भाईजी #निमाड़ी बोली

भाईजी भाईजी देखो मऽनऽ तुम्हाला लेणऽ काई बणायो?

सुनील खेत मऽ सी आई नऽ नऽ बठ्योज थो, न ओका छोरा नऽ ओखऽ वटला का दगड़ा न प कोयला,गेरू न चूना सी करेल कलाकारी बताई। 

सुनील देखणऽ लग्यो।

एक बाळक का हाथ मऽ देवकटासळ्या सरी को फूल बणेल थो नऽ धवळो पैजामो कुर्तो पेरेल एक आदमी सरिको बणेल थो।

"भाईजी ई तुम छे न ई हाऊं छे।

आज भाईजी नऽ को दिन छे।असो म्हारी मास्टरनी नऽ बतायो।"

सुनील का जीव ख खोब अच्छो लग्यो कि ओनऽ छोरा खऽ भणनऽ भेज्यो तो अच्छी अच्छी वात नऽ सीखी रह्योज।

उ सोचणऽ लगी गयो कि हमखऽ तो मालूम न्नी थो कि ई भाईजी नऽ को दिन काई होएज।

"मरिगा नऽ वटलो भंडई नऽ नऽ धरी दियो एकी तो हंऊ मजा बताऊंगा थोबिजा जरा।"

खर्राटा की भायरी न पाणी को बाल्टो लई नऽ नऽ ओकी माय दवड़ती आई रई थी। 

सुनील न ओखऽ संतरा की गोळई दई नऽ नऽ कयो कि -

" भाग रे पोरया थारी माय आई रईज तुखऽ कूटऽगा।"

"हैप्पी फादर डे" कई नऽ नऽ पोर्यो भागी गो।