ಸುಖಾಚೆ ಪಾವಲಿ -1

ಭಿದ್ಯತೆ ಹೃದಯಗ್ರಂಥಿಶ್ಚಿದ್ಯಂತೇ ಸರ್ವ ಸಂಶಯಾಃ|

ಕ್ಷೀಯಂತೇ ಚಾಸ್ಯ ಕರ್ಮಾಣಿ ತಸ್ಮಿನ್ ದೃಷ್ಟೇ ಪರಾವರೇ|| (ಮುಂಡಕ ೨/೨/೮)

ಹೇ ಬ್ರಹ್ಮಾಲೆ ಮಾನಸ ಪುತ್ರ ಮಹರ್ಷಿ ಅಂಗೀರಸ ಸ್ಮೃತಿಂತುಲೆ ಉತ್ರ. ಮ್ಹಳಯಾರಿ “ಪರತ್ಪರ ಪುರುಷೋತ್ತಮಾಕ ತತ್ತ್ವಾ ತಾಕೂನು ಗ್ಯಾನ ಘೆವಚೆ ಮುಖಾಂತರ ಜೀವಾತ್ಮಾಚೆ ಬಂಧನಾ ತಾಕೂನು ಸೊಡೊನು ಘೆವಯೇತ ಮ್ಹೊಣು ಸಾಂಗಲಾ. ಸಂಶಯ ಕಸ್ಸಲೆ ಆಸಲೇರಿಚಿ ನಿವಾರಣ ಜಾತ್ತಾ. ಸಕ್ಕಡ ನಮೂನ್ಯಾಚೆ ಶುಭಾಶುಭ ಕರ್ಮಾಂಚೆ ನಷ್ಟ ಜಾತ್ತಾ ಮ್ಹೊಣು ಅರ್ಥು. ಮಹರ್ಷಿ ಅಂಗಿರಸ ‘ಅಥರ್ವ ವೇದಾಚೆ ಪ್ರವರ್ತಕ ಮ್ಹಣತಾತಿ. ತ್ಯಾ ಖಾತ್ತಿರಿ ಹಾಕ್ಕಾ ‘ಅಥರ್ವ ಮ್ಹಣ್ಚೆ ನಾಂವಯಿ ಆಸ್ಸ. 

ಅಂಗಿರಸ ಮಹರ್ಷಿನಿ ಪುರುಷೋತ್ತಮಾಕ ಮ್ಹಳಯಾರಿ ಪರಮಾತ್ಮಾಕ ತತ್ತ್ವಾಚೆ ಗ್ಯಾನ ಘೆವಚೆ ಮೂಖಾಂತರ ಜೀವಾತ್ಮಾಚೆ ಬಂಧನ ತಾಕೂನು ಸೊಡೊನು ಘೆವಯೇತ ಮ್ಹಳ್ಳಾ. ತತ್ತ್ವ ಮ್ಹಣಚೆ ಸಂಸ್ಕೃತ ಶಬ್ಧು. ಹಾಕ್ಕಾ ವಿಧಿ, ನಿಯಮು, ಸತ್ಯ, ವಾಸ್ತವ ಇತ್ಯಾದಿ ಅರ್ಥು ಆಸ್ಸ. ಅಂಗೀರಸಾಲೆ ಉತ್ರಾ ಪ್ರಮಾಣೆ ತತ್ತ್ವಾಕ ಸತ್ಯ ಮ್ಹೊಣು ಸಮಜೂನು ಘೆವಚೇಚಿ ಸಮ್ಮ. ಕಿತಯಾಕ ಮ್ಹಳಯಾರಿ ತಾನ್ನಿ ಆಪ್ಲೆ ಆನ್ನೆಕ ಶ್ಲೋಕಾಂತು ಸತ್ಯಮೇವ ಜಯತಿ ನಾನೃತಂ| ಸತ್ಯೇನ ಪಂಥಾ ವಿತತೋ ದೇವಯಾನಃ(ಅರ್ಥು : ಕೆದನಾಂಯಿ ಖರೇಪಣಾಕ ಜೀಕ, ಅಸತ್ಯಾಕ ನ್ಹಂಹಿ. ಕಿತಯಾಕ ಮ್ಹಳಯಾರಿ ಪರಮಾತ್ಮು ಪರಮ ಸತ್ಯ ಸತ್ಯ ಸ್ವರೂಪಿ. ತ್ಯಾ ಖಾತ್ತಿರಿ ತಾಕ್ಕಾ ಮೆಳಚಾಕ ಹರ್‍ಯೇಕ ಮನೀಷಾನಿ ಸತ್ಯರೂಪೀ ಧರ್ಮವಾಟ್ಟೆಚೆ ಆಶ್ರಯಾಂಂತು ವಚ್ಚುಕಾ. ಪರಮಾತ್ಮಾಲಾಗ್ಗಿ ವಚ್ಚುನು ಪಾವಚೆ ಹೇ ದೇವಯಾನ ವಾಟ ಸತ್ಯಪಶಿ ಚ್ಹಡ ಪ್ರತಿಷ್ಟಿತ ಜಾಲೀಲೆ. ಪಟ್ಟಿಕ(ಅಸತ್ಯಾಚೆ) ವಾಟ್ಟೆಂತು ವತ್ತಾಲೊ ಪರಮಾತ್ಮಾಕ ಪ್ರಾಪ್ತಿ ಕೊರನು ಘೆವಚಾಕ ಜಾಯನಾ. ಪಟ್ಟಿಕ ಉಲಯುಚೆ, ಆಡಂಬರ, ಧೋಕೋ ದಿವಚೆ ತಾಕೂನು ಅಧಃಪತನಾಚೆ ವಾಟ ದಿಸ್ತಾ) ಮ್ಹೊಣು ತಾನ್ನಿ ಖರೇಪಣಾಚೆ ಮಹತ್ವ ಸಾಂಗತಾತಿ. ಪರಮಾತ್ಮಾಕ ಸತ್ಯ ಮೂಖಾಂತರ ಕೋಳ್ನು ಘೆತಲಾರಿ ಆಮ್ಮಿ ಹೇ ಜೀವಾತ್ಮಾಚೆ ಮ್ಹಳಯಾರಿ ಜನನ, ಮರಣಾಚೆ ಬಂಧನಾ ತಾಕೂನು ಪಾರ ಜಾವ್ಯೇತ ಕಂಯಿ. 

ಜೀವನಾಂತು ದುಸರ್‍ಯಾಂಕ ಪಾಡ ಕೊರಚೆ, ಜಾಳ ಭೊಗಚೆ, ದ್ವೇಶ ಕೊರಚೆ, ಆಮ್ಗೆಲೆ ನ್ಹಂಯಶ್ಶಿಲೇಕ ಆಶಾ ಪಾವಚೆ ಹೇ ಸಕ್ಕಡ ನಾ ಜಾಲ್ಯಾರಿ ತ್ಯಾಂಚಿ ಖರೇಪಣ. ಜಗಾಂತೂಲೆ ಸಕ್ಕಡ ಜೀವಿ ಮೆಗೆಲೆ ವರಿ ವಾಂಚಾಕ ಆಯಲಾ. ಮಾಕ್ಕಾ ಕಶ್ಶಿ ಮರ್ಯಾದೆಂತು ಚಾಂಗ ಜಾವನು ವಾಂಚಕಾ ಮ್ಹೊಣು ಆಸ್ಸಕಿ ತಾಂಕಾಚಿ ತಸ್ಸಾಲೆ ಆಶಾ ಆಸ್ಸುಚೆ ಸಹಜ ನ್ಹಂಹಿವೇ? ಹೇ ಜಗಾಂತು ಮನೀಷಾಕ ಮಾತ್ರ ನ್ಹಂಹಿ ಪಶು, ಪಕ್ಷಿಂಕ ವರೇನ ವಾಂಚೆ ಅಧಿಕಾರ ಆಸ್ಸ. ತಾಕಾಯಿ ಆಮ್ಮಿ ಅವಕಾಶ ಕೊರನು ದಿವ್ಕಾ. ಮಸ್ತ ಲೋಕ ಮುಖಾರಿ ಮಾತ್ರ ಖರೇಪಣ ದಾಕೋನು ಮಾಕಸಿ ತಾಕೂನು ಆಪ್ಲೆ ಫಟಿಂಗ ಪಣ ಮುಖಾರ್‍ಸುನು ವ್ಹರತಾತಿ. ಹೇ ಸತ್ಯ ನ್ಹಂಹಿ. ದುಸರ್‍ಯಾಂಕೊ ಧೋಕೋ ದಿವಚೆ ನಮೂನೊ. ಮನಾಂತು ಏಕ ಆಸ್ಸುನು ಕೃತಿಂತು ಆನಿ ಕಸಲ್ಕಿ ಕೆಲಯಾರಿ ತ್ಯಾ ಸತ್ಯ ಜಾಯನಾ. ತೊಂಡಾಂತು ಖರೇ ಉಲಯಚೆ ಬರಶಿ ಆಮ್ಗೆಲೆ ಕಾರ್ಯಾಂತೂ ವರೇನ ತ್ಯಾ ವ್ಯಕ್ತ ಜಾವಕಾ. ಮನಾಂತೂ ಮಾಸ ಖಾವ್ಕಾ ಮ್ಹಣಚೆ ಆಶಾ ದವರೂನು ಘೇವ್ನು ಕಿತ್ಲೆ ಕಠಿಣ ವ್ರತಾಚರಣ ಕೆಲಯಾರೀಚಿ ತಾಜೇನಿ ನಯಾ ಪ್ಯೆಸೆ ತಿತ್ತುಲೆ ಮುನಾಪೋ ಮೇಳ್ನಾ. ತ್ಯಾ ಕಾರಣಾನಿ ಮನ, ಬುದ್ದಿ ಆನಿ ಶರೀರ ಮೆಳೋನು ಆಮ್ಮಿ ಉಲಯಚೆ ಉತ್ರಾಂತು, ಕೊರಚೆ ಕಾಮ್ಮಾಂತು ಸತ್ಯ, ಮ್ಹೋಗು ಆಸ್ಸುಕಾ. ತೆದ್ದನಾ ಜನನ-ಮರಣಾಚೆ ಚಕ್ರಾನಿ ಪಾರ ಜಾವ್ಯೇತ. -Argodu Suresh Shenoy