बुद्दु की बुद्दोंतु

एक ग्रहस्थाक आनि ग्रहिणिक तीनि चेर्डुंव आश्शिलिं। चेल्लो माह्लगडो। बुद्दोंतु, लग्ना वाड्डिलो आनि बैंग्ळूरांतु नौकरि कर्त आश्शिलो। दुस्रेचि धूव मैट्रिक जाव्नु घरांतु आश्शिलि आनि लग्ना वाड्डिलि। तिस्रेचो चेल्लो कोलेजा वत्ता आश्शिलो आनि स्वभावानि मस्त विनोदि आश्शिलो।

तांका बाजु गांव्चे लायेक एक साठ्ठे सोय्रीक मेळ्ता। जांवइ जात्तलो मुल्कि जाव्नु आंगडि बस्त आश्शिलो। स्वभावानि चिकेन बुद्दु आश्शिलो। सून मैट्रिक शिक्किलि, चंदि आनि गुणाड्य आश्शिलि।

दोन्नि लग्न गड्देरि जात्ता। धूव बाम्णाले धरा वत्ता। पूतु बाय्लेक धेव्नु बेंग्ळूराक वत्ता।

नव्वा महिन्याक धूव बाळांतिर्याक कुळार येत्ता। गुर्बिणि जेव्वण चंदायेरि जाव्नु बाळां जात्ता आनि चेल्ले चेर्डु जात्ता।

पाळ्यां घाल्चे वेळारि सर्व आप्तेष्ट बस्सुनु आश्शिले। त्या विनोदि भावान आवाजु होडु कोर्नु सांग्ले "कोण म्हण्ता आम्गेलो भावजि बुद्दु म्होणु। तो खरेंचि बुद्दोंतु। नव्वा महिन्याकचि ताक्का चेर्डु जाल्यां। आनि आम्गेले बुद्दोंतु अण्णा पक्का बुद्दु। ताणे कांयिपुणि गुड् नीव्स दिल्याकि?"

जमिले सर्व जन खो खो खो म्होणु पोण पोणु हास्ले।