ನನ್ನ ಕವಿತೆ

ನನ್ನೆದೆಯ ಭಾವಗಳೇ ನಾ ಬರೆವ ಕವಿತೆ

ತನ್ನದಲ್ಲದ ಕಥೆಗೆ ಅನುಭವದ ಕೊರತೆ

ಕವಿತೆ ಎಂದರೆ ಪದವ ಕಟ್ಟುವುದೇ ಅಲ್ಲ

ಕವಿತೆ ಎಂದರೆ ಜನರ ಮುಟ್ಟುವುದೇ ಅಲ್ಲ

ಕವಿತೆ ಎಂದರೆ ಜಗವ ತಿದ್ದುವುದೇ ಅಲ್ಲ

ವರ್ತಮಾನಕೆ ಪದದ ಮದ್ದರೆವುದಲ್ಲ

ಕವಿತೆ ಎಂದರೆ ನನ್ನ ಭಾವಗಳ ಜಾತ್ರೆ

ಕವಿತೆ ಎಂದರೆ ನನ್ನ ಜೀವನದ ಯಾತ್ರೆ

ತಂತಾನೆ ಹೊರ ಚಿಮ್ಮೋ ನೀರ ಸೆಲೆಯಂತೆ

ಮನದ ಭಾವಗಳೆಲ್ಲ ಕಡಲ ಅಲೆಯಂತೆ

ಹೊಸತನದ ಕಥೆಗಳನು ನಾ ಹೆಣೆಯಲಾರೆ

ಹಳೆಯ ವ್ಯಥೆಗಳನೆಲ್ಲಾ ನಾ ಜರಿಯಲಾರೆ

ಜಗವ ಬೆಳಗಲು ನಾನು ಹಗಲ ರವಿಯಲ್ಲ

ಜನರ ಎದೆಯನು ತಣಿವ ಮುಗಿಲ ಮಳೆಯಲ್ಲ

ನನ್ನೆದೆಯ ಭಾವಗಳೇ ಈ ನನ್ನ ಹಾಡು

ಅನುಭವದ ಒರೆಯಲಿದೆ ಕವನಗಳ ಜಾಡು

ಹೃದಯದಾ ಭಾವಗಳು ಹೊಮ್ಮುವುದೇ ಕವಿತೆ

ಎದೆಯ ಕಲಕದ ಹಾಡು ಅದಕೆಲ್ಲಿ ಘನತೆ ?

- ಮಧು ಕೋಡನಾಡು.