ಕರೋನಾತಂಕ ವೇಳ್ಯಾರಿ ಆಮ್ಗೆಲೆ ದೇಶಚಿ ಸುರಕ್ಷಿತ!

ವ್ಹಡ ರುಕ್ಕಾಚೆ ಏಕ ಗೆಲ್ಲ (ಕೊಂಬೆ) ವಾರೇಕ ಕುಡ್ಕೊ ಜಾವನು ಪಡಲಾರಿ ಜಾಂವೊ ಕೋಣಪೂಣಿ ಯವ್ನು ಕಾಂಡಲಾರಿ ಥಂಯಿ ವಾಂಚುನು ವ್ಹರಲೀಲೆ ಪಕ್ಷೀನ ಆನ್ನೇಕ ಗೆಲ್ಲಾ ವಯ್ರಿ ವಚ್ಚುನು ಜೀವು ವಾಂಚೊನು ಘೆವ್ಯೇತ. ಜಾಲ್ಯಾರಿ ಸಗಳೇ ರೂಕೂಚಿ ಪಡಲಾರಿ ತಾಜ್ಜೇರಿ ವಾಂಚೆ ಪ್ರಯತನ, ಧೈರ್ಯ ತ್ಯಾ ಪಕ್ಷಿ ಕರತಾಲವೇ? ಆಜಿ ಕರೋನಾತಂಕಾಚೆ ಉಜ್ಜೊ ಜಗಾಚೆ ಸಕ್ಕಡ ದೇಶಾಂತು ದಗದಗ ಮ್ಹೊಣು ಜಳ್ತಾ ಆಸ್ಸಾ. ಹಾಜ್ಜೆ ಕಾರಣಾನಿ ಯವಚೆ ಕೋವಿಡ್ -೧೯ ಕಾಯ್ಲೆನಿ ಲೋಕ ದೀವೆಕ ಘೇರಿ ಘಾಲೀಲೆ ಕೀಡ್ಯಾ ವರಿ ಹರ್‍ಯೇಕ ದೇಶಾಂತು ಹಜಾರಗಟ್ಲೆನಿ, ಲಾಕಗಟ್ಲೆನಿ ಮರತಾ ಆಸ್ಸಾತಿ. ಅಸ್ಸಾಲೆ ದುಷ್ಕಾಳಾಂತು ಕರೋನಾ ತಾಕೂನು ಚುಕ್ಕೋನು ಘೆವ್ಚೆ ಸುರಕ್ಷಿತ ದೇಶ ಖಂಚೆ? ಸಕ್ಕಡ ದೇಶಾಂತು ಲೋಕ ಮರತಾ ನಾಂತಿವೇ ? ಥಂಯಿಚಿ ಸೋಂಕಿತ ವ್ಹಡ ಪ್ರಮಾಣಾರಿ ನಾಂತಿವೇ? ತಶ್ಶಿ ಆಸತಾನಾ ಖಂಚೆ ದೇಶಾಕ ಘೆಲಯಾರೀಚಿ ಪೂರ್ತಿ ಸುರಕ್ಷಿತ ಉರತಾತಿ ಮ್ಹಣಚಾಕ ಜಾಯನಾ.

ಆಮ್ಗೆಲೆ ದೇಶಾಂತು ಕರೋನಾ ವೈರಸ್ಸಾಚೆ ಅಟ್ಟೂಳಿ ಮಸ್ತ ಮಿತಿ ಮೀರೂನು ಘೆಲ್ಲಾ ಮ್ಹೊಣು ಸಕ್ಕಡ ಬೊಬ ಮಾರತಾ ಆಸ್ಸಾತಿ. ದಿವಸು-ರಾತಿ ಮ್ಹಣಾಶಿ ಎಲೆಕ್ಟ್ರಾನಿಕ್ ಆನಿ ಪ್ರಿಂಟಂಗ್ ಮಾಧ್ಯಮಾಂತು ತಶೀಚಿ ಸಾಮಾಜಿಕ ಜಾಲತಾಣಾಂತು ದೇಶಾಚೆ ಕರೋನಾ, ಕೋವಿಡ್ ಪರಿಸ್ಥಿತಿ ಭಯಾನಕ ಮ್ಹಣ್ಚೆವರಿ ಉಮ್ತೆ-ಉದ್ದಾರೆ ಕೊರನು ಸಾಂಗತಾ ಉರತಾತಿ. ರೋಗಿಂಗೆಲೆ ಹಾಹಾಕಾರ, ಬೆಡ್ ನಾ, ಪ್ರಾಣವಾಯು ನಾ, ತಾಜ್ಜೆನ ಘಡೀಲೆ ಮರಣ, ತಳಮಳ, ಆಸ್ಪತ್ರೆಚೆ ದುಃಸ್ಥಿತಿ, ಮಾನವತಾ, ನೈತಿಕತಾ ಮೊರನು ಘೆಲೀಲೆ ತಸ್ಸಾಲೆ ಹೂನ ಹೂನ ದೃಶ್ಯ ಸಾಕ್ಷಾತ ಜಾವನು ಎಲೆಕ್ಟ್ರಾನಿಕ್ ಮಾಧ್ಯಮಾಂತು ಪಳಯತಾನಾ ಕಿತ್ಲೋ ಧೈರ್ಯವಂತ ಜಾಲಯಾರೀಚಿ ತಾಗೆಲೆ ಜಾಂಗೇಚೇ ಬಳ(ಜಂಘಾಬಲ) ಕರಗೂನು ವಚ್ಚುನು ತೋಂ ಆತಂಕ, ಭಯ್ಯಾಕ ಶಿರಕೂನು ವಿಭ್ರಾಂತ ಜಾತ್ತಾ. 

ಸಮುದ್ರಾಚೆ ಲ್ಹಾರಾ(ಅಲೆ) ಆಯ್ಯಿಲ ತಾವ್ವಳಿ ಏಕ್ಕಚಿ ಆಮ್ಮಿ ತಾಜ್ಜ ಪಶಿ ದೂರ ವ್ಹರಕಾ ನಾಂವೆ ತ್ಯಾ ಆಮಚೆ ಲಾಗ್ಗಿ ಯಾನಾ ತಶ್ಶಿ ಕಂಟೋಣು ಬಾಂದಕಾ. ನಾಂವೆ ದುಸರೇ ಖಂಚತರಿ ಆಡಬಳ ಘಾಲಕಾ. ಕಸ್ಸಲೇ ಕರನಾಶಿ ಸಮುದ್ರಾಚೆ ಲ್ಹಾರಾ ಆಮಕಾ ತಾಂಡೂನು ವ್ಹರತಾ ಮ್ಹೊಣು ಭಿತ್ತಾ ಬಸಲೇರಿ ಜಾತ್ವೆ? ಹೇ ಸಕಡಾಂಕ ಗೊತ್ತಾಸ್ತಾ ನ್ಹಂಹಿವೇ?

ಕರೋನಾ ನಾಂವೆ ಕೋವಿಡ್ -೧೯ ಹೇ ಏಕ ಸಾಂಕ್ರಾಮಿಕ ಕಾಯ್ಲೊ ಮ್ಹಣಚೆ ಸಕಡಾನಿ ಜಾಣೂನು ಆಶ್ಶಿಲೆ ವಿಷಯು. ಕೋಣಯಿ ನಜರ ಚುಕ್ಕಿನ ಜಾಂವೊ ನಿರ್ಲಕ್ಷ್ಯಾನಿ ಉರಲ್ಯಾರಿ ತಾಂಕಾ ಕರೋನಾ ವೈರಸ್ ಯವ್ನು ಅಪಟೂನು ಘೆತ್ತಾ ಮ್ಹಣಚೆ ಸಗಳ್ಯಾಂಕ ಇತ್ತುಲೆ ಭಿತ್ತರಿ ಕಳ್ಳಾ. ಆನಿ ಕರೋನಾ ತಾಕೂನು ದೂರ ಉರಕಾ ಮ್ಹಳಯಾರಿ ಕೆದನಾಂಯಿ ಮಾಸ್ಕ ಘಾಲ್ನು ಘೆವ್ಕಾ, ಪರಸ್ಪರ ಅಂತರ ರಾಕ್ಕೂನು ಘೆವ್ಕಾ, ಭಾಯರತಾಕೂನು ಆಯ್ಲಸತ್ತಾ ಚಾಂಗ ಕೊರನು ಹಾತ್ಪಾಯು ಧೂವ್ನು ಘೆವ್ಕಾ, ವಸ್ತ್ರ ಬದಲ ಕೊರಕಾ. ಮಸ್ತ ಚುರಕಾನಿ ಕರೋನಾ ಪಸರತಾ ಆಸ್ಸ. ತ್ಯಾ ಖಾತ್ತಿರಿ ರಿಸ್ಕ್ ಘೆವಚಾಕ ನಜ್ಜ, ಘರಾ ಭಿತ್ತರೀಚಿ ಉರಕಾ. ಆನಿ ಕರೋನಾ ಲ್ಹಾರಾ ಲಾಗ್ಗಿ ಯವಚಾಕ ನಜ್ಜ ಮ್ಹೊಣು ಜಾಲಯಾರಿ ಘಾಲ್ಕಾ ಜಾಲೀಲೆ ಆಡಬಳ ಮ್ಹಳಯಾರಿ ಆಮ್ಗೆಲೆ ಶರೀರಾಚೆ ರೋಗನಿರೋಧಕ ಶಕ್ತಿ ಚ್ಹಡ ಕೊರನು ಘೆವ್ಕಾ. ಆಮ್ಗೆಲೆ ದೇಶಾಚೆ ಲೋಕಾಂಗೆಲೆ ಸಾಂಪ್ರದಾಯಿಕ ರಾಂದಪಾಂತೂ ಆನಿ ರಾಂದಪಾಕ ವಾಪರಚೆ ಮಸಾಲೇ ಪದಾರ್ಥಾಂತು, ಝಾಡ-ಮೂಳಾಂತು ತಸ್ಸಾಲೆ ಉಪಾಯು ಬರಪೂರ ಭೊರನು ಆಸ್ಸಾ. ಋಷಿ-ಮುನಿ ಲೋಕಾನಿ ಹೇ ಸೊದ್ದುನು ಆಮಕಾ ಕಳಯಲಾ. ನಿಯಮಿತ ಯೋಗಾಭ್ಯಾಸಾನಿ ತಾಂತೂ ಪ್ರಾಣಾಯಾಮಾನಿ ಶರೀರಾಚೆ ರೋಗನಿರೋಧಕ ಶಕ್ತಿ ವೃದ್ಧಿ ಕೊರನು ಘೆವಚಾಕ ಜಾತ್ತಾ ಮ್ಹೊಣು ವೈದ್ಯಕೀಯ ಲೋಕ ವರೇನ ಕಬೂಲ ಕರತಾ. ತಾಜ್ಜ ಬರಶಿ ಆತ್ತಾ ಕೋವಿಡ್ -೧೯ ಕಾಯ್ಲೆ ವಿರುದ್ಧ ಪರಿಣಾಮಕಾರಿ ಜಾಲೀಲೆ ಲಶೀಕಾ ಆಯಲಾ. ತಾಜ್ಜೆ ದೋನ ಡೋಸ್ ಘೆತಲೇರಿ ಆಮಕಾ ಕರೋನಾ ಇನ್‌ಫೆಕ್ಷನ್ ಜಾಲಯಾರೀಚಿ ಕ್ರೂರ ಕೋಮಿಡ್ -೧೯ ಕಾಯ್ಲೆಚೆ ಉಪಟಳಾಚಾನ ೯೫ % ಟಕ್ಕೆ ಪಾರ ಜಾವ್ಯೇತ ಕಂಯಿ. ಘೋರ ಮರಣಾ ತಾಕೂನು ಚುಕ್ಕೂನು ಘೆವ್ಯೇತ ಕಂಯಿ. ದೇಶಾಂತು ಧಾ-ಬಾರ ಕಡೇಂತು ಲಶೀಕಾ ತಯಾರ ಕೊರಚಾಕ ಆರತ ಕೇಂದ್ರ ಸರಕಾರಾನಿ ಅವಕಾಶ ದಿಲೀಲೆ ಆಸ್ಸುನು ಕನಿಷ್ಠ ಶಂಬರಿ ಕಡೇನ ಪೂಣಿ ಲಶೀಕಾ ತಯಾರ ಕೊರಚಾಕ ವ್ಯವಸ್ಥಾ ಜಾವಕಾ. ತಾಜೇನಿ ದೇಶಬರಿ ಕೋವಿಡ್ -೧೯ ಉಪಟಳ ಬೆಗ್ಗೀಚಿ ರಾಬಯಚಾಕ ಸಾಧ್ಯ ಜಾತ್ತಾ. ಹೇ ಖಾತ್ತಿರಿ ಅಧಿಕಾರಾಂತು ಆಶ್ಶಿಲ್ಯಾನಿ ಆಪಲೆ ಇಚ್ಛಾಶಕ್ತಿ ದಾಖಯಚೆ ಗರಜ ಆಸ್ಸಾ. 

ಘೆಲೀಲೆ ಜನವರಿ ಮ್ಹಹಿನ್ಯಾ ತಾಕೂನೂಯಿ ದೇಶಾದ್ಯಂತ ಲಶೀಕಾ ಅಭಿಯಾನ ಶೂರ ಜಾಲೀಲೆ ಆಸ್ಸುನು ಇತ್ಲೆ ಭಿತ್ತರಿ ಧಾ ಟಕ್ಕೆ ಪಶಿ ಚ್ಹಡ ಲೋಕಾನಿ ಮ್ಹಳ್ಯಾರಿ ಪಂದ್ರ ಕೋಟಿ ಲೋಕಾನಿ ಲಶೀಕಾಚೆ ಪಯಲೆ ಡೋಸ್ ಘೆತಲಾ. ತಾಂತು ಚಾರ ಕೋಟಿ ಲೋಕಾನಿ ದುಸರೇ ಡೋಸ್ ವರೇನ ಘೆತಲ್ಯಾ. ಕೇಂದ್ರ ಆನಿ ರಾಜ್ಯ ಸರಕಾರಾನಿ ಕರೋನಾ ಲಶೀಕಾ ಉಚಿತ ಜಾವನು ಆಪ್ಲೆ ಸಗಳೆ ಪ್ರಜಾಲೋಕಾಂಕ ದಿವಚೆ ವಾಗ್ಧಾನ ಕೆಲ್ಲಾ. ಹಾಕ್ಕ ಸಕಡಾಂಕ ಕಿರೀಟ ದವರೀಲ ವರಿ ಕರೋನಾಕ ಪರಿಣಾಮಕಾರಿ ೨ಡಿಕ್ಸೋಯ್ ಡಿ ಗ್ಲೋಕೋಸ್ ಮ್ಹಣಚೆ ವಾಕ್ಕದ ವರೇನ ಜಗಾಂತೂ ಪಯಲೇಚೆ ಜಾವನು ಭಾರತಾಂತು ಸೊದಲಾ. ಹಾಜೇನಿ ಕೋವಿಡ್ ರೋಗಿ ಬೆಗ್ಗಿ ಹುಷಾರ ಜಾತ್ತಾ ಕಂಯಿ.  ಕರೋನಾ ನಿರ್ನಾಮ ಕೊರಚಾಂತು ಆನಿ ಲೋಕಾಲೆ ಭಯಿ ದೂರ ಕೊರಚಾಂತು ಹೇ ಸಕ್ಕಡ ಆಶಾದಾಯಕ ವಿಷಯು ನ್ಹಂಹಿವೇ?

ಕರೋನಾ ವೈರಸ್ಸಾಕ ಆಮ್ಗೆಲೆ ದೇಶಾಚಾನ ಇಚ್ಛ ಪಾವ್ನು ಆಪ್ಪೋನು ಘೇನಿ. ಕೋಣಾಂಕ ಕಳಯನಾಶಿ ಗುರ್‍ತುನಾಶ್ಶಿಲೆ ಸೊಯರ್‍ಯಾ ವರಿ ಆಯಲೆ ಕರೋನಾ ದೇಶಾದ್ಯಂತ ಅಪಾರ ಆನಿ ಅಸಹನೀಯ ಜಾವನು ಅಟ್ಟೂಳಿ ಕರ್‍ತಾ ಆಸ್ಸಾ. ತಾಕ್ಕಾ ಧಾಂವ್ಡೋಕಾ; ತಾಜ್ಜೆ ಬರಶಿ ದೇಶಾಚೆ ಅಮೂಲ್ಯ ಜೀವಾಂಕ ರಾಕ್ಕೂನು ಘೆವ್ಕಾ. ತ್ಯಾ ಕಾರ್ಯ ಆಮ್ಗೆಲೆ ಸರಕಾರ, ವೈದ್ಯಲೋಕ, ವಿಜ್ಞಾನಿ ಲೋಕ ಸಕ್ಕಡ ಮೇಳ್ನು ಯುದ್ದೋಪಾದಿಂತು ಕರತಾ ಆಸ್ಸಾತಿ. ಹ್ಯಾ ಏಕ ಮಹಾಯುದ್ಧ; ಹಾಂತು ಆಮ್ಮಿ ಮ್ಹಳಯಾರಿ ಪ್ರಜಾ ಲೋಕಾನಿ ಹಾತು ಮೆಳೋವಕಾ ಮ್ಹಣಚೆ ಸಕ್ಕಡಾನಿ ಜಾಣೂನು ಘೆವ್ಕಾ. ಬುದ್ಧಿಜೀವಿ ಲೋಕಾನಿ ತಸ್ಸಾಲೆ ಸಮಜ (ಜ್ಞಾನ) ಸಾಮಾನ್ಯ ಲೋಕಾಂಕ ದಿವಕಾ.

ದೇಶ ಸೋಡ್ನು ವಚ್ಚೆ, ಯುವಕಾರಾಂಗೆಲೆ ಭವಿಷ್ಯ ಸಂಪೂನು ಘೆಲ್ಲೆ ಮ್ಹಣ್ಚೆ ತಸ್ಸಾಲೆ ನಿರಾಶಾದಾಯಕ ಉತ್ರ ಕೋಣೆಯಿ ಕೊರಚಾಕ ನಜ್ಜ. ಆನ್ನೇಕ ಆಶಾದಾಯಕ ವಿಷಯು ಮ್ಹಳಯಾರಿ ಆಠ್ರ ವರ್ಷಾ ಪಶಿ ಲ್ಹಾನ ಚರಡುವಾಂಕ ಲಶೀಕಾ ದಿವಚಾಕ ಕ್ಲಿನಿಕಲ್ ಪರೀಕ್ಷಾ ಆರಂಭ ಜಾಲ್ಲಾ ಮ್ಹಣಚೆ ವಿಷಯು. ದೇಶಾಚೆ ಚರಡುವಾಂಕ ಲಶೀಕಾ ಮೆಳಚಾಕ ಲಾಗಲೆ ಮ್ಹಳಯಾರಿ ತೆದ್ದನಾ ಸಗಳೆ ದೇಶಚಿ ಪೂರ್ತಿ ಸುರಕ್ಷಿತ ಜಾಲ್ಲಾ ಮ್ಹೊಣು ಅರ್ಥು ಕೊರಯೇತ. ತಾಂಗೆಲೆ ಆಂಗಾ ಭಿತ್ತರೀಚಿ ಕೋವಿಡ್-೧೯ ಕಾಯಲೇಚೆ ವಿರುದ್ಧ ಚಾಂಗ ರೋಗನಿರೋಧಕ ಶಕ್ತಿ ವೃದ್ಧಿ ಕೊರಚಾಕ ಜಾತ್ತಾ. ಹೇ ಮಧೇ ‘ಬ್ಲ್ಯಾಕ್ ಫಂಗಸ್ ಮ್ಹಣಚೆ ಶಿಲೀಂದ್ರ ರೋಗ ವರೇನ ಕೋವಿಡ್-೧೯ ಚಾನ ಹುಷಾರ ಜಾಲೀಲ್ಯಾಂಕ ಮಸ್ತ ಬಾಧಾ ದಿತ್ತಾ, ತಾಂಗೆಲೆ ಜೀವಹರಣಾಕ ವರೇನ ಕಾರಣ ಜಾತ್ತಾ ಮ್ಹಣಚೆ ಮಸ್ತ ಆತಂಕಾಚೆ ವಿಷಯು ಜಾವ್ನಾಸ್ಸಾ. ಜಾಲಯಾರಿ ಗೋಡಮೂತ ಆಶ್ಶಿಲ್ಯಾನ ರಗತಾಂತು ಸಾಕ್ರೆಚೆ ಪರಿಮಾಣ ನಿಯಂತ್ರಣಾಂತು ದವರೂನು ಘೆವ್ಕಾ. ಕೋವಿಡ್-೧೯ ಕಾಯ್ಲೆಕ ಘೆತ್ತಿಲೆ ಕೆಲವ ವಾಕ್ದಾನಿ ರಗತಾಂತು ಸಾಕ್ರೆ ಪರಿಮಾಣ ವೃದ್ಧಿ ಜಾವಚೆ ಸಾಧ್ಯತಾ ಆಸ್ಸ ಕಂಯಿ. ತ್ಯಾ ಖಾತ್ತಿರಿ ಅಗತ್ಯ ಕಾಳಜಿ ಘೆವ್ನು ಆಮ್ಮಿ ಹುಷಾರಾನಿ ಆಸ್ಸುಚಾಕ ಸಾಧ್ಯ ಆಸ್ತಾ. ನ್ಹಂಹಿಸಿ ಕರೋನಾಚೆ ತೀಸರೆಚೆ ಲ್ಹಾರಾ ಚರಡುಂವ ವಯ್ರಿ ಆಕ್ರಮಣ ಕೊರಚೆ ಆತಂಕ ವೈದ್ಯ ವಿಜ್ಷಾನೀನ ವ್ಯಕ್ತ ಕೆಲ್ಲಾ. ತ್ಯಾ ಅವಘಡ ಘಡ್ಚೆ ಪಯಲೇಚಿ ಆಮ್ಮಿ ತಾಜೇನ ಚರಡುವಾಂಕ ರಾಕೂನು ಘೆವಚಾಕ ಆತ್ತಾ ತಾಕೂನೂಯಿ ಅಗತ್ಯ ಮುಂಜಾಗೃತಾ ಘೆವ್ಕಾ. 

ವಿಶ್ವಗುರು ಸ್ವಾಮಿ ವಿವೇಕಾನಂದಾನಿ ಸಾಂಗಿಲ್ವರಿ `ಸೂಖ ದುಃಖಾಚೆ ಕಿರೀಟ ಘಾಲ್ನು ಘೇವ್ನು ಮನುಷ್ಯಾ ಮುಖಾರಿ ಯವ್ನು ರಾಬತ ಕಂಯಿ. ಕೋಣಾಂಕ ಸೂಖ ಜಾವಕಾಕಿ ತಾನ್ನಿ ದುಃಖಾಕ ಸ್ವೀಕಾರ ಕೊರಕಾಚಿ ಕಂಯಿ.' ತಶೀಚಿ “ಖಂಚೆಕ ಭೀವನಾಕ್ಕಾ, ಅತ್ಯದ್ಭುತ ಕಾರ್ಯ ತುಜ್ಜೆನ ಘಡ್ತಾ. ಭಯೀಚಿ ಪ್ರಪಂಚಾಚೆ ಸಕ್ಕಡ ದುಃಖಾಕ ವ್ಹಡ ಕಾರಣ. ಆಮ್ಕಾ ವಾಯಟ ಅವಸ್ಥೆ ವರೇನ ತಾಜೇನಯಿ ಎತ್ತಾ. ನಿರ್ಭಯಾನಿ ಉರಚೆ ನಿಮಿತ್ತ್ಯಾನಿ ಘಡೆ ಭಿತ್ತರಿ ಸ್ವರ್ಗ ಆಸ್ಸಾ ಕೊರನು ಘೆವ್ಯೇತ. ತಾಜ್ಜ ಖಾತ್ತಿರಿ ಉಟಾನು ರಾಭ, ಜಾಗೃತ ಉರಿ ಆನಿ ಲೆಕ್ಕಿಲೆ ಆಸ್ಸ ಕೊರನು ಘೆವಚೆ ಪರ್ಯಂತ ನುತ್ ರಾಬ್ಬೂನಾಕ್ಕಾ'' ಮ್ಹೊಣುಯಿ ಸ್ವಾಮಿ ವಿವೇಕಾನಂದ ಸಾಂಗತಾತಿ. ಆನಿ ಮ್ಹಣತಾತಿ “ಹಾಂವ ಹಾಂಗಾಕ (ವಿದೇಶಾಕ) ಯವಚೆ ಪಯಲೆ ಹಿಂದೂಸ್ತಾನಾಕ ಮ್ಹೋಗು ಕರತಾ ಆಶ್ಶಿಲೊ. ಜಾಲ್ಯಾರಿ ಹಾಂಗಾಕ ಆಯಲೆ ಉಪರಾಂತ ಆತ್ತ ಹಿಂದೂಸ್ಥಾನಾಚೆ ಕಣಕಣ ಮಾಕ್ಕಾ ಪವಿತ್ರ ಮ್ಹೊಣು ದಿಸಚಾಕ ಲಾಗಲಾ. ಆತ್ತ ತ್ಯಾ ಪುಣ್ಯ ಭೂಂಯಿ, ಯಾತ್ರಾಸ್ಥಳ, ತೀರ್ಥಸ್ಥಾನ ಜಾಲ್ಲಾ'' ಮ್ಹೊಣೂ ಸಾಂಗತಾತಿ. ದೇಶ ಸೋಡ್ನು ವಚ್ಕಾ ಮ್ಹೊಣು ಆಶ್ಶಿಲ್ಯಾಂಕ ಸ್ವಾಮಿ ವಿವೇಕಾನಂದಾಂಗೆಲೆ ದೇಶಾಭಿಮಾನಾಚೆ ಉತ್ರ ಮಹತ್ವಾಚೆ ಪಠ್ಯ ಮ್ಹೊಣು ಸಾಂಗೆತ ಕಿತ್ಕಿ. ಹೇ ದೇಶಾಚೆ ಸಕ್ಕಡ ಪ್ರಜಾ ಲೋಕಾನಿ ದೇಶಪ್ರೇಮು ದವರೂನು ಘೇವ್ನು ಸಾಂಕಾ ``ಕೆದ್ನಾಯಿ ಆಮ್ಗೆಲೆ ದೇಶಚಿ ಆಮ್ಕಾ ಸುರಕ್ಷಿತ!'' ನಿರಾಶಾದಾಯಕ ಯವಜಿಣ ಸೋಡ್ನು ಆಶಾದಾಯಕ ಯವಜಿಣ ಕೊರಚೆ ತಾಕೂನು ಆಮ್ಮಿ ಹೇ ಮಹಾಸಂಕಷ್ಟ ತಾಕೂನು ಸೂಖಾಂತು ಪಾರಜಾತ್ತಾತಿ.