ಅನ್ಯಾಯಾಕ ಪರಾಜಯ ನಾ

ರಿಟಾಯರ ಜಾವ್ನು ಘರ ಬಸಿಲ ತೆನ್ನಾ ಆಯುಷ್ಯಾಂತು ಫಾಟ್ಟಿ ಘಡೀಲ ಘಟನಾ ನಾಕ್ಕ ಮ್ಹಳೆತಿಕಿ ಉಗಡಾಸಾ ಯೆತ್ತಾತಿ. ದೊಳೆ ಧಾಂಪ್ಲೆತಿಕಿ ಟಿ.ವಿ ರಿ ಸೀರಿಯಲ್ಲ್ ಪಳೈಲ್ಯಾವರಿ ಸ್ಮ್ರತಿ ಪಟಲಾಚೇರಿ ಸ್ಪಷ್ಟ ದಿಸ್ತಾತಿ. ಅವಾಜ ಕರ್ನಾಸಿ ಸಂವಾದ ಕರ್ತಾತಿ.ಕಾಹಿಂ ಘಟನಾ ಮನಾಂಕ ದು:ಖಿ ಕರ್ತಾತಿ. ಕಾಹಿಂ ಘಟನಾ ಮನಾಕ ಖುಷ್ ಕರ್ತಾತಿ.

ಹಾಂವು ಸಕ್ಕಾಣಿ ಏಕ ಕಪ್ ಚಾ ಪೀವ್ನು ಬಾಲ್ಕನಿಂತು ಆರಾಮ ಖುರ್ಚೇರಿ ಪೇಪರ ವಾಚ್ಚಿತ ಬಸಿಲೊಂ. ಮದ್ಲೆ ಪಾನಾರಿ ಸಾನ ಸಿ ಏಕ ಬಾತ್ಮಿ ವಾಚಲಿ. "ದಾದರ ರೇಲ್ವೇ ಸ್ಟೇಷನಾರಿ ಪಿಕ್ ಪೊಕೆಟಿಂಗ ಕರ್ತಲ ಏಕಳ್ಯಾಕ ಧರ್ಲೊ. ಲೋಕಾಂನಿ ತಾಕ್ಕಾ ಮಾರ-ಮಾರ ಮಾರ್ಲೆ. ಅರ್ಧ ಜೀವ ಕೋರ್ನು ಪೊಲೀಸಾಂಲ ಹಾತ್ತಾಂತು ದಿಲ್ಲೆಂ."

ತ್ಯಾ ಬಾತ್ಮಿನ ಮೆಗೆಲಿ ಮನ:ಸ್ಥಿತಿ ಬದಲ್ಲಿ. ತೊ ಪೇಪರ ಮುಕಾರ ವಾಚೂಚ್ಯಾಕ ಜಾಲಿಲನಾ. ಕಾರಣ ತೀಸೇಕ ವರ್ಷಾ ಫಾಟ್ಟಿ ಅಸ್ಸಲೊ ಏಕ ಪ್ರಸಂಗ ದಾದರ ಸ್ಟೇಷನಾರಿ ಘಡಿಲೊ ಮೆಗೆಲ ಉಗಡಾಸಾಂತು ಆಯ್ಲೊ.

ಮುಂಬಯಿಂತು ಸಾಂತಾಕ್ರೂಜಾಂತು ಏಕ ಕಂಪನಿಂತು ಹಾಂವು ಕಾಮಾ ಆಸ್ಸಿಲೊಂ. ತ್ಯಾಚ ಕಂಪನಿಂತು ಹೆಲ್ಪರ ಮ್ಹೋಣು ವರ್ಲಿ ಕೋಳಿವಾಡಾಸಾವ್ನು ಏಕ್ಳೊ ಕಾಮಾ ಯೆತ್ತಸಿಲೊ. ಆಂಗಾನ ಕುಸ್ತಿ ಪೈಲವಾನಸೊ ಆಸಿಲೊ. ಚಾರ ಲೋಕಾನಿ ಕೋರ್ಚೆ ಕಾಮ ತೊ ಏಕ್ಳೊ ಕರ್ತಸಿಲೊ. ಕೋಣಾಂಕ ಮದತ ಕೋರ್ಚಿ ಮ್ಹಳ್ಯಾರಿ ತಾಕ್ಕಾ ಖುಷೀಚಿ. ಆಪ್ಪೋಚೆ ಪೈಲೆಂ ತೊ ಜಾವ್ನು ಧಾವ್ನು ವತ್ತಸಿಲೊ.

ವರ್ಲಿಸಾವ್ನು ದಾದರ ಪರ್ಯಂತ ಬಸ್ಸಾರಿ, ದಾದರಚ್ಯಾನ ಸಾಂತಾಕ್ರೂಜ್ ಟ್ರೇನಾರಿ ಆನಿ ಸಾಂತಾಕ್ರೂಜಚ್ಯಾನ ಕಂಪನಿ ಪರ್ಯಂತ ಕಂಪನಿ ಬಸ್ಸಾರಿ ತಾಣೆ ಯೆವ್ಚೆಂ-ವೊಚ್ಚೆಂ ಆಸ್ಸಿಲೆಂ.

ಟ್ರೇನಾರಿ ಜಾಗೊ ಆಸ್ಸಿಲತಿಕಿ ತೊ ಕೆನ್ನಾ ಸೀಟಾರಿ ಬಸ್ನಾಸಿಲೊ. ತೊಂಡಾಂತು ಏಕ ಸೌ ಬೀಸ ತಂಬಾಕು ಘಾಲಿಲ ಕಲ್ಕತ್ತಾ ಪಾನ ಜಗ್ದೀತ ಪೀಕ ಥೂ...ಕೊರ್ಚ್ಯಾಕ ಸುಲಭ ಜಾತ್ತಾ ಮ್ಹೋಣು ದರವಾಜಾಂತು ರಾಬೂನು ಉರ್ತಸಿಲೊ. ಹೀ ಸಂವಯ ತಾಗೆಲಿ ಕಾಯಮ್ ಚೀಚಿ.

ತೆ ದಿಸ ಆಮ್ಕಾಂ 2nd shift duty ವೊಚ್ಕಾಶಿಲೆಂ. ತಾಣೆ ದನ್ಪಾಂರಾ ಏಕ ಘಂಟೆ ಸುಮಾರ ದಾದರಾಂತು ಟ್ರೇನ ಧರಿಲೆಂ. ದಾದರ ಸ್ಟೇಷನಾರಿ ಖಂಚೆ ಟಾಯ್ಮಾರಿ ಗೆಲ್ಲೆತಿಕಿ ಗಡ್ದಿ ಊರ್ನು ಉರ್ತಾ. ಗಡ್ದಿ ಆಸ್ಸಿಲಕಡೇನ ಪಿಕ್ ಪೊಕೆಟರ್ಸ ಉರ್ತಾತಿ. ತಾನ್ನಿ ಟ್ರೇನಾರಿ ಚಡ್ತಲ್ಯಾಂಲೆ ಕಿಂವಾ ದೆಂವ್ತಲ್ಯಾಂಲೆ ಪಾಕೀಟ ಮಾರ್ಚೆಂ ಜಾಸ್ತಿ. ದಾದರಚ್ಯಾನ ಸೊಡಿಲ ಟ್ರೇನಾರಿ ಪಿಕ್ ಪೊಕೆಟರ್ಸ ಚಡಿಲೆ. ಮಾಹಿಮ ಸ್ಟೇಷನಾರಿ ಕೋಣಾಲಕಿ ದೆಂವ್ತಲ್ಯಾಂಲೆ ಪಾಕೀಟ ತಾನ್ನಿ ಮಾರ್ಲೆ. ಜಾಲ್ಯಾರ ದರವಾಜ್ಯಾಂತು ರಾಬ್ಬಿಲ ಆಮ್ಗೆಲ ಕಂಪನಿ ಹೆಲ್ಪರಾನ ದರವಾಜ್ಯಾಂತು ರಾಬ್ಬಿಲ ಆಮ್ಗೆಲ ಕಂಪನಿ ಹೆಲ್ಪರಾನ ತ್ಯಾ ಚೋರಾಕ ಧರ್ಲೆಂ. ಮಾರ-ಮಾರ ಮಾರ್ಲೆಂ. ಹಾಣೆ ಮಾರಿಲ ಪೊಳೊನು ಪಬ್ಲಿಕಾನ ಬಿ ತ್ಯಾ ಚೋರಾಕ ಬಡೈಲೆಂ. ಅರ್ಧ ಜೀವ ಕೋರ್ನು ಪೊಲೀಸಾಂಲ ಹಾತ್ತಾಂತು ದಿಲ್ಲೆಂ.

ಪಿಕ್ ಪೊಕೆಟರ್ಸಾಂಲೆ ಗೆಂಗ ಉರ್ತಾ. ಆನಿ ಠರಾವಿಕ ಏರಿಯಾಂತು ತೆ ಕಾಮ ಕರ್ತಾತಿ. ತಾಜ್ಜೆ ಭಾರ್ಯಿ ವತ್ನಾಂತಿ. ದಾದರ ಸ್ಟೇಷನಾರಿ ಪಾಕೀಟ ಮಾರ್ತಲೆ ಬಾಂದ್ರಾ ಸ್ಟೇಷನ್ ಪರ್ಯಂತ ವತ್ತಾತಿ. ತಾಜ್ಜೆ ಮುಕಾರ ವತ್ನಾಂತಿ. ಪಣ ತೆ ದಿಸ ತೆ ಗೆಂಗಾಂತುಲೆ, ಹ್ಯಾ ಹೆಲ್ಪರಾಲ ಪಾಠಲಾಗ ಕರತ ಸಾಂತಾಕ್ರೂಜ್ ಆಯ್ಲೆ. ತಾಣೆ ಕಂಪನಿ ಬಸ್ಸ ಧರಿಲೆಂ ತಾನ್ನಿ ಪಳೈಲೆಂ. ಸೆಕೆಂಡ ಶಿಫ್ಟಾ ಗೆಲಿಲೆ ಹೆ , ಕೆನ್ನಾ ರಾತ್ರಿ ಕಿತ್ಲ ಘಂಟೆರಿ, ಪರತ ಯೆತ್ತಾತಿ ಮ್ಹೋಣು ಚವಕಶಿ ಕೆಲ್ಲಿ.

ತಾನ್ನಿ ಪಾಠಲಾಗ ಕೆಲ್ಲಿಲಿ, ಚವಕಶಿ ಕೆಲ್ಲಿಲಿ, ತ್ಯಾಗ ಹೆಲ್ಪರಾಕ ಕಳಿಲ್ನಾ. ತೆ ದಿಸ ಡ್ಯೂಟಿರಿ ಆಯಿಲೋಚಿ, ಪಿಕ್ ಪೊಕೆಟರಾಕ ಕಸ್ಸಿಂ ಧರ್ಲೆಂ, ಕಸ್ಸಿಂ ಬಡೈಲೆಂ ಹೇಂಚಿ ವರ್ಕಶೋಪಾಂತು ಸಗಳ್ಯಾಂಕ ಸಾಂಗತ ಫಿರ್ಲೊ. ಹೋಡ ಕಸ್ಸನ ಕೀ...ಕಾಮ ಕೆಲಿಲ ಭಾವನೇನ, ಸ್ಟಂಟ ಪಿಕ್ಚರಾ ಹೀರೋ ಸೊ ಖುಷೀರಿ ಆಸ್ಸಿಲೊ.

ಆಠ ತಾಸಾ ಡ್ಯೂಟಿ ಕೋರ್ನು ರಾತ್ರಿ 10:20 p.m ಆಮ್ಮಿ ಕಂಪನಿ ಬಸ್ಸಾಂತುಲ್ಯಾನ ಸಾಂತಾಕ್ರೂಜ್ ಸ್ಟೇಷನಾಲಾಗ್ಗಿ ದೆಂವ್ಲೆ. ಹಾಂವು ತೆನ್ನಾ ಗೋರೆಗಾಂವ ರಾಬ್ತಸಿಲೊಂ. ತೆ ದಿಕೂನು ಮೆಗೆಲಿ ವಾಟ ವೇಗಳಿ ಜಾಲ್ಲಿ. ತೊ ಹೆಲ್ಪರ ದಾದರ ದಿಕಾನ ಗೆಲ್ಲೊ. ಟ್ರೇನಾರಿ ತಾಣೆ ಚಡೀಲ ಕಂಪಾರ್ಟಮೆಂಟಾಂತು ಆಮ್ಗೆಲ ಕಂಪನಿಂತುಲೆ ಆನಿ 7-8 ಲೋಕ ಚಡಿಲೆ. ತಾಂಕಾ ಬೊಶ್ಯಾಕ ಜಾಗೊ ಮೆಳ್ಳೊ ಮ್ಹೋಣು ತೆ ಭಿತ್ತರಿ ಗೆಲ್ಲೆ. ಹೊ ಹೀರೋ ಸಂವಯಿ ಪ್ರಮಾಣೆ ದರವಾಜ್ಯಾಂತು ರಾಬ್ಬೂನು ಆಸಿಲೊ.

ಪಿಕ್ ಪೊಕೆಟರ್ಸಾಂಲೆ ಗೆಂಗ ಸಾಂತಾಕ್ರೂಜ್ ಯೇವ್ನು ರಾಬ್ಬಿಲೆಂ. ಹೆಲ್ಪರಾಲೆ ಫಾಟ್ಲ್ಯಾಂನ ಟ್ರೇನಾರಿ ಚಡಿಲೆ. ತಾನ್ನಿ ಹಾಗೆಲ ಫಾಟ್ಟಿಲಾಗಿಲೆ ಹಾಕ್ಕಾ ಕಳಿಲೆ ನಾ. ತೆ ದಿಕೂನು ಮ್ಹೋಣಚೆಂ, "ಆಮ್ಮಿ ಪ್ರಾಮಾಣಿಕ ಜಾವ್ನು ಉರಲ್ಯಾರಿ ಉಪಯೋಗ ನಾ. ಜಗಾಚ ಪೊಕ್ರಿಪಣಾಚೆ ಸಮಜ ಆಮ್ಕಾಂ ಊರ್ಕಾ."

ಮಾಹಿಮ ಸ್ಟೇಷನ ಯೇವಪರ್ಯಂತ ಕಸ್ಸನೆ ಘಡಿಲ್ನಾ. ಮಾಹಿಮ ಸ್ಟೇಷನಾರಿ ಟ್ರೇನ ರಾಬ್ಲೆಂ. ದೆಂವ್ತಲೆ ದೆಂವ್ಲೆ. ಚಡ್ತಲೆ ಚಳ್ಳೆ. ಟ್ರೇನ ಸ್ಟಾರ್ಟ ಜಾಲ್ಲೆಂ. ತ್ಯಾ ಪಿಕ್ ಪೊಕೆಟರ್ಸಾಂನಿ ಹ್ಯಾ ಹೆಲ್ಪರಾಕ ಕಂಪಾರ್ಟಮೆಂಟಾಂತುಲ್ಯಾನ ಭಾರ್ಯಿ ಧುಂಗುಳೆಂ. ಆನಿ ತೆ ಬಿ ಧಾಂವ್ಚೆ ಟ್ರೇನಾಂತುಲ್ಯಾಂನ ಸಕ್ಕಲ ದೆಂವ್ಲೆ.

ತ್ಯಾಚ ಕಂಪಾರ್ಟಮೆಂಟಾಂತು ಆಮ್ಗೆಲ ಕಂಪನಿಂತುಲೆ ಬಸೂನ ಆಸ್ಸಿಲೆ ಲೋಕಾನ ಪಳೈಲೆತಿಕಿ, ಧಾಂವ್ಚೆ ಟ್ರೇನಾಂತುಲ್ಯಾಂನ ಸಕ್ಕಲ ಧೈರ್ಯ ಕೊಣೇ ಕೆಲಿಲ್ನಾ. ಕಾರಣ ಬಸಿಲಕಡಚ್ಯಾನ ಉಟ್ಟಾನ ದರವಾಜ್ಯಾಲಾಗ್ಗಿ ಯೇವಥಾಯಿಂ ಟ್ರೇನಾ ಸ್ಪೀಡ ವಾಢಿಲೆಂ. ಮುಕ್ಕಾವೈಲೆ ಮಾಟುಂಗಾ ಸ್ಟೇಷನಾರಿ ದೆಂವ್ನು ತೆ ಪರತ ಮಾಹಿಮ ಸ್ಟೇಷನಾರಿ ಆಯ್ಲೆ. ತೊ ಪರ್ಯಂತ ಖೇಳ ಖಲಾಸ್ ಜಾಲಿಲೊ. ಜಖಮಿ ಜಠಾಯುವರಿ, ದೋನ ನಂಬರ ಪ್ಲೆಟಫೋರ್ಮಾರಿ ಹೆಲ್ಪರ ಪೋಣು ಆಸ್ಸಿಲೊ. ರಕ್ತ ಬಂಬಾಳ ಜಾಲ್ಲಿಲ ತಾಗೆಲ ಆಂಗಾರಿ ಮೂಸ ಬಸಿಲೆ. ತೊ ಮೆಲ್ಲಾ ಕೀ ಜೀವಂತ ಆಸ್ಸಾ ಮ್ಹೋಣು ಪೊಳೊಚ್ಯಾಕ ಥಯಿಂ ಇತ್ಲ ಲೋಕ ಜಮಿಲೆ.

ಪಿಕ್ ಪೊಕೆಟರ್ಸಾಂನಿ ದನ್ಪಾರಾಂ ತ್ಯಾಚ ಸ್ಟೇಷನಾರಿ ಘಡೀಲ ಘಟನೇಚೆ ಸೂಡ ಘೆತ್ಲೊ. ಹೆಲ್ಪರಾಕ ಮಾರ-ಮಾರ ಮಾರ್ಲೆಂ. ತಾಗೆಲ ಜೀವು ಘೆತ್ಲೊ. ರಗತ ಓಂಕ್ಲೆತಿಕೀ ತಾಕ್ಕಾ ಸೊಡಿಲ್ನಾ. ತಾಗೆಲ ಗಳ್ಯಾಕ ಭಾಂಗರಾ ಚೈನ ಆಸ್ಸಿಲೆಂ. ಹಾತ್ತಾ ಬೊಟ್ಟಾಕ ಮುದ್ದಿ ಆಸ್ಸಿಲಿ. ತೆ ಸರ್ವ ತಾನ್ನಿ ಕಾಣ ಘೆತ್ಲೆಂ. ಖಿಶ್ಯಾಂತುಲ ಪಾಕೀಟ ಕಾಣು ತಾಂತುಲ ಫಕ್ತ ಪೈಸೆ ಕಾಣು ಘೆತ್ಲೆ. ಪಾಕೀಟ ಟ್ರೇಕಾರಿ ಉಡೋನು ತೆ ಫರಾರ ಜಾಲ್ಲಿಲೆ.

ಪೊಲೀಸ್ ಕೇಸ ಜಾವ್ನು ತಾಕ್ಕಾ ಆಸ್ಪತ್ರೇಂತು ವ್ಹರ್ತನಾ ದೋನ ಘಂಟೆ ರಾತ್ರಿ ಜಾಲಿಲಿ. ಡಾಕ್ಟರಾನ ತೊ ಮೆಲ್ಲಾ ಮ್ಹೋಣು ಡಿಕ್ಲೇರ್ ಕೆಲ್ಲೆಂ. "ವಾಟ್ಟೇರಿ ವತ್ತಲ ವಾಗಾ ಮಾಕ್ಕ ಯೇವ್ನು ಖಾಗಾ" ಮ್ಹಳಿಲ್ಯಾವರಿ ತ್ಯಾ ಹೆಲ್ಪರಾಲ ಅಂತ್ಯ ಜಾಲಿಲೊ.

ಆಜ ತ್ಯಾ ಹೆಲ್ಪರಾಲ ನಾಂವ ಮಾಕ್ಕಾ ಯಾದ ಜಾಯ್ನಾ. ಪರಂತು ತಾಗೆಲ ವ್ಯಕ್ತಿತ್ವ ಹಾಂವು ವಿಸರಿಲ್ನಾ. ಸಕ್ಕಾಣಿ ಪೇಪರ ವಾಚ್ಚಿತನಾ ತೊ ಪರತ ಮೆಗೆಲ ದೊಳೆ ಮುಕಾರ ಆಯ್ಲೊ. ತಾಣೆ, "ಹ್ಯಾ ಕಲಿಯುಗಾಂತು ಅನ್ಯಾಯಾಕ ಪರಾಜಯ ನಾ" ಅಸ್ಸಿಂ ಮ್ಹಳಿಲ್ಯಾವರಿ ಮಾಕ್ಕಾ ಭಾಸ ಜಾಲ್ಲಿ.

÷÷÷÷÷÷÷÷÷•••••÷÷÷÷÷÷÷