ಸುಖಾಚೆ ಪಾವಲಿ-9

ಮನುಷ್ಯಾಲೆ ಸಕ್ಕಡ ದುಃಖ, ಆತಂಕ ಆನಿ ಗೊಂದಳಾಕ ಕಾರಣ ತಾಗೆಲೆ ಮನಾ ಭಿತವಯಲೆ ‘ಭಯಿ. ಹಾತ್ತಾಂತು ಖಾಂಯಿ ನಾಶಿಲ್ಯಾಕ ಫಾಯಿ ಮಾಕ್ಕಾ ಪೋಟ ಭಽರಿ ಜವಣ ಮೆಳ್ತಕಿ ನಾಂಕಿ ಮ್ಹಣಚೆ ಭಯಿ ಆಸಲೇರಿ ಮಸ್ತ ದುಡ್ಡು, ಆಸ್ತಿ ಆಶ್ಶಿಲ್ಯಾರಿ ಚೋರು ಯವ್ನು ಖಂಯಿ ಮೆಗೆಲೆ ದುಡ್ಡು, ಬಾಂಗಾರ ಕಾಂಪೂನು ವ್ಹರತಕಿ, ಟ್ಯಾಕ್ಸ್ ಆಫೀಸರ್ ಯವ್ನು ಖಂಯಿ ರೈಡ್ ಕರತಾತಿಕಿ ಮ್ಹಣಚೆ ಭಯಿ ಆಸತಾ. ಹಾನ್ನಿ ದೊಗ್ಗಾಂಕ ಸೋಡ್ಯಾ ಮಧ್ಯಮ ದರ್ಜೆಚೊ, ಆಮ್ಗೆಲ-ತುಮ್ಗೆಲ ತಸ್ಸಲೊ ಮನುಷ್ಯು ಆಸ್ತಮೂ, ತಾಕ್ಕ ಚಿಕ್ಕೆ ಪೊಳೋವ್ಯಾ ಮ್ಹಳಯಾರಿ; ತೊಂ ಅಂತೂ ಭಯ್ಯಾಚೆ ಗಾಡೀರಿ ಬೈಸೂನು ಪೀರ್‍ತಾ ಆಸತಾ. ತಾಕ್ಕಾ ಹರ್‍ಯೇಕ ವಿಷಯಾಂತೂ ಭಯಿಽಚಿ ಭಯಿ. ಪೆಟ್ರೋಲ್ ಲೀಟರಾಕ ದೋನ ರೂಪಯ ಚ್ಹಡ ಜಾಲಯಾರಿ ಫಾಯ್ಚಾನ ಬೈಕ್ ವ್ಹರಚೆ ಮಾರಗ ಜಾತ್ತಮೂ ಮ್ಹೊಣು ತೊಂ ಭಿತ್ತಾ. ದುದ್ದಾಕ ಲೀಟರಾಕ ಚಾರ ರೂಪಯ ಚಳ್ಳೆ ಮ್ಹಳಯಾರಿ ದಿವಸಾಕ ಅರ್ಧ ಲೀಟರ ದೂದ ಘೆತಲ್ಯಾರಿಚಿ ಮೈನ್ಯಾಕ ಸಾಠ ರೂಪಯ ಚ್ಹಡ ವತ್ತಾ, ಕಶ್ಶಿ ಕೊರಚೆ ಮ್ಹಣಚೆ ಆತಂಕ ತಾಕ್ಕಾ. ಆನಿ ಬಾಯ್ಲಮನ್ಶಾಂಕ ಪಳೇಯಲ್ಯಾರಿ ಅಂತು ತಾನ್ನಿ ಭಯ್ಯಾಚೆ ಪೊಂಡಾಂತೂ ಬುಡ್ಡೂನು ಬೈಸೂನು ಆಸತಾತಿ. 

ಹೇ ಅಶ್ಶಿ ಕೆಲ್ಲಿಲೆ ಸಮ್ಮಕಿ, ಚೂಕಿಕಿ! ಮಾಂಯ್ಗೆಕ ಉಲಯಿಲೆ ಚೂಕ ಜಾಲ ಕಿತ್ಕಿ. ಸೆಜರ್‍ಚೆ ಆಮ್ಗೆಲೆ ಖಾತೀರಿ ಕಸಲೆ ಲೆಕ್ತಾಕಿ ಕಿತ್ಕಿ, ಧೂವ್ಯಾಕ ಖಾಂಯ್ತರಿ ಗಟ್ಟಿ ಉಲಯಲ್ಯಾರಿ ತೀಣೆ ವಚ್ಚೂನು ಗಳ್ಪಾಸ ಘಾಲ್ನು ಘೆತಲ್ಯಾರಿ ಕಸಲೆ ಕೊರಚೆ? ಪುತ್ತಾಕ ಭಿಷ್ಟೆಲೆ ಕೂಡ್ಲೆ ತಾಣೆ ಘರ ಸೋಡ್ನು ಘೆಲಯಾರಿ! ಅಶ್ಶಿ ತಾನ್ನಿ ಸಾನ್ಸಾನ ವಿಷಯಾಕ ಭಿತ್ತಾತಿ. ಜಾಲಯಾರಿ ಮಸ್ತ ಲೋಕಾಕ ಗೊತ್ತು ನಾ ಆಮಗೇಲೆ ಸಕ್ಕಡ ಕಷ್ಟ, ದುಃಖಾಕ ಕಾರಣ ಹೇ ಭಯಿಚಿ. ಆಮ್ಮಿ ಖಂಚೇ ವಿಷಯಾಕ ಭೀವ್ನು ಭಿತೆರಿ ಬಸ್ಲಿ ಮ್ಹೊಣು ಸಮಜಿಯಾ ಜಾಂವ್ಚೆ ಚುಕ್ಕೊಚಾಕ ಆಮಚಾನ ಜಾತ್ವೆ? ಖಂಡಿತ ನಾ. 

ಸೆಜರ್‍ಚೊ ರಾಯು ಆಮಗೇಲೆ ರಾಯಾ ವಯ್ರಿ ಯುದ್ಧ ಕೊರಚಾಕ ಆಯಲಾ ಮ್ಹೊಣು ಭೀವ್ನು ಆಮಗೇಲೆ ರಾಯಾನಿ ಭೀವ್ನು ರಾವಳಾರಾಂತು ವಚೂನು ನಿಪ್ಪೂನು ಬಸಲ ಕೂಡ್ಲೆ ಯುದ್ಧ ಕೊರಕಾಚಿ ಮ್ಹೊಣು ಆಯ್ಯಿಲೊ ತೊಂ ರಾಯು ಧಾವ್ನು ವತ್ತವೇ? ಖಂಡಿತ ನಾ. ತಶ್ಶಿಚಿ ಆಮ್ಮಿ ಭೀವ್ನು ಬಸಲ ಕೂಡ್ಲೆ ಯವ್ಚೆ ಕಷ್ಟ, ನಷ್ಟ ದೂರ ಜಾಯನಾ. ತಾಜ್ಜ ಬದಲಾಕ ತಾಜ್ಜೆ ಎದುರು ರಾಬಚಾಕ ಮನಾಕ ತಯಾರ ಕೆಲಯಾರಿ ಮಾತ್ರ ಆಮ್ಕಾ ಯಶ ಮೆಳತಾ. ಕಂಪ್ಯೂಟರ ಆಶ್ಶಿಲ್ಯಾಂತು ಮಸ್ತ ಚುರ್‍ಕ ಮ್ಹೊಣು ಆಮ್ಮಿ ಸಕಡಾನಿ ಸಮಜೂನು ಘೆತಲ್ಯಾ. ಜಾಲಯಾರಿ ತ್ಯಾ ಕಂಪ್ಯೂಟರಾಕ ಕಮಾಂಡ್ ದಿವಚೆ ಮನುಷ್ಯಾಲೆ ಮಸ್ತಿಷ್ಕಾನ ಮ್ಹಣಚೆ ಆಮ್ಮಿ ವಿಸರಚಾಕ ನಜ್ಜ. ಧೈರ್ಯ ಆಶಿಲ ತೆದ್ದನಾ ಖಂಚೇ ಏಕ ಸಮಸ್ಯೆಕ ಪರಿಹಾರ ಆಪ್ಣೀತ್ಯಾಕ ಆಮ್ಗೆಲೆ ಮನಾಂತು ಉತ್ಪನ್ನ ಜಾವ್ನು ಸೊಡ್ತಾ. ಪರಿಹಾರು ನಾಶಿಲೆ ಖಂಚೇಯಿ ಸಮಸ್ಯೆ ಸೃಷ್ಟಿ ಜಾಯನಾ ಮ್ಹಣಚೆ ಆಮ್ಮಿ ಕೆದನಾಂಯಿ ನಜರಾಂತು ದವರೂನು ಘೆವ್ಕಾ. ಸೈನಿಕ ಯುದ್ಧಾಕ ಬಾಯರ ಸೊರಚೆ ಪಯಲೆ ಕವಚ, ಗುಡಾಣ ದವರೂನು ಘೇವ್ನು ವತ್ತಾಶ್ಶಿಲೆ. ತಶ್ಶೀಚಿ ಆಮ್ಮೀಚಿ ದುಃಖ, ಕಷ್ಟ ಯವಚೆ ಪಯಲೆ ತಾಜ್ಜ ಎದೂರು ರಾಬಚೆ ತಸ್ಸಾಲೆ ತ್ರಾಣ ವಾಡ್ಡೊನು ಘೆವುಕಾ. ತಾಕ್ಕ ಸುಲಭ ಉಪಾಯು ಮ್ಹಳಯಾರಿ ಆಮ್ಗೆಲೆ ಮನಾ ವಯರಿ ಆಮ್ಮಿ ನಿಯಂತ್ರಣ ದವರೂನು ಘೆವಚೆ. ಕೋಪು, ಕ್ರೋದು, ಲೋಭು, ಮದ, ಮತ್ಸರು ಯಾನಾ ತಶ್ಶಿ ಮನಾಕ ತಯಾರ ಕೆಲಯಾರಿ ತೆದನಾ ಆಮ್ಮಿ ಭಯ್ಯಾ ವೇಳ್ಯಾರಿ ಧೈರ್ಯ ಆಪ್ಣೀತ್ಲ್ಯಾಕ ಯವಚಾಕ ಶಕ್ಯ ಆಸ್ಸ. ವಾಯ್ಟ, ಅನ್ಯಾಯು ಕೆಲಯಾರಿ ವಾಯ್ಟ ಜಾತ್ತಾ ಮ್ಹಣಚೆ ಖಾತೇರಿ ಭಯಿ ಆಸ್ಸುಕಾ ವಿನಃ ಹರ್‍ಯೇಕ ವಿಷಯಾಂತು ವಾಯ್ಟ ಘಡಚಾಕ ಪುರೊ ಮ್ಹೊಣು ಭಿವಚೆ ಸರ್ವಥಾ ಅನರ್ಥಾಕ ಕಾರಣ ಜಾತ್ತಾ. ಆನಿ ಅಸ್ಸಲೆ ಯವಜಣಿ ಪ್ರತಿ ನಿತ್ಯ ಕರತಾ ಉರಲ್ಯಾರಿ ತ್ಯಾ ಅನರ್ಥ ಘಡ್ನೂ ಘಡಚೆ ಫಾವ ಆಸತಾ.