ಕಿಂಗ್ ಕೊಂಗ ದಾರಾಸಿಂಗಾಲಿ ಕುಸ್ತಿ

ಆಯುಷ್ಯಾಂತು ಘಟನಾ ಅನೇಕ ಘಡತಾತಿ. ಸರ್ವ ಉಗಡಾಸಾಂತು ಊರ್ನಾಂತಿ. ಪಣ ಏಕೇಕ ಪಂತಾ ಘಟನೆಂಕ ಸಂಬಂಧ ಆಸ್ಸಿಲ ವ್ಯಕ್ತಿ ನಿಮಿತ್ತ ವಿಸ್ಮರಣೆಂತು ಗೆಲ್ಲಿಲೆಂ ಪರತ ಸ್ಮರಣೆಂತು ಯೆತ್ತಾತಿ.

( 12-7-2012 ) ದಿಸ ಸಕ್ಕಾಣಿ ಕುಸ್ತಿ ಪಟು "ರುಸ್ತುಂ ಏ ಹಿಂದ" ದಾರಾಸಿಂಗಾಲ ನಿಧನ ವಾರ್ತಾ ಆಯ್ಕೂನು ಮನ ಸುನ್ನ ಜಾಲೆಂ. ತ್ಯಾ ದು:ಖಾಂತು ಸಾಡೆ ಸಹಾ ಫೂಟ್ ಉಂಚ, ಬಲದಂಡ ಪಂಜಾಬಿ ಪೈಲ್ವಾನ ದಾರಾಸಿಂಗಾಲ ವ್ಯಕ್ತಿಮತ್ವ ಉಗಡಾಸ ಕರ್ತನಾ, ಇ.ಸ 1967 ತು ಘಡಿಲಿ ಘಟನಾ ಲಕ್ಷಾಂತು ಆಯ್ಲಿ.

ಮೆಗೆಲ ಶಿಕ್ಷಣ ಪೂರ್ಣ ಜಾಲಿಲೆ. ನೌಕರಿಕ ಲಾಯ್ತಾಂ ಮ್ಹೋಣು ಮಾಮಾನ ಮಾಕ್ಕಾ ಮುಂಬಯಿ ಆಪ್ಪೋನು ಹಾಡಿಲೆಂ. ತ್ಯಾ ನಿಮಿತ್ತ ದಾದರ ಪ್ರಭಾದೇವಿ ಇಂಡಸ್ಟ್ರಿಯಲ್ ಏರಿಯಾಂತು ಏಕಳ್ಯಾಕ ಮೆಳಚ್ಯಾಕ ಆಮ್ಮಿ ಗೆಲಿಲೆ. ಥಯಿಂ ಕಿಂಗ ಕೊಂಗ, ದಾರಾಸಿಂಗಾಲಿ ಕುಸ್ತಿಚೆ ಪ್ರಚಾರಾಕ ಲಾಯಿಲೆ ಹೋಡ ಪೊಸ್ಟರ ನಜರೇಂತು ಪಳ್ಳೆಂ.

ತೇಚಿ ದಿಸ ವರ್ಲಿ ಸರದಾರ ವಲ್ಲಭಭಾಯಿ ಪಟೇಲ್ ಸ್ಟೇಡಿಯಮಾಂತು ಸಾಂಜೇಚೆಂ 6 p.m ಕುಸ್ತಿ ಆಸ್ಸಿಲಿ. ತೀ ಕುಸ್ತಿ ಆಮ್ಮಿ ಪೊಳೋನು ಆಯ್ಲೆ.

ಆಮ್ಮಿ ಸಗಳ್ಯಾಂತು ಕಮ್ಮಿ ಕಿಮ್ಮತಿಚೆಂ ತಿಕೀಟ ಘೆತ್ತಿಲೆಂ. ಕಾರಣ ಆಮ್ಗೆಲ ಖಿಶ್ಯಾಂತು ಜಾಸ್ತಿ ಪೈಸೆ ನಾಸಿಲೆ. ಸ್ಟೇಡಿಯಮ ಖಚಾಖಚ ಭರಿಲೆಂ. ಆಮ್ಮಿ ಬಸಿಲಕಡೆನ ಜಾಸ್ತಿನ ಜಾಸ್ತಿ ಕಾಮಗಾರ ವಸ್ತಿಂತುಲೆ ಲೋಕ ಆಸ್ಸಿಲೆ. ತೆ ಏಕೇಕ ಗ್ರೂಪ್ ಕೋರ್ನು ಆಯಿಲೆ. ಉದಾಹರಣೆಕ ಭೆಂಡಿ ಬಜಾರಚೊ ಗ್ರೂಪ್, ಡೊಕ್ಯಾರ್ಡಚೊ ಗ್ರೂಪ್, ಲಾಲಬಾಗ ಮಿಲ್ಲ್ ವರ್ಕರ್ಸಾಂಲೊ ಗ್ರೂಪ್, ವರ್ಲಿಚೆ ಕೋಳಿ ಬಾಂಧವಾಲ ಗ್ರೂಪ್, ದಾದರ ಫೂಲ ಮಾರ್ಕೆಟವಾಲ್ಯಾಂಲ ಗ್ರೂಪ್... ಇತ್ಯಾದಿ.

ಪಯ್ಲೆ ಏಕ ತಾಸ ಸಾನ್ನ ಸಾನ್ನ ಪೈಲವಾನಾಲ ಕುಸ್ತಿ ಜಾಲ್ಯೊ. ಬರೋಬರ ಸಾಂಜೆ ಸಾತ ಘಂಟೆರಿ, ಕಿಂಗ ಕೊಂಗ ಆನಿ ದಾರಾಸಿಂಗ ಮೈದಾನಾಂತು ಆಯ್ಲೆ. ಸ್ಟೇಡಿಯಮಾಂತು ಬಸಿಲ ಪ್ರೇಕ್ಷಕಾಂನಿ ಉಟ್ಟಾನು ರಾಬೂನು ತಾಂಗೆಲ ಸ್ವಾಗತ ಚಪ್ಪಾಳೆ ಮಾರ್ನು ಕೆಲ್ಲೆಂ.

ತ್ಯಾ ವೇಳಾರಿ ದಾರಾಸಿಂಗಾಕ 39 ವರ್ಷ ಪ್ರಾಯ. "ವಿಶ್ವ ಕುಸ್ತಿ ಚಾಂಪಿಯನ್" ಮ್ಹೋಣು ತಾಣೆ ನಾಂವ ಕಮೈಲೆಂ. ತಾಕ್ಕಾ ಹಾರೈತಾಂ ಮ್ಹೋಣು ಭಯಂಕರ, ಭಯಾನಕ ದೇಹಾಚೆ ನಾಮಾಂಕಿತ ಪೈಲವಾನ ಕಿಂಗ ಕೊಂಗಾನ ಆವ್ಹಾನ ಕೆಲಿಲೆಂ. ಜಂಗಿ ಕುಸ್ತಿ ಜಾವ್ಚಿ ಆಸ್ಸಿಲಿ.

ಕುಸ್ತಿ ಸುರು ಜಾಲ್ಲಿ. ಕೋಣ ಹಾರತಾ, ಕೋಣ ವಿಜಯಿ ಜಾತ್ತಾ ಸಾಂಗ್ಚೆ ಬಹು ಕಷ್ಟ ಜಾಲಿಲೆ. ಪ್ರೇಕ್ಷಕಾಂಲೆ ಪೈಕಿ ಕಾಹಿಂ ದಾರಾಸಿಂಗಾಲ ನಾಂವಾನ ಜಯ ಜಯಕಾರ ಕರ್ತಸಿಲೆ. ಕಾಹಿಂ ಕಿಂಗ ಕೊಂಗಾಲ ತರ್ಫೆನ ಜಯ ಜಯಕಾರ ಕರ್ತಸಿಲೆ. ಮೈದಾನಾಂತು ತ್ಯಾ ಪೈಲವಾನಾನಿ ಮಾರ್ನು ಘೆತ್ತನಾ, ಸ್ಟೇಡಿಯಮಾಂತು ಆಮ್ಮಿ ಬ‌ಸಿಲಕಡೆನ ದೋನ ಪಾರ್ಟಿಚೆ, ಆಪ್ಸಾಂತು ಮಾರ್ನು ಘೆವಚ್ಯಾ ಲಾಗಲೆ. ಸೋವ್ನು ಘೆವಚ್ಯಾ ಲಾಗಲೆ.

ತೆ ಪೈಲವಾನ ಸ್ಫರ್ಧಾ ಮ್ಹೋಣು ಕುಸ್ತಿ ಖೆಳ್ತಸಿಲೆ. ತಾಂಗೆಲ ಪೈಕಿ ಕೋಣೆ ಜಿಂಕ್ಲೆತಿಕಿ, ಕೋಣೆ ಹಾರ್ಲೆತಿಕಿ,ತಾಂಕಾ ದೊಗ್ಗಾಂಕ ಪೈಸೆ ಮೆಳ್ತಸಿಲೆ. ಆನಿ ಹೆ ಸ್ಟೇಡಿಯಮಾಂತುಲೆ ಮೂರ್ಖ, ಪೈಸೆ ಖರ್ಚೂನು ಕುಸ್ತಿ ಪೊಳೊಚ್ಯಾಕ ಆಯಿಲೆ,ಆರಾಮ ಬಸೂನು ಕುಸ್ತಿ ಪೊಳೊಚೆ ಸೋಣು, ಹೊ ಹಾರತಾ, ತೊ ಜಿಂಕತಾ ಮ್ಹೋಣು ಸೋವ್ನು ಘೆತ್ತಸಿಲೆ. ಮಾರ್ನು ಘೆತ್ತಸಿಲೆ. ತಾಂಗೆಲ ಪೈಕಿ ಕಾಹಿಂ ಲೋಕ ದಾರು ಪೀವ್ನು ಆಯಿಲೆ. ತಾಂಗೆಲ ಬೊಡ ಥಿಕಾಣೆರಿ ನಾಸಿಲೆಂ. ಹೊಡ್ಡೊಡ್ಡಾನ ಒದ್ಧೋರ್ನು, ಗೌಜಿ ಗಲಾಟೊ ಕೋರ್ನು, ವಾತಾವರಣ ಕಲುಷಿತ ಕೋರ್ನು ತಾಂತೂಂಚಿ ಆನಂದ ಉಪಭೊಗ್ತಾಲೆ.

ಅಖೇರಿಕ ದಾರಾಸಿಂಗಾನ ತಾಗೆಲ್ಯಾಕಿಂತಾ ಡಬಲ್ಲ್ ವಜನಾಚೆ ಕಿಂಗ ಕೊಂಗಾಕ ಉಕ್ಕೋಳ್ನು ಗಿರಿಗಿರಿ ಘುಂವ್ಡಾಂವ್ನು ನೆಲಾರಿ ಆಪ್ಟೈಲೆಂ. ಆನಿ ವಿಜಯಿ ಮುದ್ರೆನ, ತಾಗೆಲ ಹರ್ಧೆರಿ ಚೋಣು ಬಸ್ಲೊ. ರೆಫರೀನ ದಾರಾಸಿಂಗ ವಿಜಯಿ ಜಾಲ್ಲೊ ಮ್ಹೋಣು ಘೋಷಿತ ಕೆಲ್ಲೆಂ.

ಮೈದಾನಾಂತುಲಿ ಕುಸ್ತಿ ಬಂದ ಜಾಲಿಲಿ. ಜಾಲ್ಯಾರಿ ಸ್ಟೇಡಿಯಮಾಂತುಲಿ ಆಮ್ಮಿ ಬಸಿಲ ಕಡ್ಚಿ ಕುಸ್ತಿ ( ಮಾರಾಮಾರಿ ) ಕಂಟ್ರೋಲಾ ಭಾರ್ಯಿ ಗೆಲಿಲಿ. ಕಿತ್ಲಕೀ ಲೋಕ ಜಖಮಿ ಜಾಲ್ಲಿಲೆ. ಫಟಾಫಟ್ ಭಾರ್ಯಿ ಪೊಡಚ್ಯಾಕ ವಾಟ ಸಮ ನಾಸಿ, ಸಂಬಂಧ ನಾಸಿಲ್ಯಾಂಕಯಿ ಮಾರ ಖಾವ್ಚೆ ಪಳ್ಳೆ.

ಹಾಂವೆ ಭೀವ್ನು ಮಾಮಾಲ ಹಾತು ಘಟ್ಟಿ ಧರಿಲೊ. ತರಿ ಪಣ ಧಕ್ಕಾ-ಬುಕ್ಕಿಂತು ದೋನಚಾರ ಕಡೆನ ಮುಕ್ಕಾ ಮಾರ ಬಸಿಲೊ. ಕೋಣ್ಕಿ ಕೋಣಾಂಕೀ ಬಿಸೂನು ಮಾರಿಲೆಂ ಹವಾಯಿ ಚಪ್ಪಲ ರಪ್ಪನೆ ಮಾಕ್ಕಾ ಯೇವ್ನು ಲಾಗ್ಲೆಂ.

ದಾರಾಸಿಂಗಾಲಿ ಕುಸ್ತಿ ಪೊಳೊಚ್ಯಾಕ ವೊಚೂನು, ಚಪ್ಪಲಾ ಮಾರ ಖಾವ್ನು, ರಾತ್ರಿ ಬಾರಾ ಘಂಟೆ ಸುಮಾರ ಗೋರೆಗಾಂವ ಮೌಶಿಲ ಘರ ಪಾವ್ಲೊಂ. ತಾಜ್ಜೆ ನಂತರ ಆನಿ ಕೆನ್ನಾ ಕುಸ್ತಿ ಪೊಳೊಚ್ಯಾಕ ಗೆಲಿಲನಾ. ತಸ್ಸಲ ಚಪ್ಪಲಾ ಮಾರ ಖಾಲಿಲನಾ.