ಸುಖಾಚೆ ಪಾವಲಿ - 5

ಜೀವನಾಂತು ಉದರ್ಗತಿ ಪಾವಚೆ ಏಕ್ಕಾ ಏಕ ವಾಟ ಮ್ಹಳಯಾರಿ ಆಂಗ ಮೊಡನು ಜೊಡಚೆ. ಹೂಮ ಘಳೆನಾ ಜಾಲಯಾರಿ, ಕಾಲಿಲೆ ಶೀತ ಜಿರನಾ ಜಾಲಯಾರಿ ಯಶ ತಿತಲೇಚಿ ದೂರ ವಚ್ಚನಾ, ಅನಾರೋಗ್ಯ ಸಹಿತ ಆಮಗೇಲೆ ಫಾಟಿ ಧರಿಲೆ ಬೇತಾಳ ಜಾತ್ತಾ. ಆಮ್ಮಿ ಆಸ್ತಿ, ದುಡ್ಡು, ಬಾಂಗಾರ, ರುಪ್ಪೆ ಸಂಪತ್ತ ಮ್ಹೊಣು ಸಮಜಿತಾತಿ. ಜಾಲಯಾರಿ ದೇವಾನಿ ಆಮ್ಕಾ ದಿಲೇಲೆ ಹಾತ್ಪಾಯು, ಬುದ್ಧಿ ಸಂಪತ್ತ ಮ್ಹೊಣು ಕೆದನಾಂಯಿ ಸಮಜಿನಾಂತಿ. ಆಮಗೆಲೆ ಸಕ್ಕಡ ಹಾರ್‍ಪಣಾಕ ಹೇಂಚಿ ಕಾರಣ. ಶ್ರೀ ಕೃಷ್ಣ ಪರಮಾತ್ಮಾನಿ ಶ್ರೀ ಭಗವದ್ಗೀತೆಂತು ಸ್ಪಷ್ಟ ಜಾವ್ನು ಸಾಂಗಿಲ ಮ್ಹಣಕೆ ಹೇ ಭೂಂಯ್ಚವಯರಿ ಹರಯೇಕ ಕರ್ಮಾಕ ಪ್ರತಿಫಲ ಆಸ್ಸೂನು ಆಸ್ಸ. ವೈಜ್ಞಾನಿಕ ಜಾವನು ಮ್ಹಣಕಾ ಮ್ಹಳಯಾರಿ ಕ್ರಿಯೆಕ ಪ್ರತಿಕ್ರಿಯಾ ಆಶಿಲ ವರಿ ಕರ್ಮಾಕ ಪ್ರತಿಫಲ ಮೇಳ್ನೂ ಮೆಳತಾ. ಹೇ ಕಳೀತಾಕ ಹಾಡ್ನು ಘೆನಾಶಿ ಮಸ್ತ ಲೋಕ ಆಪಣಾನ ಕರ್ಮ ಕರನಾ ಜಾಲಯಾರಿಚಿ ಫಲ ಮೆಳಕಾ ಮ್ಹೊಣು ಸಮಜಿತಾತಿ. ಆನಿ ತ್ಯಾ ಖಾತೇರಿ ದುಸರ್‍ಯಾಂಕ ಫಸಯ್ಚೆ, ದುಸರ್‍ಯಾ ಲಾಗ್ಗಿ ಮಾಗಚೆ ಇತ್ಯಾದಿ ಕರತಾತಿ. ಸ್ವಾಭಿಮಾನ ಹೀನ ಜಾವುನು ಕಶ್ಶಿ ಜಾಲಯಾರಿಚಿ ಅಡ್ಡಿ ನಾ ದುಡ್ಡು ಏಕ ಮೆಳಯಾರಿ ಪುರೊ ಮ್ಹೊಣು ವಾಘಚೆ ಲೋಕಾಲೆ, ತಾಂಗೆಲೆ ಸಂತತಿಚೆ ಪರಿಸ್ಥಿತಿ ಕೆದ್ನತರಿ ತುಮ್ಮಿ ಅವಲೋಕನ ಕೊರನು ಪಳಯಲಾವೇ? ತಾಂಗೆಲೆ ಜೀವನಾಂತು ಉದರ್ಗತಿ ಮ್ಹಣಚೆ ಕೆದನಾಂಯಿ ದೆಕ್ಕೂ ಪಣಾ. ಕಾವಚಾಕ, ಜೆವಚಾಕ ತ್ರಾಸು ನಾ ಮ್ಹೊಣು ಜಾಲಯಾರಿಚಿ ದುಸರ್‍ಯಾಂಕ ಹಾತು ಉಬೋರ್ನು ದೋನ ಕಾಸು ಪೂಣಿ ದಿವಚೆ ಭಾಗ್ಯ ತಾಂಕಾ ಉರನಾ. ತಾಂಗೆಲಾಗ್ಗಿ ಕಪಾಟ ಭರ್ತಿ ಎಫ್.ಡಿ. ರಿಸೀಟ್ಸ್, ಬ್ಯಾಂಕ್ ಲಾಕರ್ ಭರ್ತಿ ಬಾಂಗಾರ ಆಸಲೇರಿಚಿ ಪುಣ್ಯ ಜೊಡಚೆ ಭಾಗ್ಯ ತಾಂಕಾ ಆಸ್ಸನಾ ಮ್ಹಳಯಾರಿ ತಾನ್ನಿ ದುರ್ಭಾಗ್ಯವಾನ ನ್ಹಂಹಿವೇ? 

ಕೋಣಾಕ ಆಪಣಾಲೆ ಹಾತ್ಪಾಯ ವಯರಿ ಭರ್‍ವಸ ಆಸ್ತಕಿ, ಕೋಣಾಕ ಸುಖಾ ಪಶಿ ಶ್ರಮ ಕೊರಚೆ ಅವಡ್ತಕಿ ತೊಂ ವಿಂಗಡ ಲೋಕಾನಿ ಜಾಳ ಭೊಗಚೆ ತಿತ್ತುಲೆ ಚಂದಾಯಾನಿ ವಾಂಚತಾ. ತಾಗೆಲಾಗ್ಗಿ ಖಾಂಯ್ತರಿ ಪ್ರಶ್ನೊ ನಿಮಗೂಕಾ ಮ್ಹಳಯಾರಿಚಿ ವಿಂಗಡ ಲೋಕ ಭಿತ್ತಾತಿ. ತಸ್ಸಲೆ ಶಕ್ತಿ ತೊಂ ಆಸ್ಸ ಕೊರನು ಘೆವುನು ಆಸ್ತಾ. ಕೋಣ ಕಷ್ಟ ಪಾವ್ತಾಕಿ ತಾಣೆ ಘಳೇಲೆ ಏಕೇಕ ಥಂಬೊ ಹೂಮ ಸಹಿತ ವ್ಯರ್ಥ ಜಾಯನಾ. ಬಿತೇರಿ ಸಾವಟಾಂತು ಬಶ್ಶಿಲೊ ಏಕಳೊ ಗುಲಾಬಿ ವರ್ಣನ ಕರತಾ, ತಾಜ್ಜೆ ತಾರೀಪು ಕರತಾ, ಪರ್‍ಮೋಳು ಘೆತ್ತಾ ಬಸಚಾಕ ಪುರೊ. ಜಾಲಯಾರಿ ಗುಲಾಬಿ ಜಾಡ ರೊವುನು, ಉದ್ದಾಕ ಸೋಡ್ನು, ಸಾರೆ, ಮಾತ್ತಿ ಘಾಲ್ನು, ಫೂಲ ಕಾಡಿಲೊ ಖೇತಿದಾರಾಕ ಗುಲಾಬಿ ಝಾಡಾಂತು ಬಶ್ಶಿಲೆ ಮಿಟ್ಟೊ ಪಳೆಯಿಲ ತೆದ್ದನಾ ಮೆಳ್ಚೆ ಸಂತೋಷು, ಸಂಭ್ರಮು ತಾಕ್ಕ ಮೆಳನಾ. 

ಹೇ ಜೊಡಚೆ ತಾಕೂನು ಮೆಳಚೆ ಸಂತೋಷು. ಜೊಡಚೆ ತಾಕೂನು ಮೆಳಚೆ ಸುಖ ತೊಂಡಾಂತು ಸಾಂಗಲ್ಯಾರಿ ಆಮಕಾ ಕಳನಾ. ತೆಂ ಕೊಳಕಾ ಜಾಲಯಾರಿ ಕರ್ಮ(ಕಾಮ) ಕೊರಚಾಂತು ಮ್ಹೋಗು ವಾಡ್ಡೊನು ಘೆವಕಾ. ಕೆದ್ನಾಯಿ ಕರ್ಮಶೀಲ ಜಾವುನು ಆಸ್ಸುಕಾ. ಜಿಲೇಬಿ ಗೋಡ ಆಸ್ಸ ಮ್ಹೊಣು ಸಕಡಾಂಕ ಗೊತ್ತಾಸ್ಸ, ತಾಜ್ಜ ಖರೇ ಸ್ವಾದ ಕೋಳ್ನುಘೆವಚಾಕ ತ್ಯಾ ಕಾವ್ಚೆ ಕಶ್ಶಿ ಅಗತ್ಯ ಆಸ್ಸಕಿ, ತಶ್ಶೀಚಿ ಕರ್ಮಾಚೆ ಸುಖ ಕೊಳಕಾ ಜಾಲಯಾರಿ ನಿರಂತರ ಕರ್ಮ ಕೊರಚೆ ಅಗತ್ಯ ಆಸ್ತಾ. 

ಏಕಳೊ ವ್ಹಡ ಪೊಂಡಾಂತು ಪಳ್ಳ ಮ್ಹೊಣು ಸಮಜಿಯಾ. ತಾಕ್ಕ ವಯರಿ ಯವಚಾಕ ವಯರಿಚಾನ ಕೋಣತರಿ ದೋರಿ ಉಡ್ಡಯಲ್ಯಾರಿ ತ್ಯಾ ಧೊರನು ತಾಣೆ ವಯರಿ ಯಾನಾ ಮ್ಹಳಯಾರಿ ವಯರಿ ಆಶ್ಶಿಲ್ಯಾಲೆ ಚೂಕಿವೇ? ತಶ್ಶಿಚಿ ದೇವಾನ ಆಮಕಾ ಹಾತ್ಪಾಯು ಗಟ್ಟಿ ದೀವ್ನಾಶ್ಶಿಲ ತೆದ್ದನಾ, ಬುದ್ಧಿ ದೀವನು ಆಶ್ಶಿಲ ತೆದನಾ ಸಹಿತ ಕರ್ಮ ಕರನಾಶಿ ದೇವಾಕ ಆಕ್ಷೇಪು ಕೆಲಯಾರಿ ತ್ಯಾ ಖಂಡಿತ ಆಮಗೆಲೇಚಿ ಚೂಕಿ ಜಾತ್ತಾ.