‘ಬಾಯ್ಲ-ಬಾಮ್ಣಾಲೆ ಜಗಡಿ......(Part-1)

‘ಬಾಯ್ಲ-ಬಾಮ್ಣಾಲೆ ಜಗಡಿ ಜೇವ್ನು ನಿದ್ದೊ ಪರ್ಯಂತ ಮ್ಹಣಚೆ ಆದ್ಗತಿ ತುಮ್ಮಿ ಆಯಕೂನು ಆಸ್ಸುಚಾಕ ಪುರೊಂತಿ. ಖಂಯ ಪರ್‍ಯಂತ ಹೇ ಆದ್ಗತಿ ಸಮ್ಮ ಮ್ಹಳಯಾರಿ “ಹಾಂವ ಗರೀಬ ತೂ ದುರ್ಬಳಿ; ಮ್ಹೋಗುಚಿ ಆಮ್ಗೆಲೆ ಜೀವನ ಮ್ಹಣಚೆ ಪರಿಯಂತ! ದುಸರ್‍ಯಾನಿ ಬಾಂದಿಲೆ ಘರ, ಘೆತ್ತಿಲೆ ಕಾರ ಪಳೋನು ಆಮ್ಮಿ ತಾಂಗೆಲೆ ತಶ್ಶೀಚಿ ಆಸ್ಸುಕಾ ಮ್ಹಣಚೆ ಭಾವನಾ ಲೋಕಾಂತು ಯವಚಾಕ ಲಾಗಲೆ ಉಪರಾಂತ “ಬಾಯ್ಲ-ಬಾಮ್ಣಾಲೆ ಜಗಡಿ ಕಾರ ಘೆವ್ಚೆ ಪರ್ಯಂತ ನಾಂವೆ ಘರ ಘೆವ್ಚೆ ಪರ್ಯಂತ ಮ್ಹೊಣು ಬದಲ್ಲೆ. ಆತ್ತಂತು ನೌಕರಸ್ಥ ಚೆಲ್ಲೀ ಜಾವ್ಕಾ, ವ್ಹಡ ನೌಕ್ರಿಕ ವಚ್ಚೆ ಚಾಲ್ಲೋ ಜಾವ್ಕಾ ಮ್ಹೊಣು ಪಿಕ್ಕಿಲೆ ಮಾತ್ತೆ ಕೇಸಾಕ ಬಣ್ಣು ಲಾವ್ನು ಘೆವಚಾಕ ಶೂರ ಕೆಲ್ಲ ನಂತರ ಮಸ್ತ ಯುವಕಾರ ಲಗ್ನ ಜಾವಚಾಕ ಲಾಗ್ಲಿಂತಿ. ತ್ಯಾ ಕಾರಣಾನಿ ನವೀನ ಆದ್ಗತಿ ಸೃಷ್ಟಿ ಜಾವಚಾಕ ಲಾಗಲಾ. ಕಸಲೆ ಮ್ಹಳಯಾರಿ “ಬಾಯ್ಲ-ಬಾಮ್ಣಾಲಿಂ ಜಗಡಿ ವಿಚ್ಛೇದನ ಜಾವ್ಚೆ ಪರ್ಯಂತ ಮ್ಹೊಣು.

ಹಾಜ್ಜ ಬರಶಿ ಬಾಮಣಾಕ ಆಪ್ಪಣ ದಾರಲೋ, ಊಂಚ ಮ್ಹಣಚೆ ಗರ್ವ ಆಸಲೇರಿ ಬಾಯ್ಲೇಕ(ಸಕಟಾಂಕ ನ್ಹಂಹಿ) ಶಿಕ್ಕಿಲಿ, ನೌಕರಸ್ಥಿ ಮ್ಹಣಚೆ ಗಮಂಢಿ ಭೊರನು ಆಸತಾ. ತ್ಯಾ ಖಾತ್ತಿರಿ ದೊಗ್ಗಾ ಮಧೇ ಹಾಂವ ಊಂಚ, ತೂವೆ ಸಾಂಗಿಲೆ ಹಾಂವೆ ಇತಯಾಕ ಆಯ್ಕುಕಾ? ಮ್ಹಣಚೆ ಭಾವನಾ ಭೊರನು ಆಸತಾ. ಅಸ್ಸಲೆ ವೇಳ್ಯಾರಿ ಏಕಳ್ಯಾನಿ ಕೋನ್ತರಿ ಸುಧಾರ್ನು ಘೆಲಯಾರಿ ತ್ಯಾ ಸಂಸಾರು ಉರತಾ. ಆರ್ತ ಏಕ ಪೇಪರಾಂತು ಹಾಂವೆ ವಾಜ್ಜಿಲೆ ಹೇ ಹಾಸ್ಪಟಾಕಿ ಮಜಾ ಬರಶಿ ಕಿತ್ಲೆ ನೀತಿಬೋಧಕ ಜಾವನು ಆಸ್ಸಾ ಪಳೆಯಾ. 

ವಕೇಲಾಲೊ ಏಕಳೋ ಪೂತು ಆಪಲೆ ಅವಯುನಿ ಮಾರಲೆ ಮ್ಹೊಣು ರಡತಾ ಯವ್ನು ಬಾಪ್ಪಾ(ಆನ್ನಾ)ಲಾಗ್ಗಿ ಆಮ್ಮಾ ವಿರುದ್ಧ ಪೀರ್ಯಾದ ಸಾಂಗ್ತ ಖಂಯಿ. ತ್ಯಾ ವಕೀಲಾಲೆ ಪುತ್ತಾ ಇರಾದೋ ಕಸ್ಸಲೆ ಮ್ಹಳಯಾರಿ “ಬಾಪ್ಪಾನಿ ಅಮ್ಮಾಕ ಬಿಷ್ಟಾನು ಮಾಕ್ಕಾ ಖುಷಿ ಕರಕಾ ಮ್ಹಣಚೆ! ಜಾಲಯಾರಿ ತ್ಯಾ ವಕೀಲಾನಿ ಕಸಲೇ ಕೆಲ್ಲ ಮ್ಹಳಯಾರಿ ಪುತ್ತಾಕಚಿ ಆನಿ ಚಾರ ಪೆಟ್ಟು ತಾಪ್ಪೊನು ಪೆಟೈಲೆ ಕಂಯಿ. ಆತ್ತ ಪುತ್ತಾಲೆ ರಾಗು ಬಾಪ್ಪಾ ವಯ್ರಿ ಘೂವ್ಲೆ. ಪೂತು ಫೀರ್ಯಾದ ಘೆವನು ಪರತ ರಡತಾ ಅವಸೂಲೆಂ ಘೆಲ್ಲೊ. ಚರಡುವಾಂಕ ಆಪಣಾನಿ ಮಾರಚೆ ಚಾಂಗ ಅಕ್ಕಲ ಎವಚಾಕ ಮ್ಹೊಣು ಸಮಜೂಚೆ ಅವಯಿಕ ದುಸರ್‍ಯಾನಿ ಮಾರಲ್ಯಾರಿ ಆಂತ ಚುರ್‍ಕ ಮ್ಹಣ್ತಾ. ರೌದ್ರಾವತಾರ ಪಾವನು ಆಯ್ಲಿ ಪಳೇಯಾ ತೀ! ಬಾಮ್ಣಾ ಲಾಗ್ಗಿ ಜಗಡ್ಚಾಕ ತಯಾರ ಜಾವ್ನು! ಆನಿ ಮಸ್ತ ಕ್ರೋಧಾಂತು ಬಾಮ್ಣಾಕ ನಿಮ್ಗಿಲೀಂ “ಮೆಗೆಲೆ ಬಾಳಾಕ (ಮಾಂತಾರೊ ಜಾಲಯಾರೀಚಿ ಅವಯಿಕ ಪೂತು ಬಾಳೂಚಿ!) ಇತಯಾಕ ಮಾರಲೆ ತುಮ್ಮಿ? ತೆದ್ದನಾ ಪೂತು ಅವಯಿ-ಬಾಪಯ್ಲೆ ಮಧೇ ಚೊಲ್ಚೆ ಜಗಡ್ಯಾಚೆ ಮಜಾ ಘೆವ್ಕಾ ಮ್ಹೊಣು ತಯ್ಯಾರ ಜಾವ್ನು ಬಸಲೊ.

ಜಾಲಯಾರಿ ವಕೀಲು ಬಾಮ್ಮುಣು ಮನಾಕ ಖಾಂಯಿ ದಬಾವ್ ಕೊರನು ಘೇನಾಶಿ ಶಾಂತ ಜಾವನು “ಪಳೇ ತಾಕ್ಕಾ ತೂಂ ಮಾರಲೆ... ತೋ ಮೆಜ್ಜಲಾಗ್ಗಿ ಫೀರ್ಯಾದ ಘೆವನು ಆಯಲೊ. ಸುಪ್ರೀಂ ಕೋರ್ಟಾಂತು ಜಾಲೀಲೆ ಜಜ್‌ಮೆಂಟ್ ಹೈಕೋರ್ಟಾಂತು ನಿಮ್ಗೂಚಾಕ ಜಾತ್ವೆ...? ಮ್ಹಳ್ಳೊ. ಜಗಡ್ಯಾಕ ಜಾಂಗ ಪೆಟ್ಟಿತಾ ಆಯಲೇಲಿಂ ಬಾಯ್ಲೆಲೆ ತೋಂಡ ಗಪ್‌ಚಿಪ್...!

ಸಗಳ್ಯಾಲೆ ಘರ್‍ಚೆ ಭಿತ್ತವಯಲೆ ಗೋಷ್ಠಿ ಇತ್ಲೆಚಿ ಪಳೇಯಾ. ದಾಕೊನು ಘೆವಚಾಕ ಬಾಮ್ಮುಣು ಘರ್‍ಚೊ ಯಜಮಾನು ಜಾಲಯಾರಿ ತೀರ್ಮಾನ ಘೆತ್ತಲಿ ಬಾಯ್ಲಚೀ. ಭಾಯರಿ ಪಳಯತನಾ ಆಮಕಾ ತದ್ವಿರುದ್ಧ ಜಾವನು ದಿಸ್ತಾ. ಪಯರೀ ಮೆಗೆಲೊ ಏಕಳೊ ದೋಸ್ತು ಮೆಳೀಲೊ... ಮೈಸೂರಾಚೆ ಜಗತ್ ಪ್ರಸಿದ್ಧ ರಾವಳಾರ ಖಾತ್ತಿರಿ ಮಸ್ತ ಉಲಯಿಲೊ. ತೆದನಾ ಹಾಂವೆ ಮ್ಹಳ್ಳೆ “ಪರಾಂಕ ಅಠ್ಠಾವೀಸಾಕ ಹಾಂವ ತೈಕ ಜಾಲಿ ಟ್ರಿಪ್ ಘಾಲ್ಕಾ ಮ್ಹೊಣು ಕೆಲ್ಲಾ. ತುಗೆಲೆ ಟಿಕೇಟಾ ಪೈಸೊ, ಖರ್ಚು ಸಕ್ಕಡ ಹಾಂವಚಿ ಪಳೋನು ಘೆತ್ತಾ... ಯೆತ್ತವೆ...? ಮ್ಹಳ್ಳೆ. ಏಕ-ದೋನ ಘಽಡಿ ಆಸಾಮಿ ಗಪ್ ಜಾಲ್ಲೊ. 

“ಹೋ ಬಾಯ್ಲೇಕ ನಿಮಗೂನು ಘೆವ್ಕಾ ಕಿತ್ಕಿ ನ್ಹಂಯಿವೇ? ಮ್ಹಳ್ಳೆ. ಬಹುಶಃ ಮೆಗೆಲೆ ಸ್ವರಾಂತು ತಾಕ್ಕಾ ಕೀಡಯಿಲೆ ಭಾವನಾ ದೆಕ್ಕು ಪಡಲೆ ಕಿತ್ಕಿ. ಏಕದಂ ರಾಗು ಕೊರನು ಘೆತ್ತಿಲೊ ತೊಂ “ಆಮ್ಗೆಲ ಘರ್‍ಕಡೆ ತ್ಯಾ ಸಕ್ಕಡ ನಾಭಾ... ಬಾಯ್ಲೆಲಾಗ್ಗಿ ನಿಮ್ಗೂಚೆ-ಗಿಮ್ಗೂಚೆ ಖಾಂಯಿ ನಾ... ಹಾಂವ ಬಾಯ್ಲೇಕ ಭೀವ್ನು ಉರ್‍ತಲೊ ಮ್ಹೊಣು ಕೆಲಯಾವೇ ತೂಂವೆ? ಆಮ್ಗೆಲೆ ಘರ್‍ಕಡೆ ಮೆಗೆಲೇಚಿ ಫೈನಲ್ ತೀರ್ಮಾನು... ಹಾಂವೆ ಸಾಂಗ್ಲ ಮಾಗಿರಿ ಜಾಲ್ಲೆ...! ಜಾಲ್ಯಾರಿ ತ್ಯಾ ದಿವಸು ವಿಂಗಡ ಖಂಚತರಿ ಪಯ್ಲೆಚಿ ಘಾಲ್ನು ಘೆತ್ತಿಲೆ ಕಾರ್ಯಕ್ರಮು ಆಸ್ಸಕಿ ಪಳೋಕಾ... ಹಾಂವ ತುಕ್ಕಾ ಫಾಯಿ ಸಕ್ಕಣಿ ಫೋನ್ ಕೊರನು ಸಾಂಗತಾ ಮ್ಹಳಿಲೊ ಅಸಾಮಿ ಹೆರ್‍ದೀಸು ಸಾಂಜವಾಳಾ ಪರಂತ ಫೋನ್ ಕರನಾಶಿ ಉರಲೀಲೆ ತೆದನಾ ಹಾಂವಚಿ ತಾಕ್ಕಾ ಫೋನ್ ಕೆಲ್ಲೆ. ತಾಗೆಲೊ ಪೂತು ಫೋನ್ ರಿಸೀವ್ ಕೆಲ್ಲೊ. “ಬಾಪ್ಪಾ ನಾರೇ.. ಮ್ಹಳಿಲ್ಯಾಕ “ದುಕಾನಾಕ ಕಸಲ್ಕಿ ಸಾಮಾನು ಹಾಡಚಾಕ ಘೆಲ್ಲಾ ಮ್ಹಳ್ಳೊ. ತೆದನಾ ಹಾಂವ ತಾಕ್ಕಾಚಿ “ತುಗೆಲೆ ಆನ್ನಾನಿ ಕಾಲಿ ಅಶ್ಶಿ ಅಶ್ಶಿ ಸಾಂಗಿಲೆ ಮೈಸೂರಾಕ ಯತ್ತಕಿ ನಾಂಕಿ ಮ್ಹೊಣು ಆಯ್ಲ ಕೂಡ್ಲೆ ಮಾಕ್ಕಾ ಫೋನ್ ಕೊರನು ಸಾಂಗ ಮ್ಹಣ ಮಳ್ಳೆ.

ಕೂಡ್ಲೆ ತಾಣೆ “ಆಮ್ಮಾನಿ ಮೈಸೂರಾಕ ವಚ್ಚೆ ನಾಕ್ಕಾ ಮ್ಹಳಿಲ್ಯಾಕ ಆನ್ನಾನಿ ಯವಚೆ ಪ್ರೋಗ್ರಾಂ ಕ್ಯಾನ್ಸಲ್ ಕೆಲ್ಲಾ ಮ್ಹಳ್ಳೊ... ತೀರ್ಮಾನ ಘೆತ್ತಿಲಿಂ ಕೋಣ ಮ್ಹೊಣು ತುಮ್ಮಿ ಸಮಜಿಯಾ.