡಲೊ ಮ್ಹಣತಾತಿ. ಯೌವನಾಂತೂ ಖಂಚತರಿ ಅಪಘಾತ ಘಡ್ನುಕಿ, ಆತ್ಮಹತ್ಯಾ ಕೊರನು ಘೇವ್ನುಕಿ ಮೆಲಯಾರಿ ದುರ್ಮರಣ ಪಾವಲೊ ಮ್ಹಣತಾತಿ. ಅಸ್ಸಲ್ಯಾಂಕ ಸದ್ಘತಿ ಮೇಳ್ನಾ ಕಂಯಿ. ಆಜಿ ದೀಸಾಂದೀಸಾಕ ಅಶ್ಶಿ ದುರ್ಮರಣ ಪಾವಚೆ ಲೋಕಾಂಗೆಲೆ ಅಂಕಡೊ ಚ್ಹಡ ಚ್ಹಡ ಜಾತ್ತಾ ವತ್ತಾ ಆಸ್ಸಾ. ತಾಂತೂಚಿ ನಾನಾ ಕಾರಣಾನಿ ಜೀವನಾಕ, ಕಷ್ಟಾಕ, ರೀಣಾಕ ಭೀವ್ನು ಯೌವನಾಂತೂ ಜೀವನ ಅಂತ್ಯ ಕೊರನು ಘೆವಚೆ ಯುವಕಾರ ಅಂಕಡೋ ವರ್ಷಾನ ವರ್ಷಾಕ ವೃದ್ಧಿ ಜಾತ್ತಾ ಆಸ್ಸಾ.

ಅಸ್ಸಲ್ಯಾಂಕ ಪಿಶ್ಶೆ ಲೋಕಾಂಕ ಪಳೋನೂಚಿ “ಮನುಷಾಲೆ ಜನ್ಮು ಮಸ್ತ ವ್ಹಡ; ತ್ಯಾ ಪಾಡ ಕೊರನು ಘೆವನಾಕ್ಕಾತಿ ಪಿಶ್ಶಾನು ಮ್ಹೊಣು ದಾಸಶ್ರೇಷ್ಟಾನಿ ಶಂಬರ ಬಽರಿ ವರ್ಷಾಚೆ ಮಾಕಸೀಚಿ ಸಾಂಗಿಲೆ ಸಕ್ಕಡ ಆಯಕೂನು ಆಸತಾತಿ.  “ಪೋಂವಕಾ ಪೋಂವ್ನು ಆಮ್ಮಿ ಜಿಕ್ಕಾ ಹೇ ವರೇನ ಏಕ ದಾಸವಾಣಿಚಿ!. ಅಸ್ಸಾಲೆ ಹಜಾರ ಬಽರಿ ಅಮೃತವಾಣಿ, ದಾಸವಾಣಿ, ಅನುಭವಿಂಗೆಲೊ ಉತ್ರ ಆಮಕಾ ಕಸ್ಸಲೆ ಕಷ್ಟ, ದುಃಖ ಆಯಲೇರಿಚಿ ಭೀವನಾಕ್ಕಾ ಮ್ಹೊಣು ಧೈರ್ಯ ದಿತ್ತಾತಿ. ದುಸರ್‍ಯಾಂಕ ಮದತ್ ಕೊರಚೆ ಖಾತ್ತರೀಚಿ ಜನ್ಮಿಲೀಲೆ ರೂಕು, ಜಾಡ, ನಂಯ, ಸಮುದ್ರಾಂಕ ವರೇನ ಸಂಕಷ್ಟ, ಸಂಗಟ ಚುಕ್ಕನಾ. ಗರಜ ಆಶ್ಶಿಲ್ಯಾಲೆ ಖಾತ್ತಿರಿ ರೂಕು ಆಪಲೆ ಆಂಗ ಬಽರಿ ಫಳ ವಾಡ್ಡೊನು ಆಸತಾ. ವಾರೇ ಯವ್ನು ಘಡೇ ಭಿತ್ತರಿ ತ್ಯಾ ಸಕ್ಕಡ ಉರಬೂನು ಉಡೊನು ಸೊಡ್ತಾ. ಮೀಡಿ, ಮಿಜರ ಸಕ್ಕಡ ನೆಲಾಕ ಪೋಡ್ನು ವ್ಯರ್ಥ ಜಾವನು ವತ್ತಾ. ಅತಿವೃಷ್ಟಿ, ಅನಾವೃಷ್ಟಿ, ವಾರೇನ ವರೇನ ದುಸರ್‍ಯಾಲೆ ಮದತ್ ಖಾತ್ತೀರಿಚಿ ಯವಚೆ ರೂಕು ಅವಸಾನ ಪಾವತಾ. ಲೋಕ ತಾಕ್ಕಾ ಫಾತ್ತೊರು ಮಾರನು ಧೂಖಯತಾತಿ. ತಶೀಚಿ ನ್ಹಂಯಿ, ಸಮುದ್ರಾಕ ವರೇನ ಸಂಕಷ್ಟ ಚುಕ್ಕಿಲೆ ನ್ಹಂಹಿ. ಖಂಯಕಿ ಗುಡ್ಡೇರಿ ಪಡಲೀಲೆ ಉದ್ದಾಕ ಗರಜ ಆಶ್ಶಿಲೆ ಲೋಕ, ಪ್ರಾಣಿ, ಜಾಡ-ರುಕ್ಕಾಕ ಹಾಡ್ನು ಪಾವಯಚಾಕ ನಂಯಿ ಕಿತ್ಲೆ ಕಷ್ಟ ಕಾಡ್ತಾ. ಪಾತ್ರಾರಿ ಪಡ್ತಾ, ಕಾಂಟೇರಿ ಪೋಂವತಾ, ಊಂಚಾಯಾ ತಾಕೂನು ಸಕ್ಕಲ ಊಡಿ ಮಾರತಾ. ಅಖೇರಿಕ ಆಪಲೆ ಪ್ರಯತನಾಂತು ಯಶ ಪಾವ್ತಾ. ತಶಿ ಆಸತಾ. ಕಿತ್ತುಲೆ ಕಷ್ಟ, ದೌರ್ಜನ್ಯ ಚಲಯಾರೀಚಿ ಹೇ ಸಕ್ಕಡ ಭೀನಾತಿ, ಕೊಪ್ಪನಾತಿ. ಆಪಲೆ ಕಾರ್ಯ ಕರತಾ ಉರತಾತಿ. ತಶ್ಶಿ ಆಸತನಾ ಮನುಷಾನಿ ಕಷ್ಟ, ದುಃಖ ಆಯಲೆ ಮ್ಹೊಣು ಕ್ಷುಲ್ಲಕ ಕಾರಣಾಕ ಆತ್ಮಹತ್ಯೆ ಮೂಖಾಂತರ ಆಪಲೆ ಜೀವನ ಸಮಾಪ್ತಿ ಕೊರನು ಘೆವಚೆ ಸಮ್ಮವೇ? 

ಏಕ ಮನುಷಾಲೆ ಪೂರ್ಣಾಯುಷ್ಯ ಮ್ಹಳಯಾರಿ ಶಂಬರ ವರ್ಷ ಮ್ಹೊಣು ಲೆಕತಾತಿ. ಜಾಲಯಾರೀಚಿ ಪೌಣಶೆಂ ಜಾಂವೊ ಅಂಶಿ ವರಸ ವಾಂಚಿಲ್ಯಾಕ ಪೂರ್ಣಾಯುಷ್ಯ ವಾಂಚಲೊ ಮ್ಹೊಣೂಚಿ ಸಾಂಗತಾತಿ. ಸಾಠ, ಸತ್ತರ ಆಯು ಜಾಲ್ಲ ಮಾಗಿರಿ ಮನುಷಾಲೆ ಜವಾಬ್ದಾರಿಚೆ ಮಸ್ತ ವಾಂಟೊ ಸಂಪೂನು ಆಸತಾ. ಶರೀರ ವಾಡಚೆ ಬಂದ ಕೊರನು ಆಸತಾ. ಹಾಡ್ಡ ಸಡ್ಡಳ ಜಾವ್ನು, ತೋಂ ನಿತ್ರಾಣಿ ಜಾವ್ನು ಆಸತಾ. ಖಂಚತರಿ ಸಾನ ಕಾಯ್ಲೇನ ವರೇನ ತೋಂ ಮೊರಚಾಕ ಪುರೊ. ಹೇ ನಿಸರ್ಗದತ್ತ ಜಾವನು ಯವಚೆ ಮರಣ. ಜಾಲಯಾರಿ ಕಿತ್ಲೆಕಿ ಲೋಕ ತಾಂತೂಚಿ ತರ್ನಾಟೆ ಲೋಕ ಮಸ್ತ ಲ್ಹಾನ ವಯಾಂತೂಚಿ ಅಸಹನೀಯ ಕಷ್ಟ ಆಯ್ಲೆ, ದುಃಖ ಜಾಲ್ಲೆ, ಲೆಕ್ಕಿಲೆ ತಿತ್ತುಲೆ ಮಾರ್ಕ್ಸ್ ಘೆವಚಾಕ ಜಾಯನಿ, ರೀಣ ಪಾರಿಗತ ಕೊರಚಾಕ ಜಾಯ್ನಿ, ಮ್ಹೊಗಾಂತು ಹಾರಲೊ ಇತ್ಯಾದಿ ವೆವೆಗಳೆ ಕಾರಣಾನಿ ಗಳ್ಪಾಸು ಘಾಲ್ನು ಘೇವ್ನುಕಿ, ನಂಯ್ಕ ಉಡ್ನು, ವಿಷ ಪ್ರಾಶನ ಕೊರನು ಮರಣ ಪಾವ್ತಾತಿ. ಹಾಜೇನಿ ತಾಂಗೆಲೆ ಆತ್ಮಾಕ ಸದ್ಘತಿ ಮೆಳ್ತಕಿ ನಾಂಕಿ ಜಾಲಯಾರಿ ರಾಷ್ಟ್ರಾಕ ಆನಿ ತಾಗೆಲೆ ಕುಟುಂಭಾಕ ವ್ಹಡ ಲುಕ್ಸಾನ ಜಾವಚೆ ಖಂಡಿತ. ತೋಂ ಮನೀಸು ಏಕ ಆಸ್ತಿ ಮ್ಹೊಣು ತಾಕ್ಕಾ ವಾಡ್ಡೊನು ವ್ಹಡ ಕೊರಚಾಕ, ತಾಗೆಲೆ ಶಿಕ್ಷಣಾಕ, ಜವಣ-ಖಾಣಾಕ, ಆರೋಗ್ಯ ರಾಕಖವಣಾಕ, ನೌಕರಿಕ ಖರ್ಚಿಲೆ ದುಡ್ಡು ವ್ಯರ್ಥ ಜಾಯನಾವೇ? ಸರಕಾರ ವರೇನ ತಾಕ್ಕಾ ವೆವೆಗಳೆ ಸೌಲಭ್ಯ, ರಿಯಾಯ್ತಿ ಮ್ಹೊಣು ಲಾಕಬಽರಿ ದುಡ್ಡು ದೀವನು ಆಸ್ಸುಕ ಪುರೊ. ಹೇ ಜನಸಾಮಾನ್ಯಾಲೊ ದುಡ್ಡು. ತಾಣೆ ಅತ್ಮಹತ್ಯಾ ಕೊರನು ಘೆತ್ತಿಲೆ ನಿಮಿತ್ತ್ಯಾನ ಹೇ ವ್ಯರ್ಥ ಮ್ಹಳಯಾರಿ ರಾಷ್ಟ್ರೀಯ ಲುಕ್ಸಾನ ಜಾಯನಾಂವೆ. 

ಏಕ ಅಂದಾಜಾ ಪ್ರಕಾರ ಭಾರತಾಂತು ಹರ ಪಾಂಚ ತಾಕೂನು ಸ ಮಿನಿಟಾಕ ಏಕಳೊ ಆತ್ಮಹತ್ಯಾ ಕೊರನು ಘೆತ್ತಾ. ಮ್ಹಳಯಾರಿ ಪ್ರತಿ ವರಸ ಹಾಂಗಾ ಚ್ಹಡ, ಊಣೆ ಏಕ ಲಾಕ್ ಲೋಕ ಆತ್ಮಹತ್ಯಾ ಮೂಖಾಂತರ ಮರತಾತಿ. ವಿಶ್ವಾಚೆ ಲ್ಯಾಕ ಘೆತಲೇರಿ ಏಕ ವರಸಾಕ ಆತ್ಮಹತ್ಯಾ ಕೊರನು ಮೊರಚೆ ಲೋಕಾಂಗೆಲೆ ಅಂಕಡೊ ಸುಮಾರ ಆಠ ಲಾಕ್. ಹಾಂಗಾ ಆನ್ನೇಕ ಆತಂಕಾಚೆ ವಿಷಯು ವರೇನ ಆಸ್ಸಾ. ಕಸ್ಸಲೆ ಮ್ಹಳಯಾರಿ ಆತ್ಮಹತ್ಯಾಕ ಪ್ರಯತನ ಕೆಲೀಲ್ಯಾಂತು ಪಾಂಚ ಟಕ್ಕೆ(೫%) ಲೋಕಾಂಕ ಮಾತ್ರ ಯಶ ಮೆಳ್ತಕಂಯಿ. ಫಕ್ನೆ ಯಶ ಮೆಳಚೆ ಪ್ರಮಾಣ ಚ್ಹಡ ಜಾತ್ತಾ ಘೆಲಯಾರಿ ಕಿತ್ಲೆ ಕುಟುಂಬ ಆಘಾತಾಕ ಶಿರ್‍ಕತಾತಿ ಮ್ಹಣಚೆ ಯವಜಿಲ್ಯಾರಿ ಖರೇಚಿ ಮಸ್ತ ಭಯಿ ದಿಸತಾ. ನ್ಹಂಹಿಸಿ ಕರೋನಾತಂಕ ಕಾರಣಾನಿ ಸಕ್ಕಡೆ ಉದ್ಯೋಗ ನಷ್ಟ, ವ್ಯಾರು, ಉದ್ಯಮಾಂತು ಲುಕ್ಸಾನ ಜಾಲೀಲೆ ನಿಮಿತ್ಯ ಆನಿ ಥೊಡೆ ಕಾಳ ಆತ್ಮಹತ್ಯಾ ಪ್ರಮಾಣ ಚ್ಹಡ ಜಾವಚಾಕ ಪುರೊ ಮ್ಹಣಚೆ ಭಯಿ ವರೇನ ತಜ್ಞ ವ್ಯಕ್ತ ಕರತಾತಿ. ಸಗಳೆ ಜಗಾಂತು ಕರೋನಾ ಕಾರಣಾನಿ ಗರೀಬ ಲೋಕ ಆನ್ನೀಕೆ ದುರ್ಬಳಪಣಾಕ ನಿಸತಾ ಕಂಯಿ. ವಿಶ್ವಾಂತು ತಶ್ಶಿ ೯ ಕೋಟಿ ಲೋಕ ಮಸ್ತ ದುರ್ಬಳಪಣಾಕ ಪಡ್ತಾತಿ ಮ್ಹೊಣು ಐ‌ಎಂಎಫ್ ಹಾಜೆ ಏಕ ಸಂಶೋಧನಾ ವರದಿಂತು ಸಾಂಗಲಾ. ಅಸ್ಸಲೆ ವೇಳ್ಯಾರಿ ಆತ್ಮಹತ್ಯಾ ಪ್ರಮಾಣ ಚ್ಹಡ ಜಾವಚೆ ಆತಂಕ ಖಂಡಿತ ಆಸ್ತಾ. ತ್ಯಾ ಖಾತ್ತಿರಿ ಸರಕಾರಾನಿ ಆನಿ ಸಂಘ-ಸಂಸ್ಥ್ಯಾನ ಹೇ ಖಾತ್ತಿರಿ ಲೋಕಾಂಕ ಜಾಗೃತಿ ದಿವಕಾ ಜಾಲೀಲೆ ಗರಜ ಆಸ್ಸಾ. ಗರೀಬ ಪಣಾಂಕ ಶಿರಕೂಚೆ ಲೋಕಾಂಗೆಲೆ ಉದರ್ಗತಿ ಖಾತ್ತಿರಿ ಖಂಚತರಿ ಪರಿಣಾಮಕಾರಿ ಯೋಜನಾ ಹಾಡಚೆ ಅಗತ್ಯತಾಯಿ ಆಸ್ಸಾ. 

ಆಮ್ಗೆಲೆ ಹಿಂದೂಸ್ತಾನಾಂತು ಆತ್ಮಹತ್ಯಾ ಕೊರನು ಘೆವಚಾಂತು ಪಂದ್ರ ತಾಕೂನು ತೀಸ ವರಸಾಚೆ ತರ್ನಾಟೆಲೆ ವಾಂಟೊಚಿ ಚ್ಹಡ. ಆಶ್ಚರ್ಯ ವಿಷಯು ಮ್ಹಳಯಾರಿ ೨೦೧೯ ಂತು ಚಲೀಲೆ ಆತ್ಮಹತ್ಯಾಂತು ಅನಕ್ಷರಸ್ಥಾಂಗೆಲೊ ವಾಂಟೊ ೧೨.೬ ಟಕ್ಕೆ ಜಾಲಯಾರಿ ವ್ಹರಲೀಲೆ ಸಕ್ಕಡ ವಿದ್ಯಾವಂತ. ತಾಂತೂಚಿ ೫೯.೨ ಟಕ್ಕೆ ಪ್ರಾಥಮಿಕ ಆನಿ ಹೈಸ್ಕೂಲ್ ಶಿಕ್ಷಣ ಮಾತ್ರ ಶಿಕ್ಕಿಲ್ಯಾನಿ ಆತ್ಮಹತ್ಯಾ ಕೊರನು ಘೆತಲ್ಯಾ. ಕರ್ನಾಟಕಾಚೆ ಸಂಖೊ ಮಾತ್ರ ಘೆತಲೇರಿ ಒಟ್ಟು ೧೧,೨೮೮ ಲೋಕಾನಿ ಆತ್ಮಹತ್ಯಾ ಕೊರನು ಘೆತಲ್ಯಾ. ತಾಂತು ೭,೫೪೨ ಲೋಕ ಪ್ರಾಥಮಿಕ ಆನಿ ಹೈಸ್ಕೂಲ (೧ ತಾಕೂನು ೧೦) ಶಿಕ್ವಣ ಶಿಕ್ಕಿಲಿ ಜಾಲಯಾರಿ ತಾಂತು ಪಿಯುಸಿ ಶಿಕ್ಕಿಲೆ ೧೪೬೬ ಲೋಕ, ಡಿಪ್ಲೊಮಾ/ ಐಟಿ‌ಐ ಶಿಕ್ಕಿಲೆ ೧೭೭ ಲೋಕ, ಪದವೀದರ ೫೨೫ ಲೋಕ, ಡಬಲ್ ಡಿಗ್ರಿ ಶಿಕ್ಕಿಲೆ ೪೦ ಜಾಲಯಾರಿ ಅನಕ್ಷರಸ್ಥ ಲೋಕ ೧೩೮೩ ಮಾತ್ರ ಆಸ್ಸಾತಿ. 

ಹೇ ಅಂಕಡೋ ಪಳಯತಾನಾ ಕಿತಯಾಕ ತರ್ನಾಟೆ ಲೋಕಚಿ ಚ್ಹಡ ಚ್ಹಡ ಆತ್ಮಹತ್ಯಾಕ ದೇಂವತಾತಿ ಮ್ಹಣಚೆ ಪ್ರಶ್ನೋ ಯವಚೆ ಸಹಜ. ಹಾಕ್ಕಾ ಕುಟುಂಬಾಂತುಲೆ ವೆಗವೆಗಳೆ ಸಮಸ್ಯೆ, ಪಾವಯಚಾಕ ಜಾಯನಾತ್ತಿಲೆ ರೀಣ, ಅನಾರೋಗ್ಯ, ಖಿನ್ನತಾ, ಜೀವನಾಂತು, ಶಿಕ್ಷಣಾಂತು, ಉದ್ಯೋಗಾಂತು ಘಡಚೆ ಹಾರ(ವಿಫಲತಾ), ವರದಕ್ಷಿಣೆ ತ್ರಾಸ, ಗರೀಬ ಪಣ, ಪಿವಡಪಣ, ಆನಿ ಡ್ರಗ್ ವ್ಯಸನ ಮುಖೇಲ ಜಾವ್ನು ದೆಕ್ಕೂ ಪಡತಾ. 

ತಾಂತೂಚಿ ತರ್ನಾಟೆಲೆ ಆತ್ಮಹತ್ಯೆಕ ಮೂಲಕಾರಣ ಸೊದಲಾರಿ ಮಸ್ತ ವೇಳ್ಯಾರಿ ತ್ಯಾ ಮಸ ಕ್ಚುಲ್ಲಕ ಮ್ಹೊಣು ದಿಸಚಾಕ ಪುರೊ. ಮಾಕ್ಕ ದಿಸತಾ ತರ್ನಾಟೆಂತು ಹೇ ಅಂಕಡ್ಯಾರಿ ಆತ್ಮಹತ್ಯಾ ಘಡಚಾಕ ಮುಖೇಲ ಕಾರಣ ತಾಂಕಾ ತಾಂಗೆಲೆ ಭವಿಷ್ಯಾಚೆ ಜೀವನಾಕ ಕಶ್ಶಿ ತಯ್ಯಾರ ಕೊರಕಾಕಿ ತಶ್ಶಿ ಆಮ್ಮಿ ತಯ್ಯಾರ ಕರತಾ ನಾಂತಿ. ಗಟ್ಟುಳ ಜಾಲೀಲೆ ಸೀಸಮ್ ರುಕ್ಕಾ ವರಿ ವಾಡ್ಡಯಚೆ ಸೋಡ್ನು ಮಸಿಂಗಾಸಾಂಗಾಚೆ ರುಕ್ಕಾವರಿ ವಾಡ್ಡಯತಾ ಆಸ್ಸಾತಿ. ಹರ್‍ಯೇಕ ಕುಟುಂಬಾಂತು ಏಕ ಜಾಂವೊ ದೋನ ಚರಡುಂವ ಮಾತ್ರ ಆಸ್ಸುಚೆ ನಿಮಿತ್ತಯಾನ ತಾಂಕಾ ಸಾನ್ಪಣಾಂತು ಖಂಚೇಯಿ ಕಷ್ಟ ಜಾವಚಾಕ ನಜ್ಜ, ದುಃಖ ಜಾವಚಾಕ ನಜ್ಜ ಮ್ಹೊಣು ಮ್ಹೋಗಾನಿ ನಿಮ್ ನಿಮ್ಗಿಲೀಲೆ ಸಕ್ಕಡ ಹಾಡ್ನು ದೀವ್ನು ಕಷ್ಟಾಚೆ ಹುನ್ಸಣಿ ಆಪ್ಲೆ ಚರಡುವಾಂಕ ಲಾಗಚಾಕ ನಜ್ಜ ಮ್ಹೊಣು ಪೋಷಕಾನಿ ಕೊರಚೆ ಕೊಂಗಾಟಾನಿ ಮುಖಾರಚೆ ಜೀವನಾಂತು ತೋ ಸಾನ ಸಾನ ಕಷ್ಟ, ದುಃಖ, ಅಪಮಾನಾಕ ವರೇನ ಠಕ್ಕುನು, ಥರಥರೂನು ವತ್ತಾ. ಮಾನಸಿಕ ದೌರ್ಬಲ್ಯಾಕ ಮೆಳೀಲೆ ಲೋಕ ವರೇನ ವ್ಹಡ ಅಂಕಡ್ಯಾರಿ ಆತ್ಮಹತ್ಯಾ ಕೊರನು ಘೆತ್ತಾತಿ. ತಾಂಗೆಲೆ ಕುಟುಂಬಾಚಾನ ಚಿಕ್ಕೆ ಮುಂಜಾಗ್ರತ ಘೆತಲೇರಿ ತಾಂಕಾ ವಾಂಚೊನು ಘೆವಚಾಕ ಜಾತ್ತಾ. ಖನ್ನತಾ ಇತ್ಯಾದಿ ಮನಾಚೆ ಕಾಯ್ಲೋ ಆಯ್ಯಿಲ್ಯಾಂಕ ಮಾನಸಿಕ ವೈದ್ಯಾಂಕ ದಾಖಯಕಾ. ಚಿಂತಾ ಚಿತೆಕ ಆಪೋನು ವ್ಹರತ. ತ್ಯಾ ಖಾತ್ತಿರಿ ಪಯಲೆ ತಾಜೇನ ಭಾಯರ ಯವಕಾ. 

ಚರಡುವಾಂಕ ಕಷ್ಟ ಕೊಳಚಾಕ ನಜ್ಜ ಮ್ಹೊಣು ದಾಂಪುನು ದವರಚೆ ಪಶಿ ಜೀವನಾಂತು ಕಷ್ಟ, ದುಃಖ, ಅಪಮಾನ ಯವಚೆ ಖಂಡಿತ ಜಾಲ್ಯಾರಿ ತ್ಯಾ ಆಯ್ಯಿಲ ತೆದ್ನಾ ತಾಜೇನಿ ಕಶ್ಶಿ ಪಾರ ಜಾವ್ಕಾ ಮ್ಹಣಚೆ ಕಳೋಕಾ. ಏಕ ವಾಟ ದಾಂಪಿಲೆ ಮ್ಹಳೆಲ ತೆದ್ನಾ ಹತಾಶ ಜಾವ್ನು ವಚ್ಚೆ ಬದಲಾಕ ಉಗಾಡ್ಚೆ ಶಂಬರ ವಾಟ ಸೊಚ್ಚೆ ಚಾಕಚಕ್ಯತಾ ತಾಂಕಾ ಯವಚೆ ವರಿ ಕೊರಕಾ. ತಾಂಗೆಲೆ ಮಾತ್ತೆಂತು ದುಡ್ಡು, ಸಂಪತ್ತಾಚೆ ತಾಕೂನು ಮೆಳಚೆ ಪ್ರತಿಷ್ಠಾ ಮಾತ್ರ ಬೋರನಾಕ್ಕಾತಿ. ಮ್ಹೋಗು, ನಮ್ರತಾ, ದುಸರ್‍ಯಾಂಕ ಮಾನ ದಿವನು ವಾಂಚೆ ವಾಟಯಿ ದಾಖಯಾ. ನಿರಂತರ ಪ್ರಯತನ ಕೊರಚೆ ಅಭ್ಯಾಸು ತಾಂಕಾ ಶಿಕಯಾ. ಕಷ್ಟ, ದುಃಖ ಸಕ್ಕಡ ಕೆದನಾಂಯಿ ನಿರಂತರ ಜಾವನು ಆಸ್ಸನಾ, ಉವಾರೆಂ ವರಿ ಅಶ್ಶಿ ಯೆವ್ನು ತಶ್ಶಿ ವತ್ತಾ ಮ್ಹಣಚೆ ತಾಂಕಾ ಕಳೇಯಾ. ಪರಮಾತ್ಮು ನಾಂಚಿ ನಾ ಮ್ಹೊಣು ತುಮ್ಮಿ ಖಡಾಖಂಡಿತ ಜಾವ್ನು ಲೆಕ್ಕೂನು ಆಸಲೇರಿ ವರೇನ ಸಂಕಷ್ಟ ವೇಳ್ಯಾರಿ ಪರಮಾತ್ಮಾಕ ಮಾಗಲೇರಿ ತೋಂ ಯವ್ನು ರಾಕತಾ ಮ್ಹಣಚೆ ಭರ್‍ವಸ ಚರಡುವಾ ಮನಾಂತು ಭರಾ. ತೆದ್ನಾ ಆಪಣಾಕ ರಾಕತಲೊ ದೇವು ಮ್ಹಣತಲೊ ಏಕಳೋ ಆಸ್ಸಾ ಮ್ಹಣಚೆ ನಂಬಿಗಾ ತಾಂಕಾ ಯವ್ನು ತಾನ್ನಿ ಆತ್ಮಹತ್ಯಾ ತಸ್ಸಾಲೆ ವಾಯಟ ಕಾಮ್ಮಾಕ ಮುಖಾರ ಸರನಾತಿ. ಕಿತಯಾಕ ಮ್ಹಳಯಾರಿ ಮನುಷಾಲೆ ಭಿತ್ತರಿ ಏಕ ಅಣುಬಾಂಬ್ ಪಶಿ ಚ್ಹಡ ಶಕ್ತಿ ಆಸ್ಸಾ ಮ್ಹಣಚೆ ಆಮ್ಮಿ ಕೆದನಾಂಯಿ ವಿಸರಚಾಕ ನಜ್ಜ. ತ್ಯಾ ಶಕ್ತಿ, ಪ್ರತಿಭಾ ಹರ್‍ಯೇಕ ಮನುಷಾ ಭಿತ್ತರಿ ಆಸ್ಸಾ. ಸುಖಾಂತು, ಮಜಾ-ಮಸ್ತಿಂತು ಉರಲ್ಯಾರಿ ತ್ಯಾ ಪ್ರಕಟ ಜಾಯನಾ. ದೋನ ಪಾತ್ತೊರು ಘಸ್ಟಿಲಿ (ಘರ್ಷಣ) ತೆದ್ನಾ ಉಜ್ಜೊ ಉಟಯಚೆ ವರಿ ಕಷ್ಟ, ದುಃಖ, ಹತಾಶಾ ವೇಳ್ಯಾರಿಚಿ ತಾಗೆಲೆ ಭಿತ್ತವಯಲೆ ಶಕ್ತಿ ಪ್ರಗಟ ಜಾವಚೆ. 

ಹೇ ಜಗಾಂತು ಜಾವನು ಘೆಲೀಲೆ ಮಹಾ ಮಹಿಮ, ಸಾಧಕಾಲೊ ಜೀವನ ವಾಚಲಾರಿ ಹೇ ಸ್ಪಷ್ಟ ಜಾವನು ಕಳ್ತಾ. ಕಷ್ಟಾಚೆ ಉವಾರೆಂತು ಪೋಂವತಲೊ ಮಾತ್ರ ತಾಜೇನ ಚುಕ್ಕೊನು ಘೆವಚೆ ಉಪಾಯು ಸೊಚ್ಚೆ ಪ್ರಯತನ ಕರತಾ. ಸುಖಾಂತು ಆಶ್ಶಿಲ್ಯಾಕ ತಾಜೆ ಗರಜ ಪಡನಾ. ತ್ಯಾ ಕಾರಣಾನಿ ಸಾಧಕಾಂಗೆಲೊ ಜೀವನ ಚರಡುವಾಂಕ ಕಳೋನು ಕಷ್ಟ ಜೀವನಾಚೆ ಅವಿಭಾಜ್ಯ ಅಂಗ ಮ್ಹಣಚೆ ತಾಂಕ ಕಳೋವಕಾ. 

ಆತ್ಮಹತ್ಯಾ ಖಂಡಿತ ಕ್ಷಮಾರ್ಹ ನ್ಹಂಹಿ. ಆನಿ ಸಕ್ಕಡ ಸಮಸ್ಯಾಂಕ ಪರಿಹಾರು ವರೇನ ನ್ಹಂಹಿ. ಏಕಳ್ಯಾನಿ ರೀಣ ಕೊರನು ಪಾರಿಗತ ಕೊರಚಾಕ ಜಾಯನಿ ಮ್ಹೊಣು ಆತ್ಮಹತ್ಯಾ ಕೊರನು ಘೆತಲೇರಿ ತಾಮಗೆಲೆ ಕುಟುಂಬಾಕ ಅಪವಾದು ಯಾನಾವೇ? ತ್ಯಾ ಸಕ್ಕೆ ಕಾರಣಾನಿ ಆಮ್ಗೆಲೆ ವೇದ, ಪುರಾಣ, ಧರ್ಮಗ್ರಂಥಾಂತು ವರೇನ ಆತ್ಮಹತ್ಯಾ ಮಹಾಪಾಪ ಮ್ಹೊಣು ಸಾಂಗಲ್ಯಾ. ಕೊಣೇಯಿ ಆತ್ಮಹತ್ಯಾಚೆ ದೌರ್ಬಲ್ಯಾಕ ಶಿರಕೂನಾಕ್ಕಾತಿ.