रोग निर्णयाचॆ स्टॆतॊस्कोप्

मनीषानि संदर्भाक सम्म जावनु सबार नमून्या उपकरण सॊदुनु घॆत्ता आयला. आरोग्य क्षेत्राक संबंध पावनु तसालॆ मस्त उपकरण दिवदिवसाक नवीकरण जावचॆ बरशि निरंतर सेवा पावयता आस्सुचॆ सकटांक गॊत्त आस्सा. तस्सालॆ उपकरणांतु मस्त म्हत्वाचेचि स्वॆतॊस्कोप्.

हर्‍येक वैद्यांक पळैच भित्तरि तान्नि डाक्ट्र्रू म्हॊणु गुर्‍तु कॊरनु दिवचॆ यंत्रचि स्टॆतॊस्कोप्. हे वैद्यालॆ मित्र वरॆन व्हयि. कन्नडांतु हाक्का आकर्णक म्हॊणु आपयताति. हर्दॆ, स्वासकोश, पोट, आंत, रक्तनाळ इत्यादि दोळ्याक दीसनाशिलॆ भितवयलॆ अंगाचॆ स्पंदन नांवॆ थरथरपाचॊ अवाज आयकूनु रोग निर्णयाक वापरचॆ उपकरणचि स्टॆतॊस्कोप्. हाज्जॆ जल्माचॆ माकसि एक रसभरित काणी आस्स. 

पयलॆ कालांतु म्हळयारि एक्कुणीसा शेकड्याचॆ पयलॆ दिवसांतु वैद्य तांगॆलॆ एक कान रोगिलॆ हर्दॆरि दवरूनु हर्देचॆ स्पंदन आयकताश्शिलॆ खंयि. त्या मूखांतर रोगिलॆ तपास करता आश्शिलॆ. १८१६ इस्वॆंतु एक्दीसु नॆकर्-ऎन्फांट्स् म्यालेड्स् आस्पत्रॆचॆ डा. रीनॆ थियोपिलॆ लॆनॆक् म्हणचॆ फ्रॆंच् वैद्या कडेन क्षय काय्लो आय्यिलि एकळि भाय्लमनीसॆनि आय्यिलॆ तॆद्दना डा. लॆनॆक् दुसर्‍यांक तपाद कॊरचॆ वरि आप्लालॆ कान तिगॆलॆ हर्दॆक लाव्नु तपास कॊरचाक माकसि सरता. जाल्यारि हुषार नाशी आय्यिलेक तपास करनाशि परत दाड्चॆ सम्मवे? अस्सलॆ उभय संगटांतु ताणॆ पडील तॆद्दना ताक्का एक विषयु नजराक ऎत्ता. कस्सलॆ म्हळयारि एक गट्टि पदार्थाक एक्कडॆ दाडॆयिलॆ तॆद्दना यवचॆ पॆट्टाचॆ आवाज आन्नेक्कडॆ स्पष्ट जाव्नु आय्कु पड्ता म्हणचॆ! तॆद्दना डा. लॆनॆक् कस्सलॆ करत म्हळयारि दाट्टुळ आस्सुचॆ कागदाचॆ पॊळ्ळ नळिका कॊरनु ताज्जॆ एक बगल तिगेलॆ हर्देरि दवरूनु आन्नेक बगलेक कान दीव्नु हर्देचॆ थरथरप आयकलॊ. आनि त्या ताक्का स्पष्ट जाव्नु आय्कलॆ खंयि. अशि सूरु जात्ता स्टॆतॊस्कोपाचॆ उगम. त्या स्टॆतॊस्कॊप् एक कान्नांतु मात्र आयकूचॆ तश्शि आश्शिलॆ. आनि हाक्का ‘लॆनिक् कान् म्हणचॆ नांव रूढिक आयलॆ. 

  मुखारि पियरॆ अडाल्फॆ पियोरिन हो १८२८ इस्वॆंतु स्टॆतॊस्कोप् हाक्का प्लॆक्सिमीटर् म्हणचॆ आन्नेक भाग मेळयता आनि तांतु मस्त इत्लॆ सुधारणा करता. मागिरि दॊन्नी कान्नांतु आयकुचाक अन्कूल जावचॆ तस्सालॆ स्टॆतॊस्कोप् १८५० ंतु तयार जात्ता. रब्बराचॆ नळिका आस्सुचॆ दॊन्नी कान्नानि शरीराचॆ विविंगड अंगाचॆ स्पंदन आयकूचॆ तस्सालॆ सुधार्‍लॆ स्टॆतॊस्कोप् १८९४ ताकूनु वापरचाक लागताति. १९०० इस्वॆंतु स्टॆतॊस्कोपांतु कार्डियॊफोन् म्हणचॆ विद्युदुपकरण वापरचाक लागलॆ. 

अपधमनि, रक्तनाळ आनि आंतांतु रगताचॆ धांवडी कशि आस्स म्हॊणु आयकूचाक वापरचॆ बरशि रगताचॆ दबाव(बि.पि.) मॆज्जूचॆ खात्तिरि वरॆन स्पिग्मोमानोमीटर् बरशि वैद्य स्टॆतॊस्कोप् वापरताति.

खालि वैद्य मात्र स्टॆतॊस्कोप् वापरताति म्हॊणु ठरयका मोणु ना. जांवॊ स्टॆतॊस्कोप् एक वैद्यकीय उपकरण मात्र म्हॊणु तीर्मानाक यवनाक्काति. "मॆक्यानिक् स्टॆतॊस्कोप्स्" यंत्रा ताकूनु यवचॆ ताज्जॆ भित्तवयलॆ आवाजु आयकुचाक वापरताति. एक यंत्राक बेरिंग् इत्यादि सबार पार्ट्स् घाल्नु आसताति न्हंयिवॆ? मिषन् घूवतना विविंगड पार्ट्साचॆ आवाज जांवॊ कंपन आयकूनु यंत्र सुस्थितिंतु आस्सकि ना म्हॊणु कळीताक हाड्नु घॆवचाक जात्ता. हे "मॆक्यानिक् स्टॆतॊस्कोप्" ताकूनु बस्स, लारि, कार इत्यादि वाहनाचॆ इंजिना भित्तवैलॆ  आवाज आयकुनु खंयि रिपेरि कॊरका म्हणचॆ कोळ्नु घॆव्येत. विंगड सबार संदर्भारि वरेन स्टॆतॊस्कोप्स् वापरताति. 

वैद्य विज्ञान विषयांतु सांका जालयारि स्टॆतॊस्कोप् यवचा वॊच्चुनु शरीराक खंचेयि मारक जायनाश्शिल तस्सलॆ उपकरणानि आंतरिक अंगरचना शास्त्र अभिवृद्धि पावचाक साध्य जाल्लॆ म्हॊणु वैद्यकीय इतिहासकार ज्याक्लिन् डफिन् तान्नि कॆलीलॆ वादांतु खंचेयि अतिशयोक्ति ना. कितयाक म्हळयारि स्टॆतॊस्कोप् सॊच्चॆ पयलॆ आंगा भित्तवैलॆ अंग रचना शास्त्र सॊच्चॆ तस्सालॆ सुलभाचॆ उपकरण नाश्शिलॆ!

उपरांत वैद्य विज्ञानि लोकानि मस्त नव नवॆं नमून्याचॆ स्टॆतॊस्कोप् शोध कॆल्लिंति. शब्धाचॆ अवाज च्हड कॊरचॆ तस्सलॆ स्टॆतॊस्कोपाक ‘पोनॆंडॊस्कोप् म्हणताति. ऎलॆक्ट्रानिक् स्टॆतॊस्कोप् वरॆन वैद्य लोक वापरताति. हाज्जॆ अन्कूल म्हळयारि निस्तंतु रूपानि वापरचाक जावचॆ बरशि विडियो रूपांतु वरॆन धॊरनु दवरचाक जात्ता. स्टॆतॊस्कोपाचॆ आन्नेक नमूनॆक ‘फीटल् स्टॆतॊस्कोप् म्हणताति. गुर्भिणि बाय्लमनीसॆलि पॊट्टा वयरि हे दवरूनु तिगॆलॆ गर्भांतु आस्सुचॆ चरडालॆ हर्देचॆ स्पंदन आयकुचाक हाजेन जात्ता. अडाल्फ् पिनार्ड् म्हणचॆ तज्ञानि हाज्जॆ शोध कॆल्लि. 

आजि वैद्य रंगांतु शरीराचॆ आंतरिक अंगरचना पळयचाक मस्त इत्लॆ नव नवीन उपकरण आयलेरि वरॆन स्टॆतॊस्कोपाचॆ महत्व कम्मि जायनि म्ह मागिरि वैद्यकीय रंगांतु त्या कित्तुलॆ उपयुक्त म्हॊणु परत सांकावे? ताजॆ शोधानि मनीषालॆ अनारोग्य सॊच्चाक व्हड एक हतयार मॆळीलॆ वरि जालीलॆ सत्य न्हंहिवे?