ಪಾವ್ಶಿ ರಾತ್ರ ಆನಿ ಬಿಬಟೊ

ಹೀ ಗೋಷ್ಟಿ ಇ.ಸ 1993 ತು ಘಡಿಲಿ. ಜೂನ ಮ್ಹೈನ್ಯಾಂತು ಝೋರಾನ ಪಾವ್ಸು ಪೊಡಚ್ಯಾಕ ಸುರು ಜಾಲಿಲೊ. ಆಮ್ಗೆಲ ಟ್ರೇಕಿಂಗ ಗ್ರೂಪ್ ಮನಸೋಕ್ತ ಪಾವ್ಸಾಂತು ತಿಂಬಚ್ಯಾಕ, ವರ್ಷಾ ಋತುಚ ಆನಂದ ಲೂಟಚ್ಯಾಕ ಲೋಹಗಡ, ವಿಸಾಪುರ ಗೆಲಿಲೆ.

ಟ್ರೇನ ಟಾಯ್ಮಾರಿ ಧಾಂವ್ನಾಸಿಲಿಂ. ಲೋಣಾವಳಾ ಪಾವ್ತನಾ ತೀನ ತಾಸ ಲೇಟ ಜಾಲಿಲೊ. ಥಯಿಂ ದೇವ್ನು ಲೋಣಾವಳಾ ಪುಣೆ ಲೋಕಲ್ ಟ್ರೇನಾರಿ ಮಳವಲಿ ಪಾವ್ತನಾ ಪೂರ್ಣ ಕಾಳೋಕ ಜಾಲಿಲೊ. ಕಾಳ್ಕಾಂತು ಕಚ್ಚಾ ರಸ್ತೇರಿ ಚಾರ ಕಿ.ಮೀ ಚಲತ ಲೋಹಗಡವಾಡಿ ಮ್ಹಳಿಲ ಹಳ್ಳಿಂತು ಗೆಲೆ. ರಾತ್ರಿಚೆ ತ್ಯಾಚ ಗಾಂವ್ತುಲೆ ದೇವಳಾಂತು ವಸತಿ ಕೆಲ್ಲಿ. ದೇವಳ ಮ್ಹಳ್ಯಾರಿ ತ್ಯಾ ಗಾಂವ್ತುಲ್ಯಾಂನಿ ತಾತ್ಪೂರ್ತಿಕ ಬಾಂದಿಲ ಪತ್ರೆಚ ಶೆಡ್ಡ.

ಲೋಹಗಡವಾಡಿ ಸಾನ ಗಾಂವು. ದೋನ ಗುಡ್ಡೆ ಮದೆಂ ಆಸ್ಸಾ. ತ್ಯಾ ಗಾಂವಾಂತು ಫಕ್ತ ವೀಸ-ಪಂಚ್ವೀಸ ಘರ ಆಸ್ಸಾತಿ. ದುಕಾನ, ಹೋಟೆಲ್ ನಾಂತಿ. ಕೋಣಾಂಕ ಸಾಂಗ್ಲ್ಯಾರಿ ಜೇವಣ ಖಾಣಾ ವ್ಯವಸ್ಥಾ ಕರ್ತಾತಿ. ಆಮ್ಮಿ ಪಿಟ್ಲ, ಭಾತ, ಭಾಕ್ರಿ ಆನಿ ಬಟಾಟಾ, ಕಾಂದಾ, ಟೋಮೆಟೊ ಘಾಲ್ನು ರಸ್ಸಾ ಕೋರ್ಚ್ಯಾಕ ಸಾಂಗ್ಲೆಂ. ತೆ ತಯಾರ ಜಾವಥಾಯಿಂ ತಾಸ, ದೇಡತಾಸ ಚಂದಕೋರ್ನು ದೇವಾಲ ಭಜನ ಕೆಲ್ಲೆಂ. ಆಮ್ಗೆಲ ಮಂಡಳಿಂತು ಭಜನ ಮ್ಹಣತಲೆ ದಾರ್ಲೆ, ಬಾಯ್ಲಂ ಆಸ್ಸಿಲಿಂತಿ.

ಜೇವಣ ತಾನ್ನಿ ದೇವಳಾಂತು ಹಾಣು ವಾಳ್ಳೆಂ. ಕಾರಣ ಆಮ್ಮಿ ವೀಸ-ಬಾವೀಸ ಲೋಕ ಆಸ್ಸಿಲೆ. ತಾಂಗೆಲ ಸಾನ ಘರಾಂತು ಜಾಗೊ ಪಾವ್ನಾಸಿಲೊ.

ತೆ ದಿಸ ಅಮಾಸ ಆಸ್ಸಿಲಿ. ಆಮ್ಕಾಂ ಗೊತ್ನಾಸಿಲೆ. ಆಮ್ಮಿ ಟ್ರೇಕಿಂಗಾಕ ವತ್ತನಾ ಪಂಚಾಂಗ ಪೊಳೋಚೆ ನಾ. ಫಕ್ತ ಓಫೀಸಾಕ ರಜಾ ಕೆನ್ನಾ ಆಸ್ಸಾ ಮ್ಹೋಣು ಪೊಳೋಚೆಂ.

ರಾತ್ರಿ ಕಾಳ್ಕಿ. ಆಸ-ಪಾಸ ಗುಡ್ಡೆ. ವನ್ಯ ಪ್ರದೇಶ. ಅಚಾನಕ ಭಾಯ್ಲೆ ವಾತಾವರಣ ಬದಲ್ಲೆಂ. ಗುಡುಗುಡು, ಸಿಡ್ಲು, ಸೂಸಾಟ ವಾರೊ ಆನಿ ಝರಂಪತಿ ಪಾವ್ಸು ಪೊಡಚ್ಯಾಕ ಸುರು ಜಾಲಿಲೊ. ವಾರ್ಯಾ ಫೊರ್ಸಾಕ ಮಾಡಾವೈಲೆ ಪತ್ರೆ ಗಡ ಗಡ ಹಾಲ್ತಸಿಲೆ. ಖಿಡಕಿ ಬಾಗಲಂ ಧಾಡ-ಧಾಡ ಆಪ್ಟತಸ್ಸಿಂಲಿ. ತ್ಯಾ ಬಾಗಲಾಂಕ ಹುಕ್ಕ, ಚಿಲಕೊ ನಾಸಿಲೆ. ಮುಖ್ಯ ದರವಾಜಾಕ ಭಿತ್ತವೈಯ್ಲ್ಯಾಂನ ಖಿಳಿ ನಾಸಿಲಿ. ಇಲೆಕ್ಟ್ರಿಕ್ ಲಾಯ್ಟ ನಾ ಮ್ಹೋಣು ಮೇಣವಾತಿ ಲಾಯಿಲ್ಯೊ. ತ್ಯೊ ಭಿ ವಾರ್ಯಾನ ವಾಡ್ವಲ್ಯೊ. ವೈಲೆ ಪತ್ರೆ ಖಾಂಚಿಂತುಲ್ಯಾನ ಭಿತ್ತರಿ ಪಾವ್ಸಾ ಉದ್ದಾಕ ಟಪ ಟಪ ಗಳ್ತಸಿಲೆಂ. ಕಾಹಿಂ ಲೋಕ ರೇನ ಕೋಟ ಘಾಲ್ನು ನಿದಲಿಲೆ.

ಏಕೂಣ ಸಾಂಗ್ಚೆ ಜಾಲ್ಯಾರಿ ಸಾನ ಆಸ್ತನಾ ವಾಚ್ಚಿಲೆಂ ನರಸಿಂವಯ್ಯಾಲೆ ಪತ್ತೇದಾರಿ ಕಾದಂಬರಿತುಲ ಭಯಾನಕ ರಾತ್ರಿಚ ಪ್ರತ್ಯಕ್ಷ ಅನುಭವ ಜಾಲ್ಲೊ. ಆಮ್ಮಿ ಪೂರಾ ಲೋಕ ನಿದಲಿಲತಿಕಿ ಕೋಣಾಂಕ ನೀದ ಪಡಿಲ್ನಾಸಿಲಿ.

ಕರ್ಜತ ಸ್ಟೇಷನಾರಿ ಖಾಲಿಲ ಬಟಾಟವಡೆನ ಶರದ ರಾವಾಲ ಪೊಟ ಬಿಘಡಿಲೆಂ. ತೊ ನಂಬರ ಟೂ ಕ ವೊಚಕಾ ಮ್ಹಳಾಲೊ. ಭಾರ್ಯಿ ಕಾಳೋಕ ಅಂಧಕಾರ. ವಾರ್ಯಾನ ಛತ್ರಿ ಫುಲೋಚ್ಯಾಕ ಜಾಯ್ನಾ. ತಸ್ಸಿಂ ಮ್ಹೋಣು ತಾಗೆಲ ನಂಬರ ಟೂ ತಡ್ಸೂನು ಧೋರ್ಚ್ಯಾಕ ಜಾತ್ತವೆ? ತಡ್ಸೂನು ಧರ್ಲ್ಯಾರಿ ಪ್ರೆಶರ್ ಆನಿಕ ವಾಢತಾ ನಾವೆ ?

ಹಾಂವೆ ಆನಿ ಭಾಲೇರಾವ ತಾಗೆಲ ಸಾಂಗಾತಿ ಧೈರ್ಯಾಕ ಹಾತ್ತಾಂತು ಬೆಟ್ರಿ ಘೇವ್ನು ಗೆಲೆ. ಏಕ ಘರಾ ಮಾಕ್ಷಾನ ಆಸ್ಸಿಲ ಗೊಟ್ಯಾದಿಕಾನ ತೊ ವೊಚೂನು ಉಕ್ಕಣಿ ಬಸ್ಲೊ.

ವಾಡಿಂತುಲ ಸೂಣೆ ಆಮ್ಗೆಲ ದಿಕಾನ ಪೊಳೋನು ಭೊಂಕ್ತಸಿಲೆ. ಗೊಟ್ಯಾಂತುಲ ಗೊರ್ವಂ ಆಂಬೆ ಮ್ಹೋಣು ವದ್ಧರ್ತಸಿಲಿಂತಿ. ಏಕ ಪ್ರಕಾರಚೊ ಆರ್ತಸ್ವರ ತೊ. ಆಮ್ಮಿ ತೆ ದಿಕಾನ ಬೆಟ್ರಿ ಮಾರ್ಲಿ.

ಶರದರಾವ ತಾಗೆಲ ಕಾಮ ಕೋರ್ನು ಆಯ್ಲೊ. ಗೊರ್ವಂ ಕಿತ್ಯಾಕ ಹಂಬರತಾತಿ ಮ್ಹೋಣು ಪೊಳೊಚ್ಯಾಕ ಗೊಟ್ಯಾದಿಕಾನ ಗೆಲ್ಲೊ. ಆಮ್ಮಿ ತಾಕ್ಕಾ ಬೆಟ್ರಿ ದಾಕೈತ ತಾಗೆಲ ಮಾಕ್ಷಾನ ಗೆಲ್ಲೆ.

ತಿತ್ಲ ಭಿತ್ತರಿ ಗಾಂವ್ತುಲೆ ದಾರ್ಲೆ ಹಾತ್ತಾಂತು ಲೋಖಂಡಿ ರೋಡ, ಕೊಯ್ತಿ, ಕುರಾಡಿ ಘೇವ್ನು ಧಾವ್ನು ಆಯ್ಲೆ. ಬಾಯ್ಲಂ ಭಿ ಲಾಟನ್, ಬೆಟ್ರಿ ಘೇವ್ನು ದಾರ್ಲೆಂಲ ಮಾಕ್ಷಾನ ಧಾವ್ನು ಆಯ್ಲಿಂತಿ. ಆಮ್ಕಾಂ ಕಸ್ಸನ ಜಾಲ್ಯಾಂ ಮ್ಹಳಿಲೆಂ ಕಳಿಲ್ನಾ.

ತೆ ಲೋಕ ಗೊಟ್ಟೆಂತು ಘುಸಲೆ. ಆನಿ ಗೊಟ್ಟೆಂತುಲ್ಯಾನ ಬಿಬಟ್ಯಾನ ಠಣ್ಣನೆ ಭಾರ್ಯಿ ಉಡಿ ಮಾರ್ಲಿ. ಕಾಳ್ಕಾಂತು ಧಾವ್ನು ತೊ ಪಸಾರ ಜಾಲ್ಲೊ. ಬಿಬಟೊ ಮ್ಹಳ್ಯಾರಿ ಚಿಟ್ಟೆ ವಾಗು. ( Leopard )

ಸಗಳ್ಯಾಂತು ಮುಕಾರ ಆಸ್ಸಿಲೊ ಶರದರಾವ ಭೀವ್ನು ಕಂಗಾಲ ಜಾಲಿಲೊ. ತೋಲ ಚುಕ್ಕೂನು ಚಿಕ್ಲಾಂತು ಪಡಿಲೊ. ಆಮ್ಮಿ ತಾಕ್ಕಾ ಹಾತ್ತಾ ಧೋರ್ನು ಉಕ್ಕೋಳ್ನು ಘೇವ್ನು ಆಯ್ಲೆ. ತಾಕ್ಕಾ ಪೊಳೊಚ್ಯಾಕ ನಿದಲಿಲ ಸರ್ವ ಉಟ್ಟಾನ ಬಸಿಲೆ. ತಾಗೆಲ ಹಾಲ ಪೊಳೋನು ಖೊ...ಖೊ...ಖೋನೆ ಹಾಸಚ್ಯಾ ಲಾಗ್ಲೆ. ಒಟ್ಟಾಯೇರಿ ತೆ ದಿಸ ಆಮ್ಕಾಂ ಕೋಣಾಂಕ ನೀದ ಪಡಿಲ್ನಾ.

ಸಕ್ಕಾಣಿ ಗೊಟ್ಯಾಂತು ವೊಚ್ಚೂನು ಪಳೈಲ್ಯಾರಿ ಬಿಬಟ್ಯಾನ ಘಾಸ ಮಾರಿಲೆ ವಾಸ್ರುಂ ಮೋರ್ನು ಪಡಿಲೆಂ. ಪಂಚನಾಮ ಕೊರ್ಚ್ಯಾಕ ಆಯಿಲ ವನಖಾತ್ಯಾಚೆ ಅಧಿಕಾರಿನ, ಬಿಬಟ್ಯಾಲ ಫೂಟ್ ಪ್ರಿಂಟ್ಸ್ ಪಳೈತ ತೊ ಖಂಚೆ ದಿಕಾಚ್ಯಾನ ಆಯಿಲೊ ಮ್ಹೋಣು ಶೋಧ ಘೆತ್ತನಾ, ಗೊಟ್ಯಾ ಮಾಕ್ಷಿ ಫೂಟ್ ಪ್ರಿಂಟ್ಸ್ ಬಗಲೇನ ಶರದರಾವಾನ ನಂಬರ ಟೂಕ ವಾಫರಿಲ ಉದಕಾ ಬಾಟ್ಲಿ ಪೋಣು ಆಸ್ಸಿಲಿ.

ತೆ ಅಧಿಕಾರಿನ ತೆ ಬಾಟ್ಲೇಚಿ ಭಿ ಚವಕಶಿ ಕೆಲ್ಲಿ. ಆನಿ ಆಮ್ಕಾಂ ಟ್ರೇಕರ್ಸಾಂಕ ಪೊಳೋನು ಮ್ಹಳಾಲೊ," ಅಸ್ಸಿಂ ರಾತ್ರಿಚೆಂ ರಾತ್ರಿಚೆ ಭಾರ್ಯಿ ಯೇವ್ನಾಕ್ಕಾತಿ. ಹಾಂಗಾಚೆ ಅಭಯಾರಣ್ಯಾಂತು ಆಮ್ಗೆಲ ರೆಕೋರ್ಡಾ ಪ್ರಕಾರ ಸಾತ ಬಿಬಟೆ ಆಸ್ಸತಿ. ತೆ ರಾತ್ರಿಚೆ ಶಿಕಾರಿಕ ಭಾರ್ಯಿ ಭೊಂವತಾತಿ."

ಹ್ಯಾ ಘಟನೆ ನಂತರ ಶರದರಾವ ಆಮ್ಗೆಲ ಸಾಂಗಾತಿ ಖಯಿಂ ಟ್ರೇಕಿಂಗಾಕ ಆಯಿಲನಾ. ತ್ಯಾ ಪಾವ್ಶಿ ರಾತ್ರಿ ಬಿಬಟ್ಯಾನ ಮಾರಿಲಿ ಉಡಿ ತೊ ಅಜೂನು ವಿಸರಿಲನಾ.

******* # *******