ದೈನಿಕ ಪತ್ತೇದಾರಿ ಧಾರವಾಹಿ ವಾಂಟೊ - 3

ಜಾಲ್ಯಾರಿ ತ್ಯಾ ದೃಷ್ಠಿಕ ಮುಖಾಮುಖಿ ಕೊರಚೆ ತಾಕತ್ತ ಮ್ಯಾನೇಜರಾ ಲಾಗ್ಗಿ ನಾಶ್ಶಿಲೆ. ತ್ಯಾ ಕಾರಣಾನ ತೊಂ ಆಪಣಾಲೆ ದೃಷ್ಠಿ ಚಿಕ್ಕೆ ಬದಲ್ನು “ಕೆದ್ನಾಯಿ ಹಾಂಗಾ ಎತ್ತ ಆಶ್ಶಿಲಿ ಸಾರ್... ತಾಂತು ನೀಳ ಚೌಕುಳಿಚೆ ಗುಲಾಬಿ ಬಣ್ಣಾಚೆ ಶರ್ಟ್ ಘಾಲ್ನು ಘೆತ್ಲ್ಯಾ ಪಳೆಯಾ ತಾಗೇಲೆ ನಾಂವ ರುದ್ರಯ್ಯ ಖಂಯಿ. ತೊಂ ರಿಯಲ್ ಎಸ್ಟೇಟ್ ಕರತಾಲೊ ಮ್ಹೊಣು ಆಯ್ಕಲಾ. ತಾಗೆಲೊಟ್ಟು ಆಶ್ಶಿಲೊ ಆನ್ನೇಕ್ಳೊ ತಾಗೇಲ ದೋಸ್ತು; ವರುಣ ಮ್ಹೊಣು ತಾಗೆಲೆ ನಾಂವ. ತಾಂಗೆಲೆ ಘರ ಖಂಚೆ ಎರಿಯಾಂತು ಆಸ್ಸ ಮ್ಹಣಚೆ ಮಾಕ್ಕ ಗೊತ್ನಾ ಜಾಲ್ಯಾರಿ ಆಫೀಸ್ ಮಾತ್ರ ಮಿನಿ ವಿಧಾನಸೌಧಾ ಆಸ್ಸಮೂ ತಾಜ್ಜ ಲಾಗ್ಗಿ ಆಸ್ಸುಚೆ ‘ಸಮರ ಮಂದಿರಾಂತು ಆಸ್ಸ. ದೊಗ್ಗಚಿ ತೀನ್ಚಾರ ವರ್ಷಾಚಾನ ಪ್ರತಿ ದಿವಸು ಆಮ್ಗೆಲೆ ಬಾರಾಕ ಎತ್ತಾತಿ.

ಬಾರ್ ಮ್ಯಾನೇಜರ ಅಮರ್ ಶೆಟ್ಟಿನ ಸುದೀರ್ಘ ಜಾವ್ನು ಸಾಂಗಿಲೆ ವಿವರಾನಿ ಇನ್ಸ್‌ಫೆಕ್ಟರಾಕ ಮಸ್ತ ಇತ್ತುಲೆ ವಿಷಯು ಕಳೀತಾಕ ಆಯ್ಲಿ. ತಾಂತು ಏಕಳೊ ರಿಯಲ್ ಎಸ್ಟೇಟ್ ಬಿಜಿನೆಸ್ ಕರತಾ ಮ್ಹಣಚೆ ಆಯ್ಕಲ ಮಾಗಿರಿ ಅಂತೂ ಹೇ ಮರ್ಡರ್ ಜಾವ್ನಾಸ್ಸುಚೆ ಸಾಧ್ಯತಾ ಚ್ಹಡ ಮ್ಹೊಣು ತಾಕ್ಕಾ ದಿಸಲೆ.

ತಿತ್ಲ ಭಿತ್ತರಿ ಪೋಟೊಗ್ರಾಪರ್ ಯವ್ನು “ಸಾರ್ ಮೆಗೇಲೆ ಕಾಮ ಪೂರಾ ಜಾಲ್ಲೆ... ಮ್ಹಳ್ಳೊ. ‘ತುಮ್ಮಿ ಮುಖಾವೈಲೆ ಕಾಮ ಕೊರಯೇತ ಮ್ಹಣ್ಚ ಅಭಿಪ್ರಾಯು ತಾಗೆಲೆ ಉತ್ರಾಂತು ಆಶಿಲೆ “ಜಾಯ್ತ... ಜಾಯ್ತ... ತುಮ್ಮಿ ವಚ್ಚಾ... ಮ್ಹೊಣು ಸಾಂಗಿಲೊ ಇನ್ಸ್‌ಫೆಕ್ಟರು ಪರತ ತ್ಯಾ ನತದೃಷ್ಟ ಕಾರಾಲಾಗ್ಗಿ ಆಯಲೊ. ತಿತ್ಲ ಭಿತ್ತರಿ ಕಾರಾ ತಾಕೂನು ದೊನ್ನೀ ಮ್ಹಡೆಕ ಬಾಯರ ಕಾಡ್ನು ನಿದ್ಕರೈಸಿಲೀಲೆ. ತ್ಯಾ ರುದ್ರೇಶ ಮ್ಹೊಣು ಸಾಂಗಿಲೆ ಮನುಷ್ಯಾಲೆ ಮ್ಹಡೆ ವಯ್ರಿ ಪೋಡ್ನು ತಾಗೆಲೆ ಬಾಯ್ಲ-ಚರ್ಡುವಾನಿ ರೊಡಚೆ ದಿನೇಶ ದೃಷ್ಠಿಕ ಪಡಲೆ. ಘರಾಂತು ಕೋಣ್ತರಿ ಮೆಲ್ಲಿ ಮ್ಹಳಯಾರಿ ತಾಂಗೆಲೆ ಬಾಯ್ಲ, ಚರ್ಡುವಾನಿ ರೊಡಚೆ ಸಾಮಾನ್ಯ ವ್ಯಯಿ... ಜಾಲ್ಯಾರಿ ಇತಲೆ ತರ್ನೆಟ್ ಬಾಯ್ಲ, ಲ್ಹಾನ ಲ್ಹಾನ ಚರ್ಡುವಾಂಕ ಸೋಡ್ನು ರುದ್ರಪ್ಪಾನ ಮೆಲ್ಲಿಲೆ ದಿನೇಶಾಕ ಸಹಿತ ಮಸ್ತ ವಾಯ್ಟ ದಿಸಲೆ.