ಕ್ರೂರಿ ತೂಂ ಕರೋನಾ!!

“ಏಯ್ ಮಡ್ಯಾ... ಹಾತ್ಪಾಯು ನಾಶಿ ಲಂಗಡಾ ಜಾಲೀಲೊ ತುಕ್ಕಾ ಅಕ್ಕಲ ನಾಂವೆ? ದಾರಲೆ ಸಕ್ಕಡ ಜವಣಾಕ ಎತ್ತನಾ ರಾಂಚೊಸರೆಕ ಯವಚಾಕ ನಜ್ಜ ಖಂಚತರಿ ಮೂಲ್ಲೆಂತು ಬಸಕಾ ಮ್ಹೊಣು ಗೊತ್ನಾವೇ ತುಕ್ಕಾ.... ಮ್ಹಣ್ತಾ ನಾಗೇಶಾಲಿ ವೈನಿ ಆಪ್ಲೆ ದೊನ್ನೀ ದೋಳೆ ಘುರಘುರಯ್ತಾ ದೇರಾಕ ಲಾಸ್ಸುನು ಉಡಯಚ ವರಿ ಪಳೈಲಿ.

“ಮಸ್ತ ತಾನ ಜಾತ್ತಾಶ್ಶಿಲೆ ವೈನಿ; ವೈಶಾಕ ನ್ಹಂಹಿವೇ? ಏಕ ಲೋಟೊ ಉದಾಕ ಪೀವನು ವಚ್ಚೆ ಮ್ಹೊಣು ಆಯಲೊ..  ಆನಿ ತೀ ಖಂಯಿ ಮಾರ್‍ತಕಿ ಮ್ಹಣಚೆ ಭಯ್ಯಾನಿ ಮ್ಹಳ್ಳೊ. 

“ಅಯ್ಯೋ ಪಾಪ ಘರಾ ಭಿತ್ತರಿ ತೀನ ವೇಳು ಕವಳಾ ಗಿಳತಾ ಬೊಸಚೆ ತುಕ್ಕಾ ಮಸ್ತ ಧಗ್ಗ ಜಾತ್ತಾ ನ್ಹಂಹಿವೇ? ತಶಿ ಜಾಲಯಾರಿ ಭಾಯರಿ ವಚ್ಚೂನು ಘೋಳ್ನು ಹಾಡಚೆ ತುಗೆಲೆ ಬಾಬ್ಬಾವಾಕ ಕಿತ್ಲೆ ತಾನ ಜಾವನು ಆಸ್ಸುಕಾ ನ್ಹಂಹಿವೇ? ಮ್ಹೋಣು ನಾಂಕ ತಿರಪೂನು ತಾಕ್ಕೇಕ ಪಟಿ ಕಿಡಯಿಲಿ ತೀ ಡೈನಿಂಗ್ ಟೇಬಲ್ಲಾ ವಯ್ರಿ ದವರಿಲೆ ತಾಂಬಿಯೋ ಘೇವ್ನು ತಾಂತುಲೆ ಪೂರ್ತಿ ಉದಾಕ ತಾಗೆಲೆ ಮಾತ್ತೆರಿ ರೊಕೊನು ಸೊಡಲಿ. 

“ಧಗ್ಗಾನಿ ಆಯ್ಯಿಲೆ ಮರಾಯಾಕ ಆತ್ತ ಚಿಕ್ಕೆ ತಂಪ ಜಾಲ್ಲೆ ನ್ಹಂಹಿವೇ? ಮನಾಂತೂ ಆನಂದ ಪಾವ್ತಾ ಪರತ ಕಿಡಯತಾ ಸಸಾರಾನಿ ರಿತ್ತೆ ಜಾಲೀಲೆ ತಾಂಬಿಯೋ ಪರತ ಭೊರನು ಯವಚಾಕ ಡ್ರಮ್ಮಾಲಾಗ್ಗಿ ಘೆಲ್ಲಿ. 

ಜಾಲಯಾರಿ ವೈನಿನಿ ತಿತ್ಲೆ ಕ್ರೂರ ವರ್ತನಾ ದಾಖಯಲಾರಿಚಿ ತಿಗೆಲೆ ಕ್ರಿಯೆಕ ಪ್ರತಿರೋಧ ದಾಖಯಚೆ ಪರಿಸ್ಥಿತಿಂತು ನಾಗೇಶು ನಾಶಿಲೊ. ತಾಣೆ ಚಿಕ್ಕೆ ಪಿರ್-ಪಿಟ್ ಮ್ಹಳಯಾರೀಚಿ ಅಣ್ಣಾಲೆ ಹಾತ್ತಾಂತು ಬ್ಯಾತ ಪ್ರತ್ಯಕ್ಷ ಜಾವನು ತಾಗೆಲೆ ಆಂಗಾರಿ ತಾಂಬಡೆ ತಾಂಬಡೆ ಬರೇ ಉಟಯತಾ ಆಶಿಲೆ. ತ್ಯಾ ಕಾರಣಾನಿ ಆಪಲೆ ಓಂಟ ಚಾಬ್ಬೂನು ಘೇವ್ನು ನಾಗೇಶು ಭಾಯರ ಯವ್ನು ಆಪಲೆ ಸ್ವಸ್ಥಾನಾಕ ವಚ್ಚುನು ಬಸಲೊ. ಪೊಟ್ಟಾಂತು ಜಾವಚೆ ತಾನಾಪಶಿ ತೀಕ್ಷ್ಣಜಾವನು ವೈನಿನ ಕೆಲೀಲೆ ಅಪಮಾನಾಚೆ ಉಜ್ಜೊಚಿ ತಾಕ್ಕಾ ಲಾಶ್ಶಿತಾ ಆಶಿಲೆ. ತಾಜ್ಜ ಬರಶಿ ಆತ ಭೂಕ್ಕಿನಿ ಪೋಟ ವರೆನ ತಾಳ ಮಾರಚಾಕ ಲಾಗ್ಗಿಲೆ... ಪೊಟ್ಟಾ ಭೂಖಿ ಜಾಲ್ಲಾ ಮ್ಹೊಣು ತಾಣೆ ಭಿತ್ತರಿ ವಚ್ಚೆ ತಶ್ಶಿ ನಾಶಿಲೆ... ಪರತ ಅಪಮಾನು.... ಮಾರು.... ಆಪಲೆ ದೀನ ಪರಿಸ್ಥಿತಿ ಯವಜೂನು ನಾಗೇಶಾಲೆ ದೋಳ್ಯಾಚಾನ ದೋಳೆ ಉದ್ದಾಕ ದಳದಳ ಪೋವಚಾಕ ಲಾಗಲೆ. ಜಾಲಯಾರಿ ತಾಗೆಲೆ ದುಖ್ಖ ಆಯಕೂಚೆ ತಿತ್ತುಲೆ ಪುರುಸೊತ್ತಿ ತೆ ಘರಾಂತು ಕೋಣಾಕ ಆಸ್ಸಾ. 

ವೈನಿನ ತಾಂಬಿಯ ಬಽರಿ ರೊಕಯಿಲೆ ಶಾಳುದ್ಕಾ ಕಾರಣಾನಿ ನಾಗೇಶಾಲೆ ಚಡ್ಡಿ, ಶರ್ಟ್ ದೊನ್ನೀ ವಾಲ್ಲೆ ಜಾಲೀಲೆ. ತ್ಯಾ ಬದಲ ಕೊರಕಾ ಮ್ಹಳಯಾರಿ ಆಪಣಾನಿ ಆಜಿ ಉಂಬಳ್ನು ಆಂಗ್ಣಾಂತು ಸೂಕಯಿಲೆ ಚಡ್ಡಿ ಆನಿ ಚೋಗೊ ಘೇವ್ನು ಯವ್ಕಾ. ತ್ಯಾಂಚಿ ಸುಕಲಾಕಿ ನಾಂಕಿ.... ತಾಜ್ಜ ಬದಲಾಕ ಆಪಣೇನಿಚಿ ಥೊಡೆ ವೇಳು ವಚ್ಚುನು ವಾತ್ತಾಂತು ಭೊಸಚೆ ಚಾಂಗ... ತಿಂಬಿಲೆ ಆಂವ್ಗಲೆ ಥಂಯಿಚಿ ಸುಕತಾತಿ.... ನೆಸ್ಸಣಿ ಬದಲ ಕೊರಚೆ ಘೋಟಾಳೊ ಆಸ್ಸನಾ ಅಶ್ಶಿ ಸಮಜೂನು ನಾಗೇಶು ಪೊಟ್ಟಾ ಭೂಖಿ ಗೀಳ್ನು ಘೇವ್ನು ಆಪಲೆ ಹಾತ್ತಾಚೆ ಮದತ್ತಾನಿ ಭಾಯ್ರ ವಾತ್ತಾಕ ಯವ್ನು ಸಕಡಾಲೆ ಜವಣ ಜಾವಚೇಚಿ ರಾಕತಾ ಬೈಸಲೊ. 

ಘರ್‍ಚಿ ಏಕ್ಕೇಕ್ಲಿ ಜೆವಣ ಕೋರ್ನು ಬಾಯ್ರಿ ಯತ್ತಾ ಉರತಾತಿ. ಜಾಲ್ಯಾರಿ ಭಾಯರಿ ವಾತ್ತಾಂತು ಏಕ ಫಾತ್ರಾರಿ ಬಶ್ಶಿಲೆ ನಾಗೇಶಾಕ ಕೋಣೇಯಿ ಹಾಂಗಾ ಇತಯಾಕ ಯವ್ನು ಬಸಲಾ, ಆಂಗ  ಚಡ್ಡಿ, ಚೋಗೋ ದೊನ್ನೀ ವಾಲ್ಲೆ ಜಾಲ್ಲಾಮೂ ಕಶ್ಶಿ ಮ್ಹೊಣು ನಿಮ್ಗಿನಾತಿ. ಜೆವಣಾಕ ಯೋ ಮ್ಹೋಣು ಸಾಂಗ್ನಾತಿ. ಹೋಯಿ ಹೇ ನಾಗೇಶಾ ಘರ್‍ವೆ ಪ್ರತಿ ದಿವಸಾ ರಿವಾಜು, ಪೂರಾ ಲೋಕಾಲೆ ಜೆವಣ ಜಾವ್ನು ಘರ್‍ಚೇನ, ಸೂನ್ನೇನ ಪುಸ್ಸುನು ಜೇವ್ನು ಜಾಲ್ಲ ಮಾಗಿರಿ ಕಾಯತರಿ ಮೂಳ ಲಾಗ್ಗಿಲಕಿ ನಾ ಬೆಳಸಲೀಲೆ ಉರಲೇರಿ ವೈನಿ ಏಕ ಅಲ್ಯೂಮಿನಿಯಂ ವಾಟ್ಟೆಂತು ಸೂಣ್ಯಾಕ ಘಾಲೀಲ ವರಿ ವಾಣು ದವರ್‍ತಾಶ್ಶಿಲಿಂ. ನಾಗೇಶಾನ ತೆವಳತಾ ವಚ್ಚೂನು ತ್ಯಾಂಚಿ ಜೇವ್ನು ವಾಟ್ಟೆ ಧೂವ್ನು ದವರೂನು ಯೇವ್ಕಾ ಆಶ್ಶಿಲೆ. 

ಹೋಯಿ ನಾಗೇಶು ಏಕಳೋ ದೊನ್ನೀ ಪಾಯು ನಾತ್ತಿಲೊ ಲಂಗಡಾ(ಪಂಗೂ), ಖಂಯಿ ವಚಕಾ ಜಾಲಯಾರೀಚಿ ಆಪಲೆ ಹಾತ್ತಾಚೆ ಮದತ್ ಘೇವ್ನು ಘೂವ್ತಾಶಿಲೊ. ಘರಾ ಭಾಯರ ವಚ್ಚೆಕ ತಾಕ್ಕಾ ತಾಗೆಲೆ ಮಾಮ್ಮಾನಿ ದಿಲೀಲೆ ಲಾಕಡಾಚೆ ಚಾರ ಚಕ್ರಾಚೆ ಸಾನ ಏಕ ಗಾಡಿಶಿ ಆಶ್ಶಿಲೆ. ಏಕ ಫಳ್ಯಾಕ ಚಾರ ಚಕ್ಕರ ಲಾವ್ನು ಆಶಿಲೆ ಗಾಡಿ ತೆ. ತ್ಯಾ ವರೆನ ನಾಗೇಶಾನಿ ಹಾತ್ತಾಂತೂಚಿ ಧೂಂಗುಳ್ನು ಘೆತ್ತಾ ವಚಕಾ ಆಶಿಲೆ. ಘರ್‍ಚೆ ಕೋಣ ತರಿ ತಾಗೆಲೊಟ್ಟು ವಚಕಾ ಮ್ಹಳಯಾರಿ ಅಳ್ಸಿಕ, ಅಪಮಾನ ಮ್ಹೊಣು ಸಮಜೂನು ಘೆತ್ತಾ ಆಶ್ಶಿಲೆ. ತೋ ಅಪ್ರಯೋಜಕು, ಖಂಚಕಿ ಜನ್ಮಾಂತು ಕೆಲೀಲೆ ಪಾಪಕರ್ಮ ಆತ್ತ ಭೊಗತಾ ಆಸ್ಸ ಮ್ಹಣಚೆ ಭಾವನಾ ಘರಚೆ ಸಕಟಾಂಕ ಆಶ್ಶಿಲೆಂ. ಘರಾಂತುಲೆ ಪಾಂಚ ವರ್ಷಾ ಚರಡಾ ತಾಕೂನು ಸಾಠ ವರ್ಷಾ ಮಾಂತಾರೆ ಪುಸ್ಸುನು ಸರ್ವ ಲೋಕ ತಾಕ್ಕಾ ಸಸಾರ ಕರತಾ ಆಶ್ಶಿಲೆಂ. ನಾಗೇಶಾಲೆ ಆನ್ನೇಕ ದುರದೃಷ್ಟ ಮ್ಹಳಯಾರಿ ತಾಕ್ಕಾ ಅವಯಿ ನಾಶ್ಶಿಲಿಂ!

ನಾಗೇಶಾ ಬಾಪ್ಪೂಸು ಗುರುನಾಥು, ರೈಲ್ವೆಂತು ನೌಕರಿ ಕರ್‍ತಾಶ್ಶಿಲೊ. ರಿಟೈರ್‍ಡ್ ಜಾವ್ನು ಖಾಲಿ ತೀನ ವರ್ಷ ಮಾತ್ರ ಜಾಲೀಲೆ. ಗುರುನಾಥಾಕ ತೀನ ಚಲ್ಲ್ಯಾ ಚರ್ರ್‍ಡುಂವ ಆನಿ ಏಕಳೀ ಚೆಲ್ಲಿ. ಗುರುನಾಥಾಲೆ ಬಾಯ್ಲ ಅಮ್ಮಣಿ, ಸಾತ ವರ್ಷಾ ಮಾಕ್ಷಿ ಟೈಫಾಯಿಡಾನ ದೇವಾಲೆ ಪಾಯಾ ಮೂಳಾಕ ಘೆಲ್ಲೇಲಿ. ಚರಡುವಾಂತು ನಾಗೇಶೂಚಿ ಸಾನು. ತಾಕ್ಕಾ ಆತ್ತ ವೀಸ - ಏಕ್ವೀಸ ವರ್ಷಪ್ರಾಯು. ಉರಿಲೆ ದೊಗ್ಗ ಗಿರಿಧರ ಆನಿ ಶ್ರೀಧರ ಮ್ಹೋಣು. ದೊಗ್ಗಾಂಕ ವ್ಹಡ ವ್ಹಡ ನೌಕರಿ ಆಸ್ಸಾ. ಲಗ್ನ ಜಾವನೂ ದೊಗ್ಗಾಂಕ ದೊಗ್ಗ ದೊಗ್ಗ ಚರ್ರ್‍ಡುಂವ ವರೇನ ಆಸ್ಸಾತಿ. ನಾಗೇಶಾಲಿ ಏಕಳೀಚಿ ಭಯಿಣಿ ಶ್ರೀಲತಾ. ತಿಕ್ಕಾಯಿ ಲಗ್ನ ಜಾಲ್ಲಾ. ತೀ ಬಾಮ್ಣಾ ಒಟ್ಟು ದಾವಣಗೆರೆಂತು ಆಸ್ಸಾ. ತಿಕ್ಕಾ ಏಕ್ಲಿ ಚೆಲ್ಲಿ ಮಾತ್ರ! 

ನಾಗೇಶಾಲೆ ಸಾಡಿಪಾಂಚ ವರ್ಷಾ ಪ್ರಾಯಾಂತು ಘರ್‍ಚೆ ಸಕ್ಕಡ ಕುಟುಂಬಾಚಿ ಮೇಳ್ನು ಭಾಡೇ ಕಾರ ಘೇವನು ಮೈಸೂರಾಕ ಘೆಲೀಲೆ. ಥಂಯಿ ಮ್ಹಾರಾಜಾಲೆ ರಾವಳಾರ, ಜೂ, ಕನ್ನಂಬಾಡಿ ಸಕ್ಕಡ ಪಳೋನು ಬೆಂಗಳೂರಾ ಯವ್ನು ಥಂಯಿ ವಿಧಾನಸೌಧ ಸಕ್ಕಡ ಪಳೋನು ಪರತ ಯವಚೆ ತಾಂಗೆಲೆ ಪ್ಲ್ಯಾನ್ ಜಾವನು ಆಶಿಲೆ. ತಶೀಚಿ ತಾನ್ನಿ ಮೈಸೂರ್‍ಚಾನ ಬೆಂಗಳೂರಾಕ ಎತ್ತಾ ಆಸತನಾ ಜೆವಣಾಕ ಮ್ಹೊಣು ಡ್ರೈವರು ಏಕ ದಾಬಾ ಮುಖಾರಿ ಕಾರ ರಾಬಯಲೊ. ನಾಗೇಶು ಸಕಟಾ ಪಶಿ ದಾಖಲೊ... ತ್ಯಾ ಖಾತ್ತಿರಿ ಅವಯಿ-ಬಾಪಯಿ ಮಾತ್ರ ನ್ಹಂಹಿ ಬಾಬ್ಬಾವ, ಬೈಣಿ ವರೇನ ತಾಕ್ಕಾ ಮಸ್ತ ಮ್ಹೋಗು ಕರತಾ ಆಶ್ಶಿಲೆ. ತಾಜೆನಿ ತಾಗೆಲೆ ಫಟಿಂಗಪಣ ಚ್ಹಡಾಶ್ಶಿಲೆ. ದಾಬಾಂತು ಜೇವ್ನು ಡ್ರೈವರಾನಿ ಕಾರ ರಿವರ್ಸ್ ಘೆವಚೆಚಿ ರಾಕತಾ ತಾನ್ನಿ ರಸ್ತ್ಯಾ ಬಗಲೇನ ರಾಬಿಲ ತೆದ್ನಾ ನಾಗೇಶು ಬೈಣಿಲಾಗ್ಗಿ ಖಂಚಕಿ ಮಾಂಕಡಛಾಪ ಕೊರಚಾಕ ಘೆಲ್ಲೊ. ತೀಣೆ ಮಾರಚಾಕ ಆಯ್ಯಿಲ ತೆದ್ನಾ ರಸ್ತ್ಯಾರಿ ಧಾವ್ಲೊ. ತೆ ಹೈವೆ ನ್ಹಂಹಿವೇ? ಮಸ್ತ ಫಾಸ್ಟಾರಿ ಎತ್ತಾ ಆಶಿಲೆ ಏಕ ಕಾರಾಚೊ ನಾಗೇಶಾನಿ ರಸ್ತ್ಯಾರಿ ಆಯ್ಯಿಲೆ ಪಳೋನು ಸಡನ್ ಜಾವ್ನು ಬ್ರೇಕ್ ಘಾಲ್ಲೊ. ಜಾಲಯಾರಿಚಿ ಜಾವಚೆ ಲುಕ್ಸಾನ ಚುಕ್ಕೆಚಾಕ ತಾಜೆನಿ ಜಾಯನಿ. ಅಪಘಾತ ಘಡ್ನೂ ಸೊಡ್ತಾ. ನಾಗೇಶಾಲೆ ಜೀವು ವಾಂಚ್ಲೆ ಜಾಲಯಾರೀಚಿ ಕಾರಾ ಚಕ್ರ ನಾಗೇಶಾಲೆ ಪಾಯ್ಯಾರಿ ಘೆಲೀಲೆ ಕಾರಣಾನಿ ತಾಗೆಲೆ ದೊನ್ನೀ ಪಾಯು ಕಾತ್ತರಕಾ ಜಾಲ್ಲೆ.

ಹಾಜೆನಿ ನಾಗೇಶಾಲೆ ಜೀವನ ಕಾಳ್ಕಾಗೂಯ್ಯಿ ಜಾಲಯಾರೀಚಿ ಘರ್‍ಚಾಂಕ ಹಾಜೆನಿ ಚಾಂಗಚಿ ಜಾಲ್ಲೆ. ಇನ್ಸೂರೆನ್ಸ್ ಕಂಪ್ನಿ ತರಪೇನ ನಾಗೇಶಾ ಆನ್ನಾಕ ನವ್ವಾ ಲಾಕ್‌ರೂಪಯಿ ಪರಿಹಾರು ಮೆಳ್ಳೆ. ಪಂದ್ರ - ಸೋಳಾ ವರಸಾ ಮಾಕಸಿ ನವ್ವ ಲಾಕ್ ರೂಪಯಿ ಮ್ಹಳಯಾರಿ ವ್ಹಡ  ಮೊತ್ತಚಿ! ವೀಸ ವರಸ ನೌಕ್ರಿಕ ಘೆಲಯಾರೀಚಿ ಹಾತ್ತಾಂತು ಚಾರ ಕಾಸ ದವರೂನು ಘೆವಚಾಕ ಜಾಯನಾತ್ತಿಲೊ ನಾಗೇಶಾ ಆನೂ ಹೇ ದುಡವಾನಿ ಪಾಂಚ ಲಾಕ ದೀವ್ನು ಏಕ ಸ್ವಂತ ಘರ ಘೆತ್ತಾ. ವ್ಹರಲೀಲೆ ದುಡವಾಂತು ದೊಗ್ಗ ಚರಡುವಾಂಕ ಇಂಜಿನಿಯರ್ ಕಾಲೇಜಾಕ ಘಾಲ್ನು ಬಿ.ಇ. ಶಿಕಯತಾ. ಚೆಲಿಯೇಕ ಚಾಂಗ ಘರಾಣಿ ಸೊದ್ದುನು ವ್ಹರಡಿಕ ಕರತಾ. ಹೆ ಸಕ್ಕಡಾಕ ನಾಗೇಶೂಚಿ ಕಾರಣ ಮ್ಹಣಚೆ ಕೃತಜ್ಞಾ ಭಾವನಾ ಸುರವೇಕ ಥೊಡೆ ದಿವಸು ಘರ್‍ಚೆ ಸಕಟಾಂಕ ಆಶ್ಶಿಲೆ. ಸಕ್ಕಡ ಲೋಕ ತಾಕ್ಕಾ ಮಸ್ತ ಮ್ಹೋಗಾನಿ ಪಳೋನು ಘೆತ್ತಾ ಆಶಿಲೆ. ತಾಂತು ಕನಿಕರ ವರೇನ ಭೊರನು ಆಸ್ತಾಶ್ಶಿಲೆ. ಘರಾಕ ಸುನ್ನಾನಿ ಪಾಯು ದವರ್‍ಲೆ ಮಾಗಿರಿ ಹೇ ಭಾವನಾ ಮಾಯಕ ಜಾವನು ನಾಗೇಶು ನಿಷ್ಪಯೋಜಕು, ದಂಡಾಕ ಪಡೀಲೆ ಜೀವಿ ಮ್ಹಣಚೆ ಸಸಾರ ಭಾವನಾ ತಾಗೆಲೆ ಬಾಬ್ಬಾವಾನಿ ವಾಡ್ಡೊನು ಘೆತ್ಲೆ. ತಾಜ್ಜೆ ಉಪರಾಂತ ನಾಗೇಶು ಆಜಿ ಪುಸ್ಸುನು ದೋಳೆ ಉದ್ಕಾಂತೂಚಿ ಹಾತು ದುತ್ತಾ ಆಸ್ಸ. ಆವ್ಸುನು ಜೀವಂತ ಆಶ್ಶಿಲೆ ತಿತ್ಲೆ ಕಾಳ ತೀ ತಾಗೆಲೆ ಖಾತ್ತಿರಿ ಚಿಕ್ಕೆ ಪೂಣ ಮ್ಹೋಗು, ಕನಿಕರ ದಾಖಯತಾಶಿಲಿ. ಚರಡುಂವ, ಸುನ್ನಾನಿ ಕಸ್ಸಲೆಂ ಮಳ್ಳ್ಯಾರೀಚಿ ನಾಗೇಶಾಕ ವೇಳ ವೇಳಾಕ ಖಾಣ-ಜೆವಣ ದಿವ್ಚಾಕ ವಿಸರ್‍ನಾಶ್ಶಿಲಿ. ದೋನ ದಿವಸಾಕ ಏಕ ಪಂತ ಪೂಣಿ ತಾಕ್ಕಾ ಚ್ಹೋಖ ಕೊರನು ನಾಣೈತಾ ಆಶ್ಶಿಲಿ.

ಆವ್ಸುನು ಮೆಲ್ಲ್ಲ ಮಾಗಿರಿ ನಾಗೇಶಾಲೆ ಜೀವನ ಆನಿ ಇತ್ಲೆ ಕಷ್ಟಮಯ, ದುಖ್ಖಮಯ ಜಾಲ್ಲೆ. ಸೂಣೆ ಪಶಿ ಪಾಸ್ಟ್ಟ್ ಜಾಲ್ಲೆ. ಆಠ್ವಡೆಕ ನ್ಹಂಹಿ ಮೈನ್ಯಾಕ ಏಕ ಪಂತಾ ತಾಣೆ ನಾಯ್ನಾ ಜಾಲ್ಲ್ಯಾರೀಚಿ ತಾಕ್ಕಾ ಸಾಂಗ್ತಾಲಿ ಕರ್‍ತಾಲಿ ನಾಶಿಲೆ. ಉಪಾಸಿ ಆಸ್ಸಮೂ.. ಪಾಪ..... ಮ್ಹೋಣು ಕನಿಕರ ಪಾವ್ತಾಲಿಂ ನಾಶ್ಶಿಲೆಂ. ಪೂರಾ ಲೋಕಾನಿ ಪಿಚ್ಚರಾಕ, ಪಿಕ್‌ನಿಕ್ಕಾಕ, ಲಗ್ನಾಕ, ಮೂಂಜಿಕ ಮ್ಹೊಣು ಘೆಲೀಲೆ ತೆದನಾ ನಾಗೇಶು ಘರ ರಾಕಚೊ ಸೆಕ್ಯೂರಿಟಿ ಗಾರ್ಡ್ ಜಾವನು ಉರಕಾ ಆಶ್ಶಿಲೆ. ಉರಿಲೆ ಸಕ್ಕಡ ಲೋಕಾನಿ ಹಾಸ್ತಾ, ಆನಂದಾನಿ ಒಟ್ಟು ಬೈಸೂನು ಉಲ್ಲಯತಾ ಆಸ್ತಾನಾ ನಾಗೇಶು ಏಕ ಮುಲ್ಲೆಂತು ಪೋಣು ಪಿಳಿ ಪಿಳಿ ಮ್ಹೋಣು ಘರಚೆ ಮಾಡಾಚೆ ನಳೊ ಲ್ಯಾಕ ಕರತಾ ಆಶ್ಶಿಲೊ. ಬುದ್ಧಿ ನಾಶ್ಶಿಲೆ ಸಾನ ಸಾನ ಚರ್‍ಡುವಾಂಕ ತೋ ಏಕ್ಲೊ ಖೆಳಚೆ ಖೇಳಣಿ. ತಾನ್ನಿ ತಾಗೆಲೆ ದೊನ್ನಿ ಹಾತು ಏಕ್ಕೇಕ್ಲೆ ದೋರ್ನು ಏಕ್ಲೊ ಆಲ್ತಾಂತು ಆನೇಕ್ಲೊ ಪೆಲ್ತಾಂತು ತಾಂಡಿತಾ ಆಶ್ಶಿಲೆಂ. ಪಳೈತಲ್ಯಾಂಕ ಚರ್‍ಡುಂವ ಖೆಳ್ತಾ ಆಸ್ಸಾತಿ ಮ್ಹೋಣು ಮಾತ್ರ ದಿಸಲೇರಿಚಿ ತಾಜೇನ ನಾಗೇಶಾಕ ಜಾತ್ತಾ ಆಸ್ಸುಚೆ ಧೂಖಿ ನಾಗೇಶಾನ ತೋಂಡ ಕಿವಚಿಲಿ ತೆದ್ನಾ ತಾಜ್ಜೆ ಚಿಹ್ನಾ ತಾಗೆಲೆ ತೊಂಡಾರಿ ಪಳಯಲ್ಯಾಕ ಕಳ್ತಾಶಿಲೆ. ತಶ್ಶಿ ಮ್ಹೋಣು ಖೇಳಚೆ ಚರ್‍ಡುವಾಂಕ ಸೊವಚಾಕ, ಮಾರಚಾಕ ನಾ. ಮಾರ್‍ಲೇರಿ ತಾಂಗೆಲೆ ಆವ್ಸು - ಬಾಪ್ಪೂಸು ಎವ್ನು ನಾಗೇಶಾಕ ಮಸ್ತಿತಾಶ್ಶಿಲೆಂ. ಉಪಾಸಿ ಘಾಲ್ತಾಶ್ಶಿಲೆಂ. ನಾಗೇಶು ಜೀವು ಆಸಲೇರಿಚಿ ಮ್ಹಡೆ ಮಣ್ಚೆ ವರಿ ವಾಂಚೂನು ಆಶ್ಶಿಲೊ. ವೀಸ - ಏಕ್ವೀಸ ವರ್ಷಾ ತರುಣ ಜಾಲ್ಯಾರೀಚಿ ಆನ್ನೀಕೆ ಧಾ-ಭಾರ ವರ್ಷಾ ಚಲ್ಲ್ಯಾ ತಶ್ಶಿ ಕರ್‍ತಾಶ್ಶಿಲೊ. ತಸ್ಸಾಲೆಂ ಚರ್‍ಡಪಣ, ತಸ್ಸಲೆ ಬುದ್ಧಿ ತಾಗೆಲೆ ಘರ್‍ಚೇನ ತೋ ಅಪ್ರಯೋಜಕು ಮ್ಹೋಣು ನಿರ್ಧಾರ ಕೆಲ್ಲ್ಯಾರಿ ಪುಸ್ಸೂನು ತಾಕ್ಕಾ ಸರಕಾರಾಚಾನ ಮೆಳ್ಚೆ ಸಗಟ ಸೌಲತ್ತ ಏಕ್ಕಾ ಸೋಣಾಶಿ ಪೂರಾ ಪ್ರಾಪ್ತ ಕೋರ್ನು ಘೆತ್ಲೆ. ಮಹಿನ್ಯಾಕ ತಾಕ್ಕ ಏಕ ಹಜಾರ ದಿವ್ಯಾಂಗಾಲೆ ಪೆನ್ಶನ್ ಎವಚೆ ತಶ್ಶಿ ಕೋರ್ನು ಘೆತ್ತಲೆ. ತಾಗ್ಗೆಲೆ ನಾಂವಾರಿ ರೋಟರಿ ಕ್ಲಬ್ ತಾಕೂನು ಏಕ ಧರ್ಮಾರ್ಥ ಮೊಬೈಲ್ ರೀಚಾರ್ಜ ಅಂಗಡಿ ಘೇವ್ನು ನಾಗೇಶಾಲೆ ಮಾಲ್ಗಡ ವೈನಿಲೆ ಬಾವಾಕ ಘಾಲ್ನು ದಿಲ್ಲೆ. ದೊಗ್ಗಚಿ ಬಾಂವ ಇಂಜಿನಿಯರ್ ಜಾಲಯಾರೀಚಿ ಗರೀಬ ಮ್ಹೋಣು ಫಟ್ಟೀಕ ಸರ್ಟಿಫಿಕೇಟ್ ಸೃಷ್ಟಿ ಕೋರ್ನು ಮುಖ್ಯಮಂತ್ರಿ ಆನಿ ಪ್ರಧಾನಮಂತ್ರಿ ಪರಿಹಾರ ನಿಧಿಚ್ಯಾನ ತಾಗೆಲೆ ಚಿಕಿತ್ಸೇಕ ಮ್ಹೋಣು ದುಡ್ಡು ಸ್ಯಾಂಕ್ಷನ್ ಕೋರ್ನು ಘೆವನು ತೇ ದುಡ್ಡು ವರೇನ ವಾಂಟೂನು ಘೆತ್ಲಿಂತಿ. ಇತ್ಲೆ ಜಾಲಯಾರೀಚಿ ತಾಕ್ಕಾ ಪೋಟ ಭರ್ತಿ ಶೀತ ಘಾಲ್ನಾ ಆಶ್ಶಿಲೆ. 

ಆತ್ತ ಹೇ ಕರೋನಾ ಯವ್ನು ಲಾಕ್‌ಡೌನ್ ಪಡಲೆ ನಂತರ ಅಂತೂ ನಾಗೇಶಾಲೆ ಪರಿಸ್ಥಿತಿ ಆನಿ ಇತ್ಲೆ ಅಧೋಗತಿಕ ವಚೂನು ಪಾವ್ವಿಲೆ. ತಾಗೆಲೆ ಬಾಂವ, ತಾಂಗೆಲೆ ಚರಡುಂವ ಸಕ್ಕಡ ಘರ್‍ಕಡೆಚಿ ಆಸ್ತಾಲೆ. ಚರಡುವಾನಿ ಭಾಯ್ರ ವಚ್ಚೆ ತಶ್ಶಿ ನಾಮೂ! ತಾಂಕಾ ನಾಗೇಶೂಚಿ ಏಕ ಖೇಳಣಿ. ತಾಗೆಲೆ ಆಂಗಾರಿ ಜರಲೊ, ಸೊಕಣಿ, ಮೂಯಿ ಹಾಡ್ನು ಘಾಲ್ತಾ ಆಶ್ಶಿಲೆ. ತಾಣೆ ಭೀವ್ನು ಕಿರಡಲಿ ತೆದ್ನಾ ಹಾತ್ತಾ ಪೇಳಿ ಮಾರ್‍ತಾ ಕೀಡೊನು ಹಾಸ್ತಾ ಆಶ್ಶಿಲೆ. ನಾಗೇಶಾನ ಕಷ್ಟಾನ ಉಂಬೊಳ್ನು ಹಾಡ್ನು ಸುಕಚಾಕ ಘಾಲೀಲೆ ಚಡ್ಡಿ, ಪ್ಯಾಂಟ್ ಶರ್ಟ್ ಘೇವ್ನು ತಾಜ ವಯ್ರಿ ಮಾತ್ತಿ, ಶಾಣ ಲಾವ್ನು ತಾಗೆಲೆ ಆಂಗಾರಿ ಹಾಡ್ನು ಉಡೊನು ಕುಶಿ ಪಾವತಾ ಆಶ್ಶಿಲೆ. “ಮಾಜ್ರಾಕ ಖೇಳು ವಿಂದ್ರಾಕ ಪ್ರಾಣಸಂಗಟ ಮ್ಹಣಚ ವರಿ ಜಾಲೀಲೆ ತಾಗೆಲೆ ಪರಿಸ್ಥಿತಿ. ಹೇ ಸಕ್ಕಡ ದೋಳೆಂತು ಪಳಯಲಾರಿಚಿ ಹೊಡ್ಡ ಚರಡುವಾಂಕ ಭಿಷ್ಟೆಚೆ, ತಶ್ಶಿ ಕೊರಚಾಕ ನಜ್ಜ ಮ್ಹೊಣು ಬುದ್ಧಿವಾದ ಸಾಂಗಚೆ ಕರನಾ ಆಶ್ಶಿಲೆ. ಚರಡುಂವಾ ಬರಶಿ ತಾನ್ನಿ ವರೇನ ಖುಶಿ ಘೆತ್ತಾ ಆಶ್ಶಿಲೆ.   

ಏ.... ಮಡ್ಯಾ.... ಹೇ ಕಸ್ಸಲೆ ಗಂಟೆ ಸಾತ ಜಾಲ್ಲ್ಯಾರೀಚಿ ಆನ್ನಿಕೆ ಚಾಂಗ ಕೊರನು ನೀದ ಕಾಡ್ತಾ ಆಸ್ಸಮೂ. ಅರಿಷ್ಟ ಮುಂಡೆಚೊ... ಕೆದ್ನಾ ಪಳಯಲ್ಯಾರಿಚಿ ಹೇಂಚಿ ಜಾಲ್ಲೆ ತುಗೇಲೆ. ಉಟಯಚಾಕ ಏಕ ವೇಳು ಕಾಳು ಮಣಚೆ ಕಸ್ಸಲೇ ನಾ ತುಕ್ಕಾ ಮ್ಹೋಣು ಪಾಯ್ಯಾಂತು ದೋನ್ ಪಂತ ಮಸ್ತುನು ಬೆಗ್ಗಿ ಊಟಾ ಪೇಪರಾಂತು ಲಾಕ್‌ಡೌನ್ ಕಾರಣಾನಿ ಪೊಟ್ಟಾಕ ಮೇಳ್ನಾತ್ತಿಲೆ ಗರೀಬಾಂಕ “ಫುಡ್ ಕಿಟ್ ದಿತ್ತಾ ಕಂಯಿ ಪಳೆ. ತೂವರೇನ ವಚೂನು ಪಾಳಿಂತು ರಾಬ. ಕೋಣತರಿ ನಿಮ್ಗಿಲ್ಯಾರಿ ಮಸ್ತ ಗರೀಬು ಮ್ಹೊಣು ಸಾಂಗ. ಆನು, ಆಮ್ಮಾ ದೊಗ್ಗಚಿ ನಾಂತಿ... ಮ್ಹೊಣು ಸಾಂಕಾ. ಥೊಡೆ ವೇಳು ಸೋಡ್ನು ಹಾಂವ ಕಾರ ಘೇವ್ನು ತೈಕ ಯತ್ತಾ. ತ್ಯಾ ಕಿಟ್ ಹಾಡಚಾಕ. ಜಾಲ್ಯಾರಿ ಖಬರದಾರ.... ಥಂಯಿ ತೂಂ ಮಾಕ್ಕಾ ಬಾಂವು, ಘರ್‍ಚೊ ಮ್ಹೊಣು ಆಪಯಚಾಕ ನಾ; ಕೋಣಾಂಕ ತಶೀ ಮ್ಹೊಣು ಸಾಂಗಚಾಕ ವರೇನ ನಾ. ಸಾಂಗಲೇರಿ ಘರ್‍ಕಡೆ ಆಯ್ಲ ಮಾಗಿರಿ ಹಾಡ್ಡ ಸಕ್ಕಡ ಪುಡ್ಡಿ ಕರ್‍ತಾ. ಬಡ್ಡಿ ದಾಕೋನು ಭೀಂವಡಾಣು “ಫುಡ್ ಕಿಟ್ ವಾಂಟೂಚೆ ಜಾಗೇಕ ಕಶ್ಶಿ ವಚಕಾ ಮ್ಹೊಣು ಸಾಂಗೂನು ತಾಗೆಲೊ ಮ್ಹಾಲಡೊ ಬಾಂವು ಗಿರಿಧರು ನಾಗೇಶಾಕ ಧಾಡ್ನು ದಿಲ್ಲೊ. 

ನಾಗೇಶು ಆಪ್ಲೆ ಗಾಡಿ ಚೋಣು ಹಾತ್ತಾನಿ ತಾಜೆ ಚಕ್ರ ಧೂಂಗುಳ್ನು ಘೆತ್ತಾ; ಭಾಂವಾನಿ ಸಾಂಗಿಲೆ ಜಾಗೇಕ ಭಾಯರ ಸರಲೊ. ಪೊಲೀಸಂಚೊ ಹಾಕ್ಕಾ ಪಳೋನು ಬಡ್ಡಿ ಹಾಲಯಲೊ “ಏಯ್... ಲಂಗಡಾ ಭಾಯ್ರಿ ಕಿತಯಾಕ ಆಯಲೊ... ಮ್ಹೊಣು ಭಿಷ್ಟೇಲೊ. ನಾಗೇಶು ದೊನ್ನೀ ಹಾತು ಮೆಳೋನು ತಾಂಕಾ ನಮಸ್ಕಾರ ಕೊರನು “ಜವಣಾಕ ಜಾವಕಾ ಮ್ಹಣಚ ವರಿ ಸನ್ನೆ ಕೆಲ್ಲೊ. ತಾನ್ನಿ ನುತ್ ರಾಬಲೆ. ನಾಗೇಶು ಹೂಮ ಘಳೇತಾ “ಫುಡ್‌ಕಿಟ್ ವಾಂಟೂಚೆ ಜಾಗೇಕ ಆಯಲೊ. ತಿತ್ಲ ಭಿತ್ತರೀಚಿ ಥಂಯಿ ಪನ್ನಾಸಾ ಪಶಿ ಚ್ಹಡ ಲೋಕಾನಿ ಜಮೂನು ಜಾಲೀಲೆ. ಜಾಲಯಾರಿ ನಾಗೇಶಾಕ ಪಳೋನು ಪೊಲೀಸಂಚಿ ವರೇನ ತಾಕ್ಕಾ ಮುಖಾರ ವಚ್ಚೆಕ ಸಾಂಗತಾತಿ. ಹಾಗೆಲೆ ಅವಸ್ಥಾ ಪಳೋನು “ಫುಡ್‌ಕಿಟ್ ವಾಂಟಿತಾ ಆಶ್ಶಿಲ್ಯಾಕ ವರೇನ ಕನಿಕರ ಯವ್ನು ತೊಂ ಹಾಕ್ಕಾ ಕಿಟ್ ದಿಲಯಾರಿ ವ್ಹರಚೆ ಕಶ್ಶಿ? ಮ್ಹೊಣು ಸಮಜೂನು ಆಪಲೆ ಕೀಸೆಚಾನ ಪಾಯಶಿ ಪಾಯಶಿ ರೂಪಯಾಚೆ ದೋನ ನೊಟ್ಟ ಕಾಡ್ನು ತಾಕ್ಕಾ ದಿಲ್ಲೊ. ನಾಗೇಶಾನ ತ್ಯಾ ಘೇವ್ನು ಆಪ್ಲೆ ಕೀಸೆಕ ಘಾಲ್ನು ಘೆವ್ಚೆ ಭಿತ್ತರಿ ತಾಗೆಲೊ ಬಾಂವು ಗಿರಿಧರು ತೈಕ ಆಯಲೊ. ಫುಡ್ ಕಿಟ್ ವಾಂಟಿತಾ ಆಸ್ಸುಚೆ ತ್ಯಾ ಮನೀಷಾ ಲಾಗ್ಗಿ ವಚೂನು “ತುಮ್ಮಿ ತಾಕ್ಕಾ ದುಡ್ಡು ದೀವನು ಮುನಾಪೋ ನಾ ಸಾರ್... ನಾಕ್ಕ ನಾತ್ತಿಲ್ಯಾಕ ಖರ್ಚುಚೆ ಫಾವ ಆಸತಾ... ಮ್ಹಣಚ ಭಿತ್ತರಿ ತೊಂ ಮನೀಸು “ತೆ ವ್ಹಯಿ... ಜಾಲಯಾರಿ ಆಮ್ಮಿ ದಿವಚೆ ಪಂದ್ರ ಕಿಲೋ ತಾಂದೂಲು, ಪಾಂಚ ಕಿಲೋ ದಾಳಿ, ಪಾಂಚ ಕಿಲೊ ಗೋಡ, ತ್ಯಾಲ ಹೇ ಸಕ್ಕಡ ಹೋ ಲಂಗಡ ಮನೀಸು ಕಶ್ಶಿ ಘೇವ್ನು ವತ್ತಲೊ... ಇತ್ತುಲೆ ಉಲಯಚೆ ಭಿತ್ತರಿ ನಾಗೇಶಾಲೆ ಸ್ಥಿತಿ ಯವಜೂನು ತ್ಯಾ ಮನೀಸಾಲೆ ದೋಳೆ ವಾಲ್ಲೆ ಜಾಲ್ಲೆ.

“ಅಯ್ಯೋ... ತುಮ್ಮಿ ಇತ್ತುಲೆ ಸಕ್ಕಡ ಲೋಕಾಂಕ ಮದತ್ ಕರತನಾ... ಆಮ್ಮೀಚಿ ಖಾಂಯತರಿ ಸೇವಾ ಕೊರಕಾ ನ್ಹಂಹಿವೇ? ಕಶೀಚಿ ಮೆಗೆಲೆಂ ಕಾರ್ ಆಸ್ಸ... ಹಾಂವ ತ್ಯಾ ಸಕ್ಕಡ ತಾಗೆಲೆ ಘರ್‍ಕಡೆ ದೆಂವೋನು ವತ್ತಾ... ವ್ಹಡ ಸೇವಾ ಕರ್‍ತಲ ವರಿ ಮ್ಹಳ್ಳೊ. 

“ವೆರಿಗುಡ್.. ದೇವಾ ವರಿ ಆಯ್ಲಿ ತುಮ್ಮಿ... ಮ್ಹೊಣು ತೋ ವ್ಹಡ ಮನೀಷು ಆಪಲೆ ಸ್ವಯಂಸೇವಕಾಕ ಸನ್ನೆ ಕೊರನು ಏಕ ‘ಫುಡ್‌ಕಿಟ್ ಹಾಡೋನು ಗಿರಿಧರಾಲೆ ಕಾರಾಕ ಘಾಲಚಾಕ ಸಾಂಗಲೊ. ತ್ಯಾ ಪಳೋನು ನಾಗೇಶು ತಾಣೆ ದಿಲೀಲೆ ದುಡ್ಡು ಪರತ ದಿವಚಾಕ ಘೆಲ್ಲೊ... 

“ನಾಕ್ಕಾ ನಾಕ್ಕಾ ತೂಂಚಿ ದವರೂನು ಘೆ... ಉಪಯೋಗಾಕ ಎತ್ತಲೆ... ಮ್ಹೊಣು ತಾಕ್ಕಾ ಉಬ್ಬರೂನು ಗಂಗಾಧರಾಲೆ ಕಾರಾರಿ ಭೊಸ್ಕರೈಲೊ. ಗಿರಿಧರು ಮನಾಂತೂಚಿ ಹಾಸಲೊ, ತ್ಯಾ ಮನೀಷಾಕ ಫಸಯಿಲೆ ಖಾತ್ತಿರಿ! ತಾನ್ನಿ ದಿಲೀಲೆ ‘ಫುಡ್ ಕಿಟ್ ಘೇವ್ನು ಘರ್‍ಕಡೆ ಆಯಲೊ. ಘರ್‍ಕಡೆ ಯವಚ ಭಿತ್ತರಿ ನಾಗೇಶಾಕ ಮೆಳೀಲೆ ದುಡ್ಡೂ ಉಪ್ಪುನು ಘೆತಲೊ. ಆನಿ “ಫುಡ್‌ಕಿಟ್ಟಾ ಬರಶಿ ಕಾರಾ ಭಾಡೆ ವರೇನ ಮೆಳ್ಳೆ ಮ್ಹೊಣು ಬಾಯ್ಲೆ ಮುಖಾರಿ ಆಪಲೆ ಬುಧ್ವಂತಿಕೆಚೆ ತಾರೀಪು ಕೊರನು ಘೆತಲೊ. ಅಶೀಚಿ ತೀನ್‌ಚಾರ ಕಡೇನ ನಾಗೇಶಾಕ ಧಾಡ್ನು ‘ಫುಡ್‌ಕಿಟ್ ಹಾಡೋನು ಘೆತಲೊ. 

ಪಯಲೆ ಪಂತಾ ಲಾಕ್‌ಡೌನ್ ಸಂಪೂನು ದುಸ್ರೆಚೆ ಲಾಕ್‌ಡೌನ್ ಶೂರು ಜಾಲಿಲೆ. ಏಕ್ದೀಸು ನಾಗೇಶಾಕ ಗಳ್ಯಾಂತು ಏಕ ನಮೂನೋ ಜಾವಚಾಕ ಲಾಗಲೆ. ತಾಜ್ಜ ಬರಶಿ ತಾಪು... ತಾಪ್ಪಾನಿ ತೊಂ ವಳವಳ್ತಾ ಆಸಲೇರಿಚಿ ತಾಗೆಲೆ ಸೇವಾ ಕೊರಚಾಕ ಕೋಣ ಯಾನಾಂತಿ... ಹೆರ್‍ದೀಸು ಮ್ಹಣಚ ಭಿತ್ತರಿ ನಾಗೇಶಾಕ ಶ್ವಾಸ ಕಾಡಚಾಕ ವರೇನ ಕಷ್ಟ ಜಾಲ್ಲೆ. ಹೋ ವರೇನ ಫುಡ್‌ಕಿಟ್ ಘೆವಚಾಕ ವಚ್ಚೂನು ಥಂಯಿ ಹಾಂಗಾ ಘೂವ್ನು ಆಯಲಾ... ಹಾಕ್ಕ ಖಂಯಿತರಿ ಕರೋನಾ ಆಯಲೇರಿ ಕಷ್ಟ ಮ್ಹೊಣು ಸಮಜೂನು ಗಿರಿಧರು ಕೂಡ್ಲೆ ಹೆಲ್ತ್ ಡಿಪಾರ್ಟ್‌ಮೆಂಟಾಕ ಫೋನ್ ಕರಲ್ಲೊ. ತಾನ್ನಿ ಯವ್ನು ನಾಗೇಶಾಕ ವ್ಹರ್ನು ಆಸ್ಪತ್ರೆಕ ಘಾಲ್ನು ತಾಗೆಲೆ ತಾಳೆಚೆ ದ್ರವ ಕಾಡ್ನು ತಪಾಸ ಕೊರಚಾಕ ಪೆಟೋನು ದಿತ್ತಾತಿ. ಹೆರ್‍ದೀಸು ರಿಪೋರ್ಟ್ ಪಾಸಿಟೀವ್ ಮ್ಹೊಣು ಎತ್ತಾ. 

ಹೆಲ್ತ್ ಡಿಪಾರ್ಟ್‌ಮೆಂಟಾಚಿ ನಾಗೇಶಾಕ ಅಂಬುಲೆನ್ಸಾಂತು ಘಾಲ್ನು ಕೋವಿಡ್ ಆಸ್ಪತ್ರೆಕ ಶಿಪ್ಟ್ ಕರತಾತಿ. ಜಿಲ್ಲಾಧಿಕಾರಿ ತಾಗೆಲೆ ಘರ ಆಸ್ಸುಚೆ ಪ್ರದೇಶಾಂತು ಸೀಲ್‌ಡೌನ್ ಕೊರನು ಕಂಟೈನ್ಮೆಂಟ್ ಎರಿಯಾ ಮ್ಹೊಣು ಆದೇಶ ಕೆಲ್ಲೊ. ಕೋಣಯಿ ಘರ್‍ಚಾನ ಭಾಯ್ರಿ ಪಣಾ ತಶ್ಶಿ ಪೊಲೀಸಂಚಿ ಟೈಟ್ ಬಂದೋಬಸ್ತ ಕೆಲ್ಲೆ. ಹೆಲ್ತ್ ಡಿಪಾರ್ಟ್‌ಮೆಂಟಾಚಿ ಹಾಕ್ಕಾ ಕರೋನಾ ಸಂಸರ್ಗ ಕಶ್ಶಿ ಆಯಲೆ ಮ್ಹೊಣು ವಿಚಾರಣ ಕೊರಚಾಕ ಆಯಲೆ. 

“ಸಾಂಗಿಲೆ ಆಯ್ಕನಾಶಿ ತೊಂ ಭಾಯರಿ ಫಿರ್‍ತಾ ಉರತಾಶೀಲೊ. ಪಾಯು ನಾತ್ತಿಲೆ ಲಂಗಡಾಕ ಖಾಂಯಪೂಣಿ ಸಾಂಗಲಾರಿ ಮನಾಕ ಲಾವ್ನು ಘೆತ್ತಾ ಮ್ಹೊಣು ಆಮ್ಮಿ ಗಪ್ ಉರಲಿಂತಿ. ಹೋ ಖಂಯ ಖಂಯಕಿ ಫೀರ್‍ನು ಹೇ ಕಾಯ್ಲೆಕ ಶಿರ್‍ಕಲಾ... ಆಮ್ಕಾಯಿ ಘೋಟಾಳೆಂತು ಘಾಲ್ನು ಘೆಲ್ಲಾ ಮ್ಹೊಣು ಸಕ್ಕಡ ಅಪವಾದ ನಾಗೇಶಾಲೆ ವಯ್ರಿಚಿ ಘಾಲ್ಲೆ. ಹೆಲ್ತ್ ಆಫೀಸರ್‍ಸ್ ತಶೀಚಿ ಬರೋನು ಘೇವನು ಘೆಲ್ಲೆ. ವತ್ತನಾ ಘರ್‍ಚೆ ಸಕಟಾಂಕ ಆಠ್ಠಾವೀಸ ದಿವಸು ಹೋಮ್ ಕ್ವಾರೈಂಟೈನಾಂತು ಉರಕಾ ಮ್ಹೊಣು ಕಟ್‌ನಿಟ್ ಕೊರನು ಘೆಲ್ಲೆ. 

ನಾಗೇಶಾಕ ಕರೋನಾ ಆಯ್ಯಿಲ್ಯಾನಿ ಆಸ್ಪತ್ರೆಚೆ ವೈದ್ಯ, ನರ್ಸ್ ಸಕಟಾಂಕ ತಾಗೆಲೆ ವಯ್ರಿ ಕನಿಕರ ಚ್ಹಡ ಆಶ್ಶಿಲೆ. “ಪಾಪ... ಹೋ ಹೆಬ್ಬೆಟ್ಟಾ ಮನೀಸು. ಕರೋನಾ ಖಾತ್ತಿರಿ ಹಾಕ್ಕಾ ಕಸ್ಸಲೇಯಿ ಗೊತ್ನಾ ಆಶ್ಶಿಲೆ. ಮ್ಹೊಣು ಸಮಜೂನು ಸಕ್ಕಡ ತಾಕ್ಕಾ “ಘರ್‍ಚಾನಿ ಸಾಂಗಿಲೆ ಆಯ್ಕನಾಶಿ ತೂಂ ಇತಯಾಕ ಭಾಯ್ರಿ ಸಕ್ಕಡ ವಚೂನು ಫಿರ್‍ತಾ ಉರಲೊ ಮ್ಹೊಣು ಆಕ್ಷೇಪು ಕೊರಚಾಕ ಲಾಗಲಿ. 

ತೆದ್ದನಾ ನಾಗೇಶಾಕ ಕಳ್ಳೆ “ಮಾಕ್ಕಾ ಥಂಯಿ ವಚೂನು ಫುಡ್ ಕಿಟ್ ಹಾಡಿ, ಹಾಂಗಾ ವಚ್ಚೂನು ಫಳ ವಾಂಟಿತಾ ಆಸ್ಸತಿ ತ್ಯಾ ಘೇವ್ನು ಯೋ ಮ್ಹೊಣು ಸಾಂಗೂನು ಗಾಂವ್ಚೆ ಮೂಲ್ಲ ಮೂಲ್ಲೆಕ ಧಾಡತಾಶ್ಶಿಲೆ ತಾನ್ನಿಚಿ ಆತ್ತ ಮೆಗೆಲೇಚಿ ಚೂಖ ಮ್ಹಣತಾತಿ ಮ್ಹಣಚೆ. ಏಕ ಪಂತಾ ತಾಗೆಲೆ ಮನಾಕ ಮಸ್ತ ಧೂಖಿ ಜಾಲ್ಲೆ. ಆಮ್ಮಾಲೆ ಉಡಗಾಸು ವರೇನ ಜಾಲ್ಲೆ. ದೋಳ್ಯಾಚಾನಿ ಉವಾರೆ ವರಿ ಉದಾಕ ಪೋವಚಾಕ ವರೇನ ಲಾಗಲೆ. ನಾಗೇಶು ಆಪಲೆ ಜೀವನ ಏಕ ಪಂತಾ ಮನಾ ಮುಖಾರ ಹಾಡೋನು ಘೆತಲೊ. 

ಮೆಗೆಲೆ ಜೀವನಾಕ ಖಾಂಯಪೂಣಿ ಅರ್ಥು ಆಸ್ಸವೇ? ನಾ... ನಾ... ಖಾಲಿ ದುಃಖ... ಅಪಮಾನ.... ಸಸಾರ... ದುಸರ್‍ಯಾಲೆ ಪಾಯ್ಮುಳಾಂತು ಪಶುಪಶಿ ಪಾಸ್ಟ ಜಾವನು ವಾಂಚೆ ಮೆಗೆಲೆ ಹೇ ಜೀವನಾಕ ದಿಕ್ಕಾರ ಆಸ್ಸೊ. ಸಕ್ಕಡ ಲೋಕ ಮರ್ಯಾದ, ಕನಿಕರ ಮ್ಹೊಣು ವ್ಹಡ ವ್ಹಡ ಉತ್ರ ಉಲಯತಾತಿ ವ್ಹಯಿ. ಜಾಲಯಾರಿ ತ್ಯಾ ಸಕ್ಕಡ ಹರದೆಚಾನ ಯವ್ಚೆ ನ್ಹಂಹಿ. ಆಪ್ಲೆ ಮೂಲ ರೂಪ ಧಾಂಪೂನು ಘೇವ್ನು ವಯ್ರಿ ಮಾತ್ರ ಉಲಯಚೆ ತೊಂಡುತ್ರ. ಅಸ್ಸಲೆ ರಾಕ್ಷಸಿ ರೂಪಿ ಮನುಷ್ಯಾ ಮಧೇ ಮಾಕ್ಕಾ ಆನಿ ಕಿತ್ತುಲೆ ದಿವಸು ಜೋಳೆಕಾ ಮ್ಹೊಣು ಆಸ್ಸ ತೂ. ಮಾಕ್ಕಾ ಪುರ್‍ಜಾಲ್ಲಾ ಹೇ ಜೀವನ.... ಯೋ... ಯೋ... ಆಪೋನು ವ್ಹರಿ..... ಹೇ ಶರೀರಾಚಾನ ಮುಕ್ತಿ ದೀ.... 

ಆಸ್ಪತ್ರೆಂತು ನಿದೊನು ಕೊರಚಾಕ ವಿಂಗಡ ಖಂಚೇಯಿ ಕಾಮ ನಾಶ್ಶಿಲೆ ನಾಗೇಶು ನಿರಂತರ ದೇವಾ ಲಾಗ್ಗಿ ಹೇಂಚಿ ಪ್ರಾರ್ಥನ ಕರತಾ ಉರಲೊ. “ಮಾಕ್ಕ ವ್ಹರಿ... ಮಾಕ್ಕ ವ್ಹರಿ.... ಮಾಕ್ಕಾ ವ್ಹರಿ....

ಬಹುಶಃ ದೇವಾಕ ತಾಜವಯ್ರಿ ಕನಿಕರ ಆಯ್ಲ ಕಿತ್ಕಿ....? ತಾಕ್ಕಾ ಆಸ್ಪತ್ರೆಕ ಸೇರ್‍ಸುನು ಸಂಚೆ ದಿವಸು ಶ್ವಾಸು ಕಾಡಚಾಕ ಕಷ್ಟ ಜಾವಚಾಕ ಲಾಗಲೆ. ಹಳೂ ಹಳೂ ದೋಳೆ ಮಂಜ ಜಾವಚಾಕ ಲಾಗಲೆ. ಡಾಕ್ಟ್ರಾಂಕ ಕಸ್ಸಲೆ ಕೊರಕಾ ಮ್ಹೊಣು ಕಳ್ನಿ.... ತಾಂಗೆಲೆ ಆಸ್ಪತ್ರೆಂತು ಆಶ್ಶಿಲೆ ತೀನ ವೆಂಟಿಲೇಟರ್ ತಿತ್ತುಲೆ ಭಿತ್ತರಿಚಿ ತಿಗ್ಗಾಂಕ ಲಾವ್ನು ಜಾಲೀಲೆ. ಚಾರೀಚಿ ವೆಂಟಿಲೇಟರ್ ತಾಂಚ ಕಡೇನ ನಾಶ್ಶಿಲೆ. ನಾಗೇಶಾಕ ಐ.ಸಿ.ಯು.ಕ ಘಾಲ್ಲೆ. ಜಾಲಯಾರಿ ವೆಂಟಿಲೇಟರ್ ನಾಶಿ ತಾಣೆ ವಾಂಚೆ ಕಷ್ಟ ಆಸ್ಸಾ ಮ್ಹಣಚೆ ತಾಂಕಾ ಗೊತ್ತಾಶ್ಶಿಲೆ. ಘಂಟ ಘಂಟೆಕ ನಾಗೇಶಾಲೆ ಪರಿಸ್ಥಿತಿ ವಾಯಟ ಜಾತ್ತಾ ಘೆಲ್ಲೆ. ಹೆರ್‍ದೀಸು ಸಕ್ಕಾಣಿ ಪೂಡೆ ಸಾಡಿ ಪಾಂಚ ಗಂಟ್ಯಾ ಸುಮಾರಾಕ ಅಂತೂ ತಾಗೆಲೆ ಆತ್ಮ ಶರೀರಾಕ ಮುಕ್ತ ಕೊರನು ಭಾಯರ ಸೊರನು ಘೆಲ್ಲೆ. 

ಧಾ ಘಂಟ್ಯಾಕ ಜಿಲ್ಲಾಡಳಿತಾನ ಆಪ್ಲೆ ಹೆಲ್ತ ಬುಲೆಟಿನ್ನಾಂತು ಹೇ ನ್ಯೂಸ ಅಧಿಕೃತ ಜಾವನು ಅನೌನ್ಸ ವರೇನ ಕೆಲ್ಲೆ. ಸಾಂಜವಾಳ ಮ್ಹಣತನಾ ಜಿಲ್ಲಾಡಳಿತ ತರಪೇನ ತಾಗೆಲೆ ಮ್ಹಡೆ ಲಾಸ್ಸೂಚಾಕ ಠರೋನು ಹೇ ವೇಳ್ಯಾರಿ ತುಮ್ಮಿ ಕೋಣ್ತರಿ ಅಂತಿಮ ದರ್ಶನಾಕ ಯವಚಾಕ ಅವಕಾಶ ಆಸ್ಸಾ. ಯವಚೆ ಜಾಲ್ಯಾರಿ ಸಾಂಜವಾಳಾ ಪಾಂಚ ಘಂಟ್ಯಾ ಭಿತ್ತರಿ ವಿದ್ಯುತ್ ಚಿತಾಗಾರಾ ಲಾಗ್ಗಿ ಯವ್ಕಾ. ವೆಹಿಕಲ್ ಧಾಡತಾತಿ ಮ್ಹೊಣು ನಾಗೇಶಾಲೆ ಮ್ಹಾಲ್ಗಡೆ ಭಾಂವಾಕ ಫೋನ್ ಕರತಾತಿ. 

“ಅಯ್ಯೋ... ಅಂತೂ ಮೆಲ್ಲವೇ? ಏಕ ಪೀಡಾ ಘೆಲೀಲ್ವರಿ ಜಾಲ್ಲೆ. ಆತ್ತಚಿ ತಾಣೆ ಕಾಯ್ಲೋ ಹಾಡೋನು ಘೇವ್ನು ಆಮಕಾ ಸಕಡಾಂಕ ಘರ್‍ಕಡೆಚಿ ಬಾಂದೂನು ಘಾಲ್ನು ಘೆಲೀಲೆಚಿ ಪುರ್‍ಪೂರ ಜಾಲ್ಲಾ. ಆನಿ ತಾಗೆಲೆ ಅಂತಿಮ ದರ್ಶನಾಕ ಯವ್ನು ಆಮ್ಮಿ ಆನಿ ಇತ್ಲೆ ಕಷ್ಟಾಕ ಶಿರಕೂನು ಪೊಡಚಾಕ ತಯಾರ ನಾಂತಿ.... ತುಮ್ಮೀಚಿ ಕೆದ್ನತರಿ ಲಾಸ್ಸೂನು ಸೊಡ್ಡಾ.... ತಾಗೆಲೆ ಗೊಬ್ಬೊರು, ಹಾಡ್ಡ ಕಸ್ಸಲೇಯಿ ಆಮಕಾ ನಾಕ್ಕಾ... ತ್ಯಾ ವರೇನ ತುಮ್ಮೀಚಿ ವಿಲೇವಾರಿ ಕೊರನು ಸೊಡ್ಡಾ.... ಮ್ಹೊಣು ಸಾಂಗಿಲೊ ನಾಗೇಶಾಲೊ ಮ್ಹಾಲಡ ಬಾಂವು ಗಿರಿಧರು ಅಖೇರಿಕ ಸ್ವರು ಚಿಕ್ಕೆ ಸಾನ ಕೊರನು “ತಾಣೆ ಕರೋನಾ ನಿಮಿತ್ತ ಮೆಲ್ಲಿಲ್ಯಾಕ ಗವರ್ನಮೆಂಟ್ ಚಾರಕಿ ಪಾಂಚ ಲಾಕ್ ರೂಪಯ ಪರಿಹಾರು ದಿತ್ತ ಕಂಯಿಮೂ.... ತ್ಯಾ ಖಾತ್ತಿರಿ ಅರ್ಜಿ ಖಂಯಿ ಮೆಳತಾ. ಅರ್ಜಿ ಘಾಲಚೆ ಕಶ್ಶಿ? ಜಾವಕಾ ಜಾಲ್ಯಾರಿ ಹಾಂವ ತುಮಕಾ ಯವ್ನು ಮೆಳ್ತಾ ಮ್ಹಳ್ಳೊ.

ತಾಗೆಲೆ ಉತ್ತರ ಆಯಕೂನು ಗಿರಿಧರಾಕ ಫೋನ್ ಕೆಲೀಲೆ ಮನೀಷಾಕ ಆಂಗ ಸಕ್ಕಡ ಝಳ್ಳೆ. ಅಸ್ಸಲೇಯಿ ದುರಾಶೆಚೆ ಮನೀಷು ವರೇನ ಆಸತಾತಿಮೂ; ಹಾನ್ನಿ ಕ್ರೂರವೃಗ ಪಶಿ ಕ್ರೂರ ಮ್ಹೊಣು ಸಮಜೂನು ಹರದೆ ಜ್ಹಡ ಜಾವನು ದೋಳ್ಯಾಂತುಲೇನ ಉದಾಕ ಆಯಲೆ.... ತೊಂ ಕಸಲೇ ಉಲಯನಾಶಿ ಫೋನ್ ರೀಸಿವರ್ ಸಕ್ಕಲ ದವರತಾ. ಗಿರಿಧರು ನಾಗೇಶಾನಿ ಮೆಲ್ಲಿಲೆ ಖಾತ್ತಿರಿ ಮೆಳ್ಚೆ ಪರಿಹಾರು ಕಶ್ಶಿ ಘೆವಕಾ? ಮ್ಹೊಣು ಕೋಳ್ನು ಘೆವಚೆ ಖಾತ್ತಿರಿ “ಹಲೋ... ಹಲೋ... ಮ್ಹಣತಾತಿ ಆಸ್ತಾ. - Argodu Suresh Shenoy