ದೈನಿಕ ಧಾರವಾಹಿ ವಾಂಟೊ - 7

ಇತ್ಲೆ ಬ್ರಿಲಿಯಂಟ್ ಜಾವ್ನು ಮರ್ಡರ್ ಕೆಲಯಾರಿಚಿ ಹಾಂವೆ ಕಶ್ಶಿ ಸೊದ್ಲೆ ಮ್ಹೊಣು ತುಕ್ಕಾ ಆಶ್ಚರ್ಯ ಜಾವ್ನಾಸ್ಸುಕ ಪುರೊ. ಪಳೆ ಹರ್‍ಯೇಕು ಕ್ರಿಮಿನಲ್ ಅಪರಾಧ ಕೆಲ್ಲ ಮಾಗಿರಿ ತಾಕ್ಕಾ ಗೊತ್ನಾಶ್ಶಿ ಏಕನ್ಹಂಯಿ ಏಕ ಸಾಕ್ಷಿ ಥಂಯಿ ಸೋಣು ವತ್ತಾ. ತಶ್ಶಿಚಿ ತೂಂವೆ ಕೆಲೀಲೆ ಚೂಕಿ ಮ್ಹಳಯಾರಿ ಪರ್‍ಪರತ ಸ್ಟೇಷನ್ನಾಕ ಯವ್ನು ಮಾಕ್ಕಾ ಟಾರ್ಚರ್ ಕೆಲೀಲೆ. ಹಾಜ್ಜ ಪಯ್ಲೆ ಏಕ್ಪಂತ ರುದ್ರಯ್ಯ ಬಾಯ್ಲ ರಮಣಿಕ ಆಯ್ಯಿಲೆ ಆಸ್ತಿ ಮಾರಚಾಕ ರೌಡಿಸಂ ಕೊರಚಾಕ ಆಯ್ಯಿಲೊ ತೂಂ ಆತ್ತ ಏಕದಂ ತಿಗೇಲ ಖಾತಿರಿ ಕನಿಕರ ದಾಖಯ್ತಾ ಕಿತಯಾಕ? ರುದ್ರಯ್ಯಾನ ಮೆಲಯಾರಿ ಮುನಾಪೋ ಜಾವ್ಚೆ ತುಕ್ಕ ಮಾತ್ರ. ತಶ್ಸಿ ಆಸತಾನಾ ತೂಂಚಿ ಕಿತಯಾಕ ಧಾವ್ನುಖೆಳ್ತಾ ಆಸ್ಸ ಮ್ಹಣಚೇಚಿ ಮಾಕ್ಕಾ ತುಗೇಲೆ ವಯ್ರಿ ಸಂಶಯ ಯವಚಾಕ ಕಾರಣ. ತೆದ್ದನಾ ಹಾಂವೆ ಆಮ್ಗೆಲೆ ಪೋಲೀಸ್ ಡಿಪಾರ್ಟ್‌ಮೆಂಟಾಚೆ ಮಾಹಿತಿದಾರಾಂಕ ತುಗೆಲೆ ಮಾಕ್ಷಿ ಸೊಡಲೆ. ತಾನ್ನಿ ತೂಂವೆ ಹೇ ಮಾನಸಕುಮಾರಾ ಬರಶಿ ವ್ಯವಹಾರು ಕೊರಚೆ ಮಾಕ್ಕ ಎವ್ನು ಸಾಂಗಲೆ; ತಿತ್ಲೇ ನ್ಹಂಹಿ ತೊಂ ಕಸಲೇಕಕಿ ತುಕ್ಕಾ ಬ್ಲಾಕ್‌ಮೇಲ್ ಕರ್ತ ಆಸ್ಸ ಮ್ಹೊಣೂ ಸಾಂಗ್ಲೆ. ಆಪಣಾನ ದಿಲೀಲೆ ಐಡಿಯಾಕ ತೀನ ಪುರ್‍ಜಾಯ್ನಾ; ಪಾಂಚ ಲಾಕ್ ದಿವ್ಕಾ; ನಾತಲೇರಿ ಪೋಲೀಸಂಚಾಂಕ ಸಾಂಗ್ತಾ ಮ್ಹೊಣು ತೊಂ ತುಕ್ಕಾ ಬ್ಲಾಕ್‌ಮೇಲ್ ಕರ್ತಾ ಆಶ್ಶಿಲೊ ನ್ಹಂಹಿವೇ? ಆಮ್ಮಿ ತಾಕ್ಕ ಆರೆಸ್ಟ್ ಕೊರನು ಚಾರ ಗುಪ್ಪಿಲ ಮಾಗಿರಿ ಹೇ ಪೂರಾ ಕೋಳ್ನು ಆಯಲೆ. 

ತೂಂವೆ ಹೇ ಮಾನಸಾಕ ರುದ್ರಯ್ಯಾಲೆ ದೋಸ್ತಿ ಕೊರಚಾಕ ಪೆಟೋನು, ತ್ಯಾ ದಿವಸು ರುದ್ರಯ್ಯಾಕ ಆನಿ ವರುಣಾಕ ತಾಳ ಭರ್ತಿ ಪಿವೋನು, ತಾಜ್ಜ ದುಡ್ಡು ಬಾರಾಚಾಂಕ ಮಾನಸಾ ತಾಕೂನು ದಿವೋನು ಕಾರ ಚಡಯಿಲೆ; ತಾಜ್ಜ ಪಯ್ಲೆಚಿ ಡೂಪ್ಲಿಕೇಟ್ ಕೀ ವಾಪರನು ಎ.ಸಿ.ಚಾನ ಕಾರ್ಬನ್ ಮೊನಾಕ್ಸೈಡ್ ಕಾರಾ ಭಿತ್ತರಿ ಭೊರಚೆ ವರಿ ಕೆಲೀಲೆ. ತಾನ್ನಿ ಕಾರ ಚಡಚ ಭಿತ್ತರಿ ಕಾರಾ ಬಾಗಿಲ ಘಾಲ್ನು ಡೂಪ್ಲಿಕೇಟ್ ಬೀಗಾ ಹಾತ್ತಾನಿ ಲಾಕ್ ಕೆಲೀಲೆ. ಮಾಗಿರಿ ತಾನ್ನಿ ಮೆಲ್ಲಿ ಮ್ಹಣಚೆ ಖಾತ್ರಿ ಜಾಲ್ಲ ಸತ್ತಾ ದುಸ್ರ್ಯಾಂಕ ಅನ್ಮಾನು ಯವಚಾಕ ನಜ್ಜ ಮ್ಹೊಣು ಲಾಕ್ ಕಾಡ್ನು ದವರೂನು ಘೆಲ್ಲಿಲೆ..... ಪೂರಾ ತಾಣೆ ಸವಿಸ್ತಾರ ಜಾವ್ನು ಸಾಂಗಲಾ. ಮ್ಹಣ್ತಾ.