ಸುಖಾಚೆ ಪಾವಲಿ -8

ತುಮಗೇಲೆ ಉಜವೆಂ ಹಾತ್ತಾಂತು ದೋನ ಹಜಾರ ರೂಪಯಾಚೆ ಏಕ ನೋಟ ಆನಿ ದಾವೆಂ ಹಾತ್ತಾಂತು ಧಾ ರೂಪಯೇಚೆ ಏಕ ನೊಟ್ಟಾ ಕಾಟು ಆಸ್ಸ ಮ್ಹೊಣು ಸಮಜೂನು ಘೆಯಾ. ಖಂಚೆ ಹಾತ್ತಾಂತು ಆಶ್ಶಿಲೆ ರೂಪಾಯಕ ಮ್ಹೊಲ ಚ್ಹಡ? ದಾವೆಂ ಹಾತ್ತಾಂತು ಧಾ ರೂಪಯಾಚೆ ಶಂಬರಿ ನೊಟ್ಟ ಆಸಲೇರಿಚಿ ಉಜವೆಂ ಹಾತ್ತಾಂತು ಆಶ್ಶಿಲೆ ಏಕ್ಕಾ ಏಕ ನೋಟ್ಟಾಕ ಮ್ಹೊಲ ಚ್ಹಡ. ಕಿತಯಾಕ ಮ್ಹಳಯಾರಿ ದಾವೆಂ ಹಾತ್ತಾಂತುಲೆ ಧಾ ರೂಪಯಾಚೆ ಶಂಬರಿ ನೊಟ್ಟ ಮೇಳ್ನ ಜಾವ್ಚೆ ತಾಜ್ಜ ಒಟ್ಟು ಮೌಲ್ಯ ಖಾಲಿ ಏಕ ಹಜಾರ ರೂಪಯ ಜಾಲಯಾರಿ, ಉಜವೆಂ ಹಾತ್ತಾಚೆ ಏಕ್ಕಾ ನೊಟ್ಟಾಕ ತಾಜ್ಜ ದೋನಪಟ್ಟ (೨೦೦೦/-) ಮೌಲ್ಯ ಆಸ್ತಾ. ದೇವಾಕ ಆನಿ ಮನುಷ್ಯಾಕ ಆಸ್ಸುಚೆ ಫರಕ ಹೇಂಚಿಚಿ. ದೋನ ಹಜಾರಾಂತು ಮಸ್ತ ಧಾ ರೂಪಯಿ ಆಸತಾ ಮ್ಹಳಯಾರಿ ದೊನಶಿ ಧಾ ರೂಪಯಿ ಕೂಡ್ಸಿಲೇರಿ ದೋನ ಹಜಾರ ರೂಪಯ ಜಾತ್ತಾ; ತ್ಯಾಂಚಿ ಧಾ ರೂಪಯಾಂತು ದೋನ ಹಜಾರ ಆಸ್ಸನಾ. ಮ್ಹಳಯಾರಿ ದೋನ ಹಜಾರ ರೂಪಯಿ ಪಿಂದೂನು ಧಾ ರೂಪಯಿ ಕೊರಚಾಕ ಜಾಯನಾ.  

ಹೇಂಚಿ ನಮೂನೇನ ದೋನ ಹಜಾರಾ ನೋಟ ದೇವು ಮ್ಹೊಣು ಆಮ್ಮಿ ಸಮಜೂನು ಘೆತಲ್ಯಾರಿ; ಮನುಷ್ಯೂಚಿ ಧಾ ರೂಪಯಾ ನೋಟ ಮ್ಹಣ್ಯೇತ. ಆಮ್ಗೆಲೆ ಅವಯಿ, ಬಾಪಯಿ, ಬಾಯ್ಲ, ಚರಡು, ಬಾಳ ಹೇ ಸಕ್ಕಡ ಆಮ್ಗೆಲೆ ಕಾಟ್ಟಾಂತು ಆಸ್ಸುಚೆ ಇತರ ನೊಟ್ಟ. ದಾನ, ಧರ್ಮ, ಆಧ್ಯಾತ್ಮಿಕ ಸಾಧನಾ, ಜ್ಞಾನ, ಭಕ್ತಿ ಸಂಪಾದನೆ ತಾಕೂನು ಆಮ್ಮಿ ಆಮ್ಗೆಲೆ ನೊಟ್ಟಾ ಕಾಟ್ಟಾಂತು ಚ್ಹಡ ಚ್ಹಡ ನೊಟ್ಟಽ ಒಟ್ಟು ಕೊರನು ಘೆತ್ತಾ ವಚೆಽತ. ಜಾಲ್ಯಾರಿ ಅಧರ್ಮ, ದುಸ್ರ್ಯಾಂಕ ಫಸಾಯಚೆ, ಜಾಳ, ಭೊಗಚೆ, ಗರ್ವ, ಗಮಂಢಿಪಣ ದಾಕಯಚೆ ತಾಕೂನು ಮನುಷ್ಯು ಮ್ಹಣಚೆ ಧಾ ರೂಪಯಾ ನೋಟ ಜೀರ್ಣ ಜಾತ್ತಾ ವತ್ತಾ. ಮುಖಾರಿ ತೊಂ ಮೌಲ್ಯಹೀನ ಜಾತ್ತಾ. 

ದೋನ ಹಜಾರ ರೂಪಯಾಚೆ ದೇವಾಕ ಆಮ್ಮಿ ಪ್ರಾರ್ಥನ ಕರತಾತಿ, ದೇವಳ ಬಾಂದತಾತಿ, ಪೂಜಾ, ಪುನಸ್ಕಾರ ಕರತಾತಿ. ತಾಜ್ಜ ನಿಮಿತ್ಯ ಆಮ್ಗೆಲೆ ಇಷ್ಟಾರ್ಥ ಪೂರ್ತಿ ಕೊರನು ಘೆತ್ತಾತಿ. ತೇ ದೇವು ಜಾಲಯಾರಿಚಿ ಪರಿಪೂರ್ಣ ಮ್ಹೊಣು ಆಮ್ಮಿ ಸಮಜೂನು ಘೆವಚೆ ತಶ್ಶಿ ನಾ. ಕಿತಯಾಕ ಮ್ಹಳಯಾರಿ ದೋನ ಹಜಾರ ರೂಪಯಾ ನೋಟ ಜಾಲಯಾರಿಚಿ ಆಪ್ಣೀತ್ಲ್ಯಾಕ ಛಾಪುನು ಯಾನಾ. ತ್ಯಾ ಛಾಪತಾಲೊ ಆನ್ನೇಕ್ಳೊ ಆಸ್ತಾ. ತೋಂಚಿ ಪರಮಾತ್ಮು. ಹೇ ಸಕ್ಕಡ ಅಖಿಲಾಂಡ ಕೋಟಿ ಬ್ರಹ್ಮಾಂಡಾಂತು ತೊಂ ವಿಲೀನ ಜಾವನು ಆಸ್ತಾ. ಕೋಣ ಚಾಂಗ ಕರತಾತಿಕಿ, ಧರ್ಮ, ಸತ್ಯಾನಿ ಚಮಕಿತಾತಿಕಿ, ತ್ಯಾ ದಯಾಮಯ ವಯ್ರಿ ಭರ್‍ವಸ ದವರೂನು ಆಸತಾಕಿ ತಾಂಗೆಲೆ ಫಾಟಬಲಾಕ ರಾಬ್ಬುನು ತಾಂಗೆಲೆ ರಕ್ಷಣ ಕರತಾ. 

ಪರಮಾತ್ಮು ಕೋಣಾ ವಯರಿ ಕೃಪಾ ಘಾಲ್ತಕಿ ತಾಂಕಾ ಸುಖ, ಸಂತೋಷು, ಸಮೃದ್ಧಿ ದಿತ್ತಾ ಮ್ಹಣಚಾಕ ಜಾಯನಾ. ತಾಜ್ಜ ಬದಲಾಕ ತಾಗೆಲೆ ಶೇಷ ಕರ್ಮ ನಾಶಿ ಕೊರಚೆ ಖಾತೇರಿ ಬೆಗ್ಗಿ ಬೆಗ್ಗಿ ತಾಣೆ ಕಷ್ಟ, ದುಃಖ ಭೊಗಚೆ ವರಿ ಕೊರಚಾಕ ಪುರೊ. ಪರಮಾತ್ಮಾಲೆ ಕೃಪಾ ಆಮಚೇರಿ ಆಸ್ಸ ಮ್ಹೊಣು ಕೊಳಕಾ ಜಾಲಯಾರಿ ಅಸ್ಸಲೆ ವೇಳ್ಯಾರಿ ಕಸ್ಸಲೆ ಕಷ್ಟ, ದುಃಖ ಆಯಲ್ಯಾರಿಚಿ ನಿರಾತಂಕಾನಿ ಆಮ್ಮಿ ತಾಜ್ಜೆನ ಪಾರ ಪಡ್ತಾತಿ. ಮನಾಂತು ಶಾಂತಿ ಆಸ್ತಾ. ಫಾತ್ರಾರಿ ಉಳಿಚೆ ಪೆಟ್ಟು ಪೋಣು ಪೋಣು ತ್ಯಾ ಸುಂದರ ಮೂರ್ತಿ ಜಾವಚೆ ವರಿ ಆಮ್ಗೆಲೆ ವಯರಿ ಅವಮಾನು, ಕಷ್ಟ, ದುಃಖಾಚೆ ಪೆಟ್ಟು ಪಡಲ್ಯಾರಿ ಸಹಿತ ತೊಂ ಬೇಜಾರ್‍ನಾ, ಸಾಮಾನ್ಯಾ ವರಿ ದೇವಾಕ, ದುಸ್ರ್ಯಾಂಕ ಶಾಪು ಘಾಲ್ನಾ. ಬದಲಾಕ ಆಪಣಾಲೆ ಕರ್ಮ ಶೇಷ ನಾಶ ಜಾತ್ತಾ ಆಸ್ಸ ಮ್ಹೊಣು ಸಂತೋಷ ಪಾವ್ತಾ. ಬೆಗ್ಗಿ ಬೆಗ್ಗಿ ಆಪಣಾಕ ಹೇ ಕರ್ಮ ಶೇಷ ತಾಕೂನು ಪಾರ ಕೊರನು ಮೋಕ್ಷ ದೀ ಮ್ಹೊಣು ದೇವಾ ಕಡೇನ ಮಾಗಣಿ ಕರತಾ. ಕಡೇರಿ ಪರಮಾತ್ಮಾಲೆ ಭಿತೇರಿ ಮೇಳ್ನು ಸೊಡತಾ.