ಸುಖಾಚೆ ಪಾವಲಿ - 4

ಆಮ್ಗೆಲೆ ದೌರ್ಬಲ್ಯ ನಾನಾ ನಮೂನೇಚೆ ಆಸ್ಸ. ಖಂಚತರಿ ಏಕ ಕಾರ್ಯ ಆಮಗೇಲೆ ನಿಮಿತ್ಯ ಘಡಲೆ ಮ್ಹಳಸತಾ ಆಮ್ಮಿ ಫುಗ್ಗೂನು ವತ್ತಾತಿ. ಆನಿ ದುಸ್ರೆ ಲಾಗ್ಗಿ ಗರ್ವಾನಿ ಸಾಂಗೂನು ಮೆರ್‍ವತಾತಿ. ಸಂಪತ್ತ, ಕೀರ್ತಿ, ರೂಪಾ ನಿಮಿತ್ಯ ಗಮಂಢಿಪಣ ದಾಖಯ್ಚೆ ಲೋಕಾಂಕ ಪ್ರತಿ ದಿವಸು ಆಮಗೇಲೆ ಸುತ್ಲೂ ಆಮ್ಮಿ ಪಳೈತಾ ಆಸತಾತಿ. ಜಾಲಯಾರಿ ಹಾಜ್ಜ ಭಿತ್ತರಿ ಘೂಸೂನು “ಖರೇಚಿ ಹೇ ಆಮ್ಮೀ ಕೆಲೀಲೆ ವ್ಹಯಿವೇ? ಮ್ಹಣಚೆ ಜಾಣೂನು ಘೆತಲ್ಯಾರಿ ತೆದ್ದನಾ ಕಳತಾ ಆಮಗೇಲೆ ತಾಕತ್ತ ಕಿತ್ಲೆ ಸೀಮಿತ ಮ್ಹಣಚೆ! ಏಕಳ್ಯಾಲಾಗ್ಗಿ ಕೋಟಿ ಕೋಟಿ ಗಟ್ಲೆ ದುಡ್ಡು ಆಸ್ತಾ, ಮೆಳ್ಳ ಮೆಳ್ಳ ಬಗಲೇನ ಪೂರಾ ಆಸ್ತಿ, ಸೈಟ್ ಇತ್ಯಾದಿ! ಘರಾ ಭಿತ್ತರಿ ಕೆ.ಜಿ.ಗಟ್ಲೆ ಬಾಂಗಾರ!! ತೆದ್ದನಾ ತೊಂ ಸಮಜತಾ ಆಪಣಾ ತಿತ್ತುಲೆ ಮಹಾನ್ ಕೋಣ ನಾ. ಆಪಣಾನ ಇಚ್ಛಾ ಪಾವಲ್ಯಾರಿ ಮೇಳ್ನಾತ್ತಿಲೆ ಕಸಲೇ ನಾ ಮ್ಹೊಣು. ಆನ್ನೇಕ್ಳೊ ಪುಸ್ತಕ, ವ್ಹಡ ವ್ಹಡ ಗ್ರಂಥ ವಾಜ್ಜೂನು ವ್ಹಡ ಪಂಡಿತ ಜಾವ್ನಾಸ್ಸ ಮ್ಹೊಣು ಸಮಜಿಯಾ. ಲೋಕ ಘೆಲೀಲ ಕಡೇನ, ಆಯಿಲ ಕಡೇನ ತಾಕ್ಕಾ ಮಾನ ದಿತ್ತಾತಿ, ಸನ್ಮಾನ ಕರತಾತಿ. ರಾಜಕೀಯ ನೇತಾರ ಸಹಿತ ತಾಗೆಲೆ ಉತ್ತರ ನಿರ್ಲಕ್ಷ್ಯ ಕರಚಾಕ ಭಿತ್ತಾತಿ. ತೆದ್ದನಾ ತೊಂ ಸಹಿತ ಆಪ್ಪಣ ವ್ಹಡ ಮನುಷ್ಯು ಮ್ಹೊಣು ಸಮಜೂನು ಘೆತ್ತಾ. ಹೇ ಗಮಂಢಿಪಣ. ಮೂಢಪಣ ಮ್ಹಣತಾಲಿ ಆಸ್ಸತಿ. 

ಕೋಟಿಗಟ್ಲೆ ದುಡ್ಡಾಶ್ಶಿಲೊ ಏಕ ದಿವಸು ಬಿಕಾರಿ ಜಾವಚಾಕ ಪುರೊ, ಮಹಾ ಪಂಡಿತು ಮ್ಹೊಣು ಸಮಜೂನು ಆಶಿಲ್ಯಾಕ ಸಹಿತ ಸಾನ್ಸಾನ ವಿಷಯಾಕ ಜವಾಬ ಮೇಳನಾಶಿ ಆಸಚಾಕ ಪುರೊ. ಜಾಂವೊ ತಾಗೆಲೆ ಮಾತ್ಯಾಕಾಪಸಾ(ಮೆದುಳಾ)ಕ ಖಾಂಯ್ತರಿ ಲುಕ್ಸಾನ ಘಡ್ನು ತೊಂ ಪಿಸ್ಸೊ ಜಾವಚಾಕ ಪುರೊ. ವ್ಹಡ ವ್ಹಡ ರಾಜ-ಮಹಾರಾಜ ಪೂರಾ ಗರ್ವ- ಗಮಂಢಿಪಣಾನ ನಾಶ ಜಾವನು ಘೆಲೆಲೆ ಉದಾಹರಣ ಪುರಾಣ, ಇತಿಹಾಸಾಂತು ಮಸ್ತ ಮೆಳನಾಂವೆ? ಕೋಣ ಹಾಂಗಾ ಚಿರಂಜೀವಿ ನ್ಹಂಯಿ. ಎತ್ತನಾ ಕಸಲೇ ಹಾಣಿ, ವತ್ತಾನಾ ಕಸಲೇ ವ್ಹರನಾತಿ. ಹಾಂಗಾ ಪೂಡೇಚಾನ ಆಶ್ಶಿಲೆ ಆಸ್ತಿ, ದುಡ್ಡು, ಭಾಂಗಾರ, ಕೀರ್ತಿ ಆಜಿ ಆಮಗೇಲೆ ಜಾಲ್ಲಾ. ಫಾಯಿ ಆನಿ ಕೋಣಾಲ್ಕಿ ಜಾತ್ತಾ. ಹಾಜ್ಜೆ ಖಂಚೇಚೆ ಸೃಷ್ಠಿ ಆಮಗೆಲೆ ನಿಮಿತ್ಯ ಜಾಲೆಲೆ ನ್ಹಂಯಿ. ಅಶ್ಶಿ ಆಸತಾನಾ ತ್ಯಾ ಆಮಗೆಲೆ ಮ್ಹೊಣು ಗರ್ವ -ಗಮಂಢಿಪಣ ಪಾವಚೆ ಸಮ್ಮವೇ?